都會錡思妙想ING: Week 7(3) 家庭糾紛(下)
我比父母用武力逼返入屋之後,就喊咗好耐,一路都停唔到口。呢個時間已經係10月15號既凌晨一點。
之後我就走去碌Threads,見到有篇新聞就講到話有個少女脱離咗原生家庭而攞到成就。而自己見到成就呢兩個字就好唔抵得人哋,同時又羨慕人哋可以走到咁遠!雖然就唔知個女仔中間落咗幾多心血同時間研究姖嘅專業。
當時我就只係心諗,既然人哋離開自己原生家庭可以透過自己努力而獲得成就,點解本人就唔可以?點解要虛耗自己嘅人生去讀所謂嘅學士同副學士?點解唔敢違抗自己家人嘅意願去做自己想做既事?
明明自己嘅家庭要攞綜援去過日子,憑乜野要我聽佢哋枝笛啊!聽完佢哋枝笛咁將來要攞綜援過日子!?
Tony唔要攞綜援!唔可以比社會週邊人仕睇唔起我自己!一定要出人頭地證明自己好掂!
於是我就打咗段話想離開原生家庭,叫佢哋(父母)唔好再嚟搵我。
跟住唔知邊個打電話報警,收到警察嘅來電話要拘捕我。
我當刻驚到將自己收埋喺棉胎到,埋住瞓咗就唔會聽到警察入屋。
時間嚟到凌晨三點半,嗰陣時我意識不清醒。但係我聽到自己嘅父母同警察咁樣嘅對話。
父:「阿SIR, 我求吓你幫吓我個仔拉,佢成日都唔知做乜無端端大叫,又亂揼野,半夜又開到個音樂大一大。咁樣真係頂唔順㗎。」
母:「係啊阿SIR, 幫吓我哋啦,呢種情況唔可以再繼續落去。」
跟住有位警察用枝筆寫落本細細哋嘅筆記簿記錄,第二位同第三位警察細細聲傾計。
然後聽到其中一位警察咁講:「家長,根據呢個情況,我哋唔可以直接用罪名去拘捕你個仔。佢呢個情況需要留院觀察。」
咩話?留院觀察?即係咩意思啊?
又唔知過咗幾耐,我感覺到有幾個救護員抬咗自己去救護床到,然後就抬咗去救護車。嗰陣時個意識唔係好清醒。
當我神智清醒嗰時,發現自己經已換咗病人衫,瞓咗係張病床到。
???:「吳先生,你終於清醒啦?睇嚟我哋而家可以去做檢查啦。」
(之後主角吳先生Tony本人因為係醫院接受治療,所以唔會再用Week幾去代表未來嘅集數。)