呃Like 呃出人鬼戀(完): 第十六晚：無線索都要開始！人鬼偵探？
接住落嚟果兩日，我可以話喺日夜巔倒，朝早瞓覺，深夜兩點十五分開始，就喺我同小雅嘅私人時間。
我地兩個不停咁喺網上搜尋有關「方雪雅」嘅有關資料，可惜搵到果啲都完全同小雅無關，而最令我唔明白嘅，竟然連一年前果單傷人搶劫案，喺各大報章都無報導過。
雖然話無「死」到人啫，但係傷人罪都絕對唔輕架！
「咁古怪？連細細地一角都無報喎？小雅會唔會你記錯日子？」我繼續一頁頁咁喺手機到睇番，小雅出事果日嘅報紙
。
「梗喺唔會啦，不過......都有可能我個身體留喺後巷幾日之後先俾人發現......」小雅嘆咗口氣，一諗到依家自己嘅身體唔知搞成點，又唔知去咗邊，真喺百般滋味。
「放心啦，我會繼續搵落去，除非真喺有人咁大勢力，可以將成件事冚哂啦。」我努力鼓勵小雅。
其實，就喺離開醫院果晚之後，我就無聽過小雅笑過，當然，我都喺一樣。
每次諗起思源所講嘅嘢，我同樣喺百般滋味。
為咗唔好再諗依件事，我變到更積極幫手調查，而且我早己經諗到三個計劃！唔喺小嘢架。
「小雅，既然網上邊點都搵唔到有用資料，我諗要實行之前講果三個計劃先得。」我關閉瀏覧器，然後同小雅商量。
「咁你想實行邊個先......其實，我覺得三個計劃好似有啲似......哈哈。」小雅依個喺苦笑。
「點會似呀！等我解釋一下啦！」為表示隆重其事，我企埋喺到講。
「計劃一：跟蹤你妹妹方雪宜。我之前見佢去醫院探妳，所以好肯定佢一定知你身體搬咗去邊。」
「......」
「計劃二：跟蹤妳媽媽。我之前都喺醫院見到佢留喺舊病房果到，所以亦都好肯定佢知道你身體搬咗去邊囉。不過可能妳媽媽仍然長時間留喺你病房，要搵佢會難啲。」
「......」
「計劃三：跟蹤潮著男。依個人相當有嫌疑！我有種感覺，覺得妳嘅事同佢有啲關喺。不過，依家轉咗病房，都唔知可以喺邊到搵到佢。」
「三個計劃，三個追蹤計劃，兩個基本上搵到佢地咪己經搵到我囉......咁不如就直接實行第一個計劃咪得囉。」小雅開始無我咁好氣。
我只能夠話，我同小雅真喺越嚟越夾，其實我都一早決定咗要實行依個計劃。
＊＊＊＊＊＊＊＊＊＊＊＊＊＊＊＊＊＊＊＊
要去認識一個女仔，其實需要好長嘅時間細心觀察，不過喺小雅嘅介紹之下，我開始覺得佢妹妹小宜原來喺一個好「強」嘅女仔。
方雪宜今年讀中四，成績唔算太突出，不過運動就非常出色啦，依家喺排球校隊嘅重心人物，所以就算放暑假，佢都經常要返學校練波，聽聞仲拎過學屆嘅MVP添。一有時間小宜仲會去練到唔同嘅防身技，不過練過啲咩小雅都話唔清楚。
小宜嘅生活都算好有規律，唔喺屋企就學校，不過小雅話妹妹每個星期總有一兩日會夜返，問佢去咗邊只喺答約咗朋友，但喺小雅知道佢講大話，因為夜返嘅日子都會見到小宜手臂上有啲新傷痕，縱橫交錯，甚至有啲仲流緊血水。
雖然小雅好擔心妹妹，但喺小宜性格太自我，亦好獨立，覺得唔需要交代嘅事，點問佢都唔會答你。
今次既可以調查小雅肉身下落，亦都可以幫佢睇住個妹。所以我地都早咗收線，養足精神準備聽日正式行動。
＊＊＊＊＊＊＊＊＊＊＊＊＊＊＊＊＊＊＊＊
翌日，我依照小雅嘅訊息指示，下晝時間去到小宜學校附近。為咗掩人耳目，我故意著番件校服，仲拎住包檸檬茶， 加上始終仲放緊暑假行人唔算多，所以我企咗喺佢學校外邊一處鐵絲網偷窥都無人理我。
我揀依個位置企，喺因為可以睇到學校入邊嘅露天操場，依家仲有幾個著住運動衫緊身波褲嘅女仔喺到練排球，不過仲未見到小宜出現。
「唔通佢今日唔返黎練波，去咗探姐姐？」我一路咬住飲筒喺到諗。
好彩，等咗無幾耐，我見到果幾個女仔喺到揮手，原來有另一個女仔一邊束起頭髮，一邊走緊埋去。
小雅？唔喺......喺小雅妹妹，小宜。
遠遠咁望，我真喺會誤會自拍照入邊嗰女仔走咗出嚟。
「小宜，妳又遲到架！」有個大眾臉女仔笑住話。
「對唔住呀！因為姐姐搬咗第二間醫院，路程遠咗，所以先預錯時間。」小宜雙手合埋膜拜道歉。
好可愛呀，同小雅講嘅倔強性格好似有啲出入。
「講笑咋，依家妳姐姐點啊？」另一個大眾臉女仔問。
「唔......前兩日，情況有啲惡化，嚇死我同媽媽啦。但喺依家阿克幫我地轉咗去另一間醫院，總算穩定落嚟。」小宜低哂頭，仲有少少哽咽。
其他嘅女仔慌慌忙忙咁轉換話題，拉住小宜出到操場開始練波。
「原來連醫院都轉埋，果晚原來真喺陷阱。」我用WhatApps將得到嘅消息馬上通知小雅。
「轉咗醫院？究竟我身體發生咗咩事啊！」小雅都顯得不明白。
「依家唯一嘅線索就喺你妹妹，所以我今日會繼續跟住小宜，睇下夜啲練完波佢會唔會再去探妳啦。」
「辛苦你啦，阿澤......」可能除咗多謝，辛苦哂......小雅己經唔知再可以講咩感激說話。
「小雅，可唔可以應承我，當我朋友就唔好再咁客氣啦。」依種說話，每次聽都有種傷感。
「......嗯。」
我唔知道我地兩個仲可以咁樣傾計傾到幾時，不過，我希望唔好浪費任何一句訊息喺感激同內疚上邊。