[中篇]隱藏係香港地底既秘密──點解要我去發掘？: 計劃

老爸的話此時聽來格外有威嚴，我們都靜了下來，看著他，就像等待某個大人物演講似的。他假咳一聲，然後我們圍著圈坐在地上。地面鋪滿了灰塵，老爸便用手指在地上作畫。他在地上畫了一張類似平面圖的東西，不過只有一部份。他緩緩地道：「我一開始以為你地黎左呢度，冇諗過你地係去元朗果個藏晶地，所以先行一步黎到。果陣茅山派既人仲未出現，而我又搵緊你地，都行左一部份。呢啲就係我記得既地方。」
 
他的手指滑落到一個圓形：「呢個係我地身處既地方。」順著一條通道指向另一個更大的圓形：「呢度係我用計困住佢地既地方，起碼仲需要十五分鐘左右既時間佢地先出到黎。我地可以從呢個通道──」他繞回我們的圓室，指尖經另一條通道，中間有幾次分岔路，接著來到一個方形：「去到呢一度。我頭先去到時有種感覺，金晶就藏係附近，我地可以去果度搵下仲有冇通道。而家，我地要係呢度設個陣法阻撓茅山派既人追趕我地，雖然未必可以拖延到好多時間，但係聊勝於無。」
 
他抬起眼睛，目光如炬地看向列天欣和Ms Tsoi：「你地仲可以設幾多次陣法？」
 
列天欣一愣，囁嚅著道：「破陣容易設陣難。我……我即使冇咩受傷，但係我能力唔夠，最多……一次，同埋唔係咩高級既陣法。」她低下頭來，好像十分羞愧。我攬了攬她肩頭以示安撫。而Ms Tsoi也皺了皺眉頭道：「我頭先對付鬿雀消耗太多，我諗可以設到兩個比較低級既陣法，又或者一個比較好既陣法。」
 
老爸嘆了口氣：「如果你地可以設多幾個陣法就好喇。不過事到如今，惟有慳住洗。天欣，你陣間係呢度設一個圓陣，以你能力應該冇問題？」
 




列天欣點點頭：「我應該可以。」
 
「至於你……你保留住力量，遲啲要用。」老爸看了眼Ms Tsoi，繼續低頭看著平面圖：「當我地攞到金晶之後，我地沿路翻去，如無意外中途會遇到一批茅山派既人，如果佢地係呢啲分岔路選擇分散力量黎行既話，以我地既能力，打低佢地唔係冇可能。呀前，你仲得唔得？」
 
堂哥淡淡地說道：「我冇事。」
 
我看到他身上觸目驚心的傷口，實在想不透他怎麼還說得出「我冇事」這種話。我的心直往下沉：他過去的十多年，都在代替我接受訓練，他亦沒有所謂嫡子身份的天賦，沒辦法像我那樣輕以易舉就學會某種術法，因此體能變得異常重要。在他身上那些新舊交疊的疤痕，每一道都在告訴我，我把我的責任（至少，是我此刻還相信是我的責任）丟給了一個本應像我那樣擁有無憂無慮童年的人。
 
該感到羞愧的人是我。
 




我這些意念只在頃刻間流過大腦，很快老爸的說話就打斷了我的思緒：「你唔好死撐，唔得一定要同我講。呀臨，你傷成點？」
 
「我？噢……」我按了按胸口的傷，還是痛得厲害，不過痛著痛著好像變成了某種背景感覺的存在，也沒有剛才那麼難受：「應該都得既，我可以幫到堂哥手。」
 
老爸搖頭：「我唔係呢個意思，你要保留體力，有更重要既野要做。」
 
我一呆，問道：「係咩野？」
 
「到時再講。我頭先施放太多法術，最多用啲簡單既術法幫你地手。我地打低佢地既分隊之後，要即時逼問到佢地攞到既晶石係邊一隊既手中，然後追上果隊，解決佢地，搶埋木晶同土晶，我地就要翻黎呢個方形室。」老爸眼中閃過一道精光：「跟住就係你出場既時候，呀臨。」
 




我開口想要問話，他卻一擺手，掃平了地上的塵埃，站起身來：「天欣，我地先進入通道，你設完陣追上黎，得唔得？」
 
列天欣臉上現出幾分猶豫，好像很害怕被獨留在這裡。我衝口而出：「不如我陪佢！」
 
老爸不假思索地否決了：「唔得，我地唔承受得起呢個風險。」說畢，就伸手摸向另一邊的牆壁，但聽喀一聲，就如剛才老爸進來那樣子，另一邊的牆壁也陷進去了一大塊，露出後頭空盪盪而漆黑一片的通道。老爸想都沒想就向我們招手，朝那通道走去，堂哥跟在後面，接著是Ms Tsoi。我只好爬起身來，回頭看了列天欣一眼，對上她微帶驚恐的眼神，微感不忍，但在這情況下，只好狠下心腸，回過頭去走進了通道之中。