呃Like 呃出人鬼戀(完): 第十三晚：Apps 嘅無限可能！醫院逃出！

眼前依嗰女人好似慢鏡頭移動咁，揭開張被，然後赤腳企咗落地。佢一頭好似波浪嘅長頭髮垂低，遮住咗半邊面。

「唔駛搵啦，本身瞓喺到嗰女仔己經轉番上加護病房。我雖然同你地無仇無怨，不過受人錢財，佢要我做咩我就做咩啫。」女人一邊講， 一邊用眼角掃視住我周圍。

情況有啲唔妥，依個人講咩要「收佢」，又受邊個錢財？

「我唔知你講咩喎，我搵錯地方啫，唔好意思，走先。」我只好扮傻，然後逐少咁向後退。

「奇怪，隻嘢去咗邊？唔喺跟身咩？你地有咩陰謀！」女人突然擺出警戒狀態，兩雙手縮咗入去衫䄂入邊。





「痴線，都唔知你講咩，喺咁先啦。」既然見唔到小雅，我留喺到都無意思，我轉身就要衝出房門。

「哼！未搞清楚無走得咁易。」女人左手揮出，衣䄂入邊閃出一下寒光。

好彩我一直都睇實佢，依一吓暗算，我反射性向後彎腰避開。「叮」一聲牆身竟然插咗一支長釘。

我望住果支長釘，足足有成八吋咁長，依嗰女人唔通喺職業殺手。

「細路，乖乖地同我合作啲，如果唔喺普通人俾喪門釘打中都會好痛架。」女人右手亦都伸出衫䄂，竟然扣住咗三支一樣咁長嘅釘，依家叫你扮狼人咩！





「靚女，我真喺唔知你講咩呢。你咪當我無嚟過，你又好時我又好，唔駛打嘅。」我己經退到埋牆。

「靚女？你敢笑我！」女人突然發咗癲咁，拎住三支長釘，真喺要插埋嚟。

試問我點知依嗰世界，真喺會有女人唔鐘意有人叫自己靚女！

後悔都無用，眼見果三支長釘已經去到面前，我亦只好合埋雙眼等死。

突然，聽到一吓慘叫，我即刻睜番開眼一睇，嗰女人無端端跪咗喺到，長釘跌哂落咗地，好痛苦咁遮住雙眼。





「阿澤！快啲走呀。」手機傳嚟小雅催促聲。

我依家先發覺，原來我拎住手機隻手自已向前伸出咗，而且仲發出好強烈嘅光線。

咁啱我合埋咗雙眼，突如其來嘅強光，令到衝緊埋嚟嗰女人暫時失明！依嗰功能喺我早幾日無聊時安裝嘅「手機變電筒Apps 」。

「小雅！你好叻呀。」一定喺小雅情急之下開咗Apps，實在太聰明啦。

天大嘅機會，仲等！我衝出咗病房，本來想經番急症室離開，但喺見到前面有幾嗰人影行緊埋嚟，無計上樓避。

一樓，二樓，三樓，唉！又到極限啦。我只好坐喺樓梯口喘氣。

「要走啦，阿澤。有人喺二樓上緊黎。」小雅開咗擴音模式，繼續同我聯絡。

二樓？妳點知架？我正想問嘅時間，就聽到樓下真喺有腳步聲。我半爬半走先匿埋喺一張放喺走廊嘅病床後面。





好彩只喺姑娘巡房，經過就走咗啦。

我拎起手機想再問小雅時，比嗰屏幕畫面嚇咗一跳。

依家手機畫面出現咗一嗰好似雷達探測嘅十字座標，上邊仲有好幾個紅色點不停移動。

「小雅？咩Apps 嚟架？熟口熟面喎。」我好奇地問。

「其實喺你之前裝果嗰靈體偵測器，不過我改咗少少，變咗可以探測人體嘅位置。」小雅細細聲咁話。

嘩！我發出一下讚嘆嘅叫聲！唔好話人要與時並進，連鬼魂都識得高科技。生果5S加小雅，簡直勁過果啲特種部隊裝備。

「喂！上邊好似有人聲。」可惡，俾人發現咗，梗喺頭先叫得太大聲。





「我地搜依層，你上去睇睇。」有嗰男人聲咁答。

我見到雷達顯示，有個紅點離開咗團隊，正「之」字形移動，己經上緊樓梯啦。

「阿澤，我睇咗醫院嗰地圖，所有訪客升降機依嗰時間都停哂，只喺淨番你身後面，走廊尾果部用嚟倒垃圾嘅專用升降機，你快啲喺果到走啦。」小雅喘氣喘得好急，一定喺太緊張啦。

「收到。」趁追兵未到，我都唔理得咁多，起身就跑。跑到升降機前，㩒定按扭。

「叮」升降機門打開，我就走咗入去，即刻㩒「關門」。

「關門」，「地下」，「關門」，「地下」......

我不停咁交替㩒住依兩嗰制，深信只要一出升降機就可以平安無事返屋企。

可惜......