都會錡思妙想ING: Week 6(3) 「消失」一天
係我決定要剷除Threads account 之後,發現自己已經無法繼續留言,所以就只能夠去上床偷偷地睇米亞嘅節目,睇咗一陣之後就去瞓覺。
去到第二日起身,我就落去樓下麥當勞到去買早餐食,食完之後就走去搭地鐵返學。
咁返學途中覺得無聊,就忍唔住打開Threads嚟睇吓大家會唔會有咩反應?
點知啲人又真係好大反應,見到有唔少網民不停咁問話而家讀緊都大Year 1 既 Tony 究竟去咗邊到。
有啲人話見唔到我就覺得Threads無咗我清靜好多,但係更多人對我既「消失」表示震驚。
跟住我上堂既時候聽到身邊某啲同學討論我del acc 嗰件事,我無理佢哋。
中間就去咗圖書館去預習咗之前Lecturer 所講嘅一啲重點,同埋趁著呢段時間重新開始畫畫,咁今次畫嗰種類同之前係大同小異,都係畫返啲日本二次元ACG既角色。
咁我諗著Del 咗個Acc 就覺得自己可以專心畫返好,點知出到嚟既畫功就覺得始終都係無心機去練好自己啲畫筆功。
(其實原來嗰幅畫係再之後嗰一日畫既,不過就唔想大家睇到剩係打機同埋不斷碌任何社交媒體咁悶,所以呢度又改咗。)
以我而家既畫功嚟睇,就算戒咗社交媒體嘅時間去練習畫畫,都需要相當長嘅一段時間先至可以畫到類似米亞同甘米接吻呢種女同作品。而且個過程裏面自己又會對細節位要求多多,係非常有可能畫到一半就放棄。
去到下晝4點半,因為覺得肚餓,我專登叫咗個芝士焗豬排飯配蕃茄薯仔湯,再加杯凍西洋菜蜜多甜少冰,喺JCCC既飯堂享用。
之後大約過咗一個鐘頭之後,我又忍唔到手走去打返開Threads, 自己食飯嘅樣就咁樣被人公開,而post我嗰個人就因為觀眾既獵奇心態而攞到四萬幾流量。
既然係咁,我就去返IG個官網嗰到,取消返剷除帳號呢個要求。經過呢一日之後,意識到自己依然非常渴求他人既關注同埋流量。呢種多巴胺帶俾我既快感真係好難戒啊!