呃Like 呃出人鬼戀(完): 第二十八晚：可能喺最後一日！二人自拍！
無論點樣，都不得不佩服眼前依位潮玩達人潮哥嘅實力！
當佢分析完整個形勢之後，我地先發現，原來有一件事一直都遺漏咗；就喺小雅同小宜嘅媽媽。
如果對方一直有人質喺手，就算我地可以穿過所有防線，最後咪又喺要舉手投降。
「我竟然忘記咗......依位女士亦都俾師父落咗咒。」思源望向小宜。
「咩話？落咒......」小宜大吃一驚，回想番自已中咒之後，做過嘅事，實在心都寒埋。
「嗯，因為東寶嘅人無可能廿四小時看守肉身，所以就利用果位愛女心切嘅女士啦。不過，當肉身搬到道堂，女士就被囚禁喺另一個地方。」思源有啲愧疚低下頭。
「我一定要去救番媽媽出嚟！」原來家姐出事之後，媽媽對自己嘅態度越嚟越差，喺中咗咒。小宜握住拳頭，自責點解會將件事歸究家姐身上。
而潮哥就繼續喺佢拎嚟果部平板電腦到不停咁輸入資料，包括思源提供嘅道堂平面圖，小宜講嘅內部情況，同埋我一直遇險嘅經歷。最後，仿似見到無數嘅數據喺佢附近左右穿梭。
「我明啦。」潮哥終於都放開佢三隻手指。
我地所有人都平心靜氣等待佢嘅安排，就只有思源今次唔再烘埋去。
「我地有三件事要做：第一要救伯友，第二要對付師太同東寶，第三當然喺最主要目標，令小雅甦醒。三件事要同時進行，所以，依家我地六個人唯有兵分三路。」大家聽完都不禁點點頭。
「阿宅同小雅就分唔開，負責帶手機去到肉身位置；小宜同老麥最能夠保護自己，所以佢地負責去救伯友。而果個師太當然就由我同思源大師對付啦。」潮哥向住思源露齒一笑。
「等等......我唔要同依個人一齊啊！」思源面色都變埋，身體俟後，可惜佢後面已經喺牆嚟。
「思源大師！我保證，下次見面時，我一定會配合番你嘅造型。信我！」潮哥把握機會，一下捉住咗思源隻手。
雖然有啲對唔住思源，不過依個安排喺眼前最有可能進行嘅計劃。
不過，仲有好多好多細節要傾，所以我地差唔多開會開到凌晨一點；然後，潮哥話要準備一啲事前功夫，所以，最後我地決定......聽晚深夜十二點粉嶺集合。
仲有一日時間。
＊＊＊＊＊＊＊＊＊＊＊＊
一隻茶杯被人大大力咁摔落地下，跌個粉碎。
「可惡！成班飯筒！我養你地嚟有咩用！」東寶背向月光怒視住一大班手下。
佢個影就好似一隻張牙舞爪嘅魔鬼，嘍囉們都縮埋一堆。
「佢地會返嚟嘅，只要個肉身一日喺我地手上，勝算都喺我地依邊。」師太無笑啦。
當知道徒弟思源竟敢闖入去佢房間偷睇法典嘅時侯，件事就出現變數。師太唔知道思源究竟對「易命嫁孽」了解有幾多，不過絕對唔可以俾佢破壞成件事，一件佢儲心積慮實行嘅事。
「勝算？叫你徒弟唔好搞咁多嘢咪有囉」件事一波三折，東寶嘅耐性都已經到極限啦，對師太亦都裝唔出咩好態度。
「哼！你唔好唔記得我仲有兩條餌。」師太一揮大䄂，走番入後堂。
「好，我就放長雙眼。」東寶亦都唔再望師太。
＊＊＊＊＊＊＊＊＊＊＊＊
我地就喺麥記門口暫別。
思源第一個快到無影咁離開，而潮哥就向住佢走嘅方向，誇張咁揮手對別。
老麥就負責送小宜，小宜最後借咗我部手機，傳咗一個好長......好長嘅訊息俾小雅，兩姐妹總算真正冰釋前嫌。
而我？我唔想返屋企住。
咁難得終於淨番我同小雅，所以我慢慢咁行咗去尖東海旁。
已經喺凌晨時份，無人聲，無車聲，無自由行。
成個維多利亞港都喺屬於番我地嘅。
當等到兩點十五分，我打咗個電話。
「喂，小雅你點呀？我地好似好耐都無傾計啦。」我依家只喺想同一個人通電話。
「澤......」小雅把聲好低落。
「你唔好再誤會啦，小宜佢其實......」我都未講完......
「我知，你地講嘅嘢，我都聽到哂，我頭先開咗錄音功能。」小雅已經搶住答。
「咁咪好囉，你唔駛再擔心小宜啦。依家有老麥睇住佢，我可以保證，佢俾我可靠得多。」嘩，小雅太聰明啦，咁我以後都喺唔好亂講嘢。
「其實......你地點解要咁幫我？你地真喺唔駛冒咁大危險，去幫一個......只喺識咗唔喺好耐嘅人.....唔值得架......」小雅又飲泣啦。
「傻瓜。」我大聲咁答。
「吓......」小雅靜咗
「值唔值得，喺每個人心目中都唔同。人與人之間，就好似一條鎖鍊咁一環扣住一環。正如我想幫妳，小宜亦想幫妳，老麥就想幫小宜，思源就想幫我，潮哥就想幫思源......朋友就喺咁相處架啦。唔喺咩？哈哈。」老實講，朋友我真喺唔多，所以我對情誼喺睇得好重，依句喺真心話嚟。
「澤......」
「唔好再咁唔開心啦。」
「澤......其實有件事我喺知架......我......」小雅欲言又止。
「得架啦。我唔喺話過唔俾妳再講客氣說話。」
「唔喺呀，我喺想話......」
「好啦！唔好再講其他嘢，妳知唔知點解我要嚟海旁呢？」我唔想再聽啦，時間好寶貴，唔應該再浪費。
「吓？」
「我要搵一個全港最靚，最值得留念嘅地方。小雅，我地一齊影張自拍好嗎？」
其實喺因為下晝，俾中咒嘅小宜強行迫我同佢影自拍，我一直耿耿於懷，二人自拍喺一定要同一個自己心儀嘅對像影先得架。
「吓？傻瓜我點影呀。」小雅聽到依個咁傻嘅提議，終於都笑番啦。
「好簡單啫。」我拎住手機，背向維多利亞港。
然後設定好自拍模式，我將鏡頭故意偏埋一邊。
「從今日開始，我嘅自拍照左手邊嘅空位，就喺小雅你專屬位置。」
「傻瓜。」小雅一聲笑罵，陪隨一下「咔嚓」。
今晚，可能喺我地相處嘅最後一晚......無論救唔救到小雅......「都喺一樣」。所以，依張自拍照，將會喺我地嘅最後回憶。
(甦醒篇 完)
番外：
若干年之後，唔知點解有張不明來歷嘅相流出咗。
引起英國，法國，美國，日本等等對異靈事件特別研究嘅國家關注。
有好多人話只不過喺有條傻仔想自拍，點知連鏡頭都對唔正，偏斜咗啫。
但喺，有啲真正擁有靈神通，感應強嘅能力者就話：
「我地見到喺個男仔旁邊，有一個女仔含羞答答咁同佢面貼面影咗依張自拍照。」