決定命運嘅日子,終於都到啦。

一日嘅時間好快過,我同小雅,最先到達。之後喺老麥同小宜,佢地一齊嚟。

老麥今日真喺特別型仔,著住一條黑色布褲,再加上一件白色汗衫;咁多年無同佢去波打,條友竟然練就咗一身骨肉均勻嘅身裁,完全無多餘脂肪。驟眼睇落去,仲以為喺李小龍翻生。

啱啱搭正十二點鐘嘅時侯,粉嶺站上蓋果到有個人跳咗落嚟,思源。

原來佢先喺最早到,只喺一直坐喺車站上面,避免咁張揚。



夜已深,突然泛起一陣薄霧,一條人影正踏住黃色街燈下嘅小徑出現。

「佢高傲,但係宅心人厚;佢低調,但係受萬人景仰;佢可以將教主?俾人類既手機運用得出神入化,佢可以整得番堪稱垃圾嘅破爛手機。佢究竟係咸蟲既化身,定係痴漢派黎既使者呢?冇人知,但可以肯定,每個人都俾佢一個稱號─男神!」

當男神潮哥嚟到我地面前嘅時,一時我地都認唔出佢今日嘅造型。只見佢著住一身鬆夸夸嘅啡色大袍,隻袖仲跟足思源一樣長過手掌,再加上佢背後好似仲插住支長長嘅物體,不過俾佢件衫遮住,睇唔到喺咩。

潮哥非常滿意我地嘅迷惑眼神,佢輕輕點點頭,然後喺衫袋入邊拎咗啲嘢出嚟散喺地上:「想當年,我地同翻版商嘅關係幾咁密切,我地亦都睇住啲AV女優一代傳一代。可借丫,依家個個都上網DL,唔好話翻版,連正版都無哂啦。我只可以話生不逢時。」無錯啦!潮哥依個末代道士嘅造型,就喺殭屍入面嘅陳友。

我同老麥同時倒抽一口涼氣,睇番潮哥散喺地上嘅,竟然喺佢半生以嚟儲埋嘅珍藏日本AV女優正版VCD!依家俾潮哥親手剪到碎哂,確實不勝唏噓。



唔通,連潮哥都覺得我地今次一行,將會有去無回?

「你地啲細嘅識咩!過咗今日,我......就要結婚啦,AV女優只喺我生命中嘅過客。再見啦。」潮哥馬上抖正。

我地幾個不禁望向思源,但喺佢見到潮哥行近,已經一早跳番上車站啦。

正如Chi-Lam所講,世上除咗親生仔女,仲有一樣叫義氣仔女,明知道之後落嚟要面對兇險,但喺眼前所有人都到齊,依啲就喺「同伴」。

時間喺十二點十五分。



大家認真咁圍埋一齊。

潮哥為咗今次行動做咗好多準備功夫,其中一樣喺兩部手機。

「老麥你拎住一部,我自己拎住一部。」

老麥接過手機,原來喺一部都幾舊嘅生果5S,而且部機上邊仲有一條細細嘅裂縫,簡直做得同小雅依附果部一模一樣。

「首先我地三組,各自拎住一部相似嘅手機,如果真喺俾敵人圍攻都可以用嚟引開佢地逃生。」依一招喺我同潮哥講過,阿克果次逃走嘅方法。

「之後,老麥......成個行動最辛苦喺你地,你要負責引開大部份嘅東寶手下,等另外兩組可以更有把握潛入道堂。」

老麥微笑,做咗個OK 手勢。小宜亦都做緊熱身,為咗家姐,亦為咗媽媽,佢已經豁出去。

「師父做埋依啲傷天害理嘅事,無論如何我都要阻止佢作孽。所以,師父就交俾我,如果唔好彩俾你地撞到佢,記得一定要走,走唔到就投降,唔好諗住同佢鬥。因為師父果個咒俾我強大得多,會死架。」思源陰沉沉咁解釋。



之後思源望住我。

「細路,當我地引開哂所有人,你就走入道堂後面,嗰女仔嘅肉身就放咗喺到。先搵個安全嘅地方呢埋,我一定會諗盡辦法拎番佢嘅天魂返嚟,到時就要用你嘅血滴落去三魂上邊,天地人三魂就可以歸身。」思源頓一頓。

「你真喺已經決定咗?」思源再細細聲咁問。

我堅決咁點點頭。

然後手機一震。

我將手機屏幕轉向大家,喺小雅傳俾所有人嘅WhatApps訊息。

「多謝大家為我做嘅一切。無論點,求求大家千祈唔好冒險。」再加上一個拜謝感情附號。



老麥同小宜都做出一個成功手勢。

思源默默頌經。

只有潮哥繼續含淚拋散緊佢嘅VCD 碎片。

時間喺十二點三十分。拯救行動始動。