「等我俾啦~」享受完一個幸福午餐之後,Emma竟然同我爭埋單...

『點可以要你俾呢?』真係估唔到,而家呢個年代都仲有咁老套既事情發生...

「你已經請左我好多餐架喇~呢餐輪到我架喇~」Emma繼續堅持...

『有好多餐咩?咁唔差在請埋呢餐啦~』要女仔俾錢真係唔係咁好意思呢...

「你硬要請我既話,即係唔尊重我...睇我唔起...男女唔平等!」Emma咬一咬唇睥住我...





男女唔平等原來可以咁演繹架咩?

平時我只係聽到Ashlynn講話唔聽佢意見就唔男女平等...

我既錢唔俾一半佢洗就唔男女平等...

一直以黎,我都以為男女平等係D婦女團體最大既大話...係全世界最唔平等既事...

但原來男女平等係可以咁平等架!





「無野講喇嘛~今餐我既~」Emma帶住幸福既微笑埋左張單...

同一個理念可以有好多唔同既演繹。

你可以將佢扭曲為對你有利既武器。

只要你埋沒良心...

相對地法例都係一樣~





有D厚顏無恥既畜牲成日將基本法掛係嘴邊,一有咩就話根據基本法~

但佢地明明就係為左自己既利益,扭曲左基本法既原意。

將一個本來保障公平原則既法例,扭曲成破壞公平既武器...

真係可恥!

「好滿足~好幸福~」Emma翹住我行出丼丼屋。

『嗯~好多謝你請我食呢餐呢~』身為香港男人,就算俾女仔請食飯都要保持風度。

「我多謝你先岩~」Emma對住我甜絲絲咁笑。

望住無時無刻都咁開心既Emma,我都覺得好開心~





其實開心真係可以好簡單,只要你開心,身邊既人都會好開心~

開心係可以傳播,係可以感染~

如果每一對情侶都可以咁樣,開開心心過每一日,就無咁多爭吵...

也許相愛很難,就難在其實雙方各有各寄望,怎麼辦...

要單戀都難,受太大的禮會內疚卻也無力歸還...

也許不愛不難,但如未成佛昇仙也會怕,愛情前途黯淡...

愛不愛都難,未快樂先有責任給予對方面露歡顏...





得到浪漫,又要有空間...

得到定局,卻怕去到終站...

然後付出多得到少不介意豁達,又擔心,有人看不過眼...

相愛真係好難呢~~~

「仲有時間喎~不如我地過定去尖沙咀行陣街先好唔好丫?」Emma搖一搖我手臂。

『嗯~都好丫~咁我地行嗰邊搭地鐵~』我指一指地鐵站方向。

「揸車過去啦~走嗰時唔使又返番黎丫嘛~」Emma已經拉住我去停車場...

旺角去尖沙咀都要揸車?





兩個站,一條直路既距離咋喎...

KB裸跑都到啦~

唔怪之得香港成日塞車啦...

“吼~吼~吼!”

聽住由身後發出既引擎聲,真係幾時聽到都係咁動聽~

『Emma~你自己有幾多架車?』我望住盞紅燈...

「嗯?你係問我會有幾多架車我係會揸?」Emma望一望我...





『有乜分別?專心D專心D~轉燈喇~』我指一指盞交通燈...

“吼~吼!”

「放心啦~對我有信心先得架嘛~梗係有分別啦~所有車都係由公司買既,基本上唔可以話係我地自己既~不過又當然只有我地先會揸啦~仲要泊喺我地自己屋企添~咁講你明唔明丫?」Emma向我打左個眼色...

『專心D專心D!望返路面...』雖然唔係好明,但好似好厲害...

「之前我就揸LP 700-4既~到ROADSTER出左我就揸ROADSTER喇~」Emma一俾油就超過架紅的...

『你對AVENTADOR都幾情有獨鍾架喎~』唔夠幾秒,又停喺燈位前面...

「我既最大缺點就係專一~」Emma對我莞爾一笑…

『哈哈~專一都可以話係缺點丫?』話專一係缺點呢D說話多數都係D死MK呃蝦條先講架喎~

「人太執著,心盲無明丫嘛~人民特首劉華係咁講既~」Emma一俾油,起步仲快過隔離架紅的...

『你執著?』我打量一下Emma...

「我好執著...特別係愛情...我愛一個人,可以將佢愛既野變埋做自己愛既野...」Emma一路俾油,一路成支箭咁加速...

或者你會覺得Emma咁講好似有D恐怖...

總有一種好似D變態殺人犯...“我得唔到你都唔會俾人得到你”既感覺...

但諗真D,又幾窩心~

愛一個人可以愛到佢愛既所有野都變成你既所愛,咁咪可以少D爭吵囉~

好似話你鍾意打LOL,佢又會同你一齊打下路,做你隻SUP~

你鍾意玩Minecraft,佢又會同你一齊喺荒島探險~

你鍾意打籃球,佢又會坐喺場邊為你打氣~

你鍾意左第二個,佢仲會同你玩3P添~

真係諗一諗都夠晒滾動~

兩個人喺埋一齊,可以做D大家都鍾意做既事真係幾開心~

或者呢D就係叫做夾掛~

要喺呢個世界上,遇到一個夾既人,好似好難...

就算真係俾你遇得到,又未必可以一齊到...

愛呢家野唔係話夾就可以一齊...

仲有好多好多好多…

好多D乜呢?

我又唔係咁清楚...

總之喺愛情路上,荊棘滿途係啦~

泊好架車,幫Emma蓋返個車套,Emma就翹住我去行街街~

『點解平日既尖沙咀都可以有咁多旅遊巴泊喺路邊?』我望住好似城牆一樣既旅遊巴(s)...

「香港幾時都係咁多大陸遊客架啦~」Emma翹住我擺下擺下咁行。

『我真係好鬼憎D蝗!搞到香港唔似香港!』講起我就扯火!

「嘿嘿~但對D商家黎講,佢地簡直係發光既金豬~」Emma望住一隻又一隻豬...

發光既金豬?

「而家既大陸人真係好有錢~而且佢地又好捨得使錢~對商家黎講,真係同隻大金豬無分別~」Emma望住隻金豬...

唔怪得之前D&G會做出一D同DOG無分別既事啦~

『咁都唔可以因為商業發展而無視左廣大市民既利益架嘛!』我仇視住一隻金豬...

「咁邊個有權力D,有影響力D?」Emma眼定定望住我...

ER…

「唔使我講你都知~而且...當你去到嗰個位置既時候,你都會做同樣既決定~」Emma望返去大街...

嗰個位置?

我諗以我呢種人,真係過多幾十世都去唔到嗰個位置...

當我仲嘆息緊自己既無能之時...

「咦~咦~咦~返左新款喎~入去睇下咯~」Emma捉左我入一間店舖...

我望一望好似鬼畫符既店名...Salvatore Ferragamo?!

飛甩雞毛就聽得多,自己行入去就真係無試過...

我地呢D爛身爛勢既就咁行入去,實遭D仆街Sales白眼...

真係唔知由幾時開始D濕鳩Sales惡撚過D客...

不過又唔怪得佢地既~

一睇就知我地呢D入黎觀光架姐~

又點買得起幾十萬一件褸~

唔好話褸丫~底褲都買唔起啦~

D Sales食佣架嘛~

唔通會嘥時間喺我地呢D觀光客人身上咩~

「李小姐你好~我地岩岩返左新貨喎~」一入到店裏面,一個姐姐仔立即招呼我地...

識得叫李小姐...

睇黎Emma係呢道既常客...

「嗯~」Emma帶住微笑點點頭之後,開始睇衫...

Emma拎起一件紅色長裙望一望,擰擰頭...

我偷偷睇一睇個價錢牌...

一…二…三…四…五…

一件薄切切既長裙都要四萬幾?!

著左之後會識得飛架?

「麻煩你幫我拎晒新返既俾我試試~」Emma帶住微笑同身後既Sales講一講...

「係既李小姐,請黎呢邊等等~」個Sales點晒頭笑到四萬咁口...

咁大陣仗?!

「飛揚~你唔會介意睇我試衫架呵~」Emma向我打左個眼色...

『唔...唔介意...』係有D尷尬姐...

坐喺張梳化上面等Emma試衫...

以前戇鳩鳩咁企喺Fitting出面等Ashlynn試衫就試得多~

仲要俾D八婆當我係變態佬咁睇...

舒舒服服坐喺梳化道等人試衫就真係第一次...

「我靚唔靚丫~」Emma著左件黑色斜膊短裙行左出黎~

仲要喺我面前轉左一圈...

條短裙飄一飄起,盡顯Emma對雪白無暇既修長美腿...

『好靚…』真係好靚…

靚到我口震震咁控制唔到自己想講咩...

Emma既身形真係著乜都咁靚~

咩叫Carry?

呢D咪叫Carry囉~

你地嗰班乜春都掛Carry喺嘴邊既死港女同我彈開啦~

真係唔係係人都講得出...

Emma笑一笑,又返入去換另一件衫...

Emma每換一套衫,都會行出黎轉個圈,行兩步,行到我面前,問一問我意見...

老老實實我就真係俾唔到D咩意見,只係識得話好靚...

Emma實在太靚...

修長既美腿一擺一動,都足以勾走所有男人心...

完全無肚腩既小蠻腰,完美曲線...

豐滿既酥胸可以托起所有衣服...

當然唔少得Emma既漂亮臉蛋...

既可愛,又美麗~

真係無撚得輸~

欣賞住Emma試衫,真係一種生活態度~

「全部幫我包起晒去,送去我屋企~」同Emma行去埋單...

送貨?!

究竟要買滿幾多錢先有呢個送貨服務?!

唔係…

我應該問要有咩身份先可以有呢種服務...

「無問題丫李小姐~一日之內就會送到府上~多謝你八十八萬…」我已經聽唔切個Sales講埋個尾數係幾多…

因為我已經俾八十八萬呢個數目嚇撚死左…

你點樣可以諗到買幾件衫、幾個袋仔、幾對平底涼鞋都可以洗成八十八萬…

八十八萬丫!

我儲極都儲唔起既首期都俾得到喇!

Emma由銀包仔拎左張黑色既信用卡...

「收你American Express~」Sales雙手接過Emma手上既黑色信用卡...

American Express Centurion Card?!

傳說中連飛機都碌得到既既黑卡?!

天呀!

係唔係真係咁震撼呀?

大家可能會話我既反應使唔使咁浮誇?

但我可以同大家講,我無誇張到架...

你唔好以為呢將黑卡就好似你銀包裏面D爛鬼白金卡咁人人都可以擁有...

嗰D咁既所謂白金卡,我銀包都有四張!

好似我呢D月入一萬鬆D既死窮鬼都可以有四張白金卡扎袋,你話仲有咩人可以無?

但呢張黑卡就真係一般人唔可能擁有...

我所指既一般人已經係以為自己炒樓炒股炒到風山水起有幾千萬臭錢就不可一世既仆街!

如果想擁有黑卡,你係需要經過美國運通邀請先可以得到...

無錯!

你係要被邀請,唔係接受你申請~

不過美國運通從來無公開過邀請標準...

而擁有得黑卡既人,都係「擁有超高個人淨資產並不斷追求最好和最獨特享受」既人...

即係話American Express Centurion Card不僅僅係一張銀行卡,更代表左一個高收入同享受奢侈消費既上流社會。

奢侈消費...

我連食都就黎無得食...

仲講乜奢侈消費...

「飛揚~試唔試下D衫丫?」Emma托住個頭望住我。

『唔使喇~我夠著架喇~』一件衫都幾千蚊...點捨得買...

「但係...我覺得呢條領帶幾岩你~」Emma拎起左條黑色領帶放係我條頸前...

靚就真係幾靚,但...成二千蚊條領帶...

我帶緊嗰條八百蚊既agnes b都已經覺得好奢侈...

「同我包起佢~」Emma放到Sales手中...

二千蚊丫...

行出Salvatore Ferragamo門口...

「嗱~送俾你~」Emma將盒包得靚靚地既領帶送俾我...

『唔係咁好既…我俾返錢你啦~』我唔想做SRK…

「你唔係要同我計丫嘛?」Emma扁扁地嘴…

『但係...』我唔想做謝繼聰呀!

「你尋日送左套我好鍾意既裙俾我,我而家送返條領帶俾你,當係禮尚往來啦~」Emma向我打左個眼色...

係姐...

但條裙都唔值錢...

你呢條領帶,足夠買十條嗰D裙...

「黎黎黎~我仲有野想買架~」Emma就翹住我行去1881...

Emma一直翹住我行,行到去...

Vacheron Constantin?!

平時我都係喺窗口望下...

都唔敢望咁耐...望下都驚俾人以為我想打劫...

我真係發夢都無諗過可以入去睇下野...

入到去,Emma就坐低左同我講:「我想買隻錶俾我爺爺~你可唔可以幫我揀丫~」

『我?』唔係咁睇得起我丫嘛…

送俾你爺爺喎...

富豪爺爺喎...

我呢D市井之徒,講既野邊有說服力...

「我知你眼光好~你一定可以幫我揀到隻我爺爺鍾意既~」Emma既眼神充滿信心...

點解Emma可以對我咁有信心架呢?

「嗯...」我點點頭,開始逐隻逐隻揀...

喺隻隻都幾十萬…甚至百幾萬既手錶裏面,我見到一隻寫住Malte Tourbillon Collection Excellence Platine...

我眼定定望住呢隻錶...

成熟穩重得黎又唔會太老套~

Classic得黎又帶一點點時代感~

嗯~應該幾岩Emma既爺爺~

「唔該我想睇睇呢隻~」Emma指一指我望緊既Malte Tourbillon Collection Excellence Platine...

「無問題,李小姐~」女店長帶晒手套咁由陳列櫃拎隻錶出黎...

Emma拎上手,左望望,右望望,上望望,下望望…

「你男朋友真係好有眼光~呢隻MALTE陀飛輪限量鉑金珍藏系列全球限量五十隻~我地舖都只可以拎到一隻返黎~仲要係岩岩先放出黎~」店長姐姐又太抬舉我喇...

我又邊有資格做Emma既男朋友...

做跟班都未夠班啦...

話說...點解愛情故事硬係又要加咁多呢D劇情架呢?

「OK~就呢隻~幫我包起佢~」Emma又拎左佢張American Express Centurion Card出黎...

「多謝李小姐~」店長姐姐雙手接過Emma手中既黑卡...

今次我真係唔知呢隻錶要幾多錢…

不過放得喺面前既Vacheron Constantin,隨便一隻都要成六十幾萬…

呢隻仲要係限量...

限量得既即係貴到仆街...

一百萬?

二百萬?

我諗三、四百萬都走唔甩...

買一隻幾百萬既錶都係幾秒間既事...

幾百萬一隻錶丫...同帶層樓上手有乜分別?

一時之間,我真係接受唔到...

我所揀既錶,Emma諗都唔諗,話買就買左落黎...

我真係唔敢相信自己會有咁大影響力...

HOLY SHIT!

我要望下其他錶去冷靜一下情緒...

我望一望下...喺云云眾多貴過層樓既名貴手錶之中...

PATRIMONY TRADITIONNELLE計時萬年曆?!

呢隻錶...之前咪喺雜誌裏面見過囉?

我仲Post過上Facebook添~

個註明仲要寫住“如果我有一日發左達,一定要買返隻”~

估唔到喺呢道都有得賣~

實物真係好靚呢~

完全喺為年青才俊打造~

睇下幾錢先...

一…二…三…四…五…六…七…

一百二十萬?!

呢隻唔係限量既都要成一百二十萬?

咁頭先嗰隻...

當我仲喺道疑惑緊既時候...

「我想睇埋黎隻~」Emma指一指...

「好既李小姐~」女店長將我眼裏面既PATRIMONY TRADITIONNELLE計時萬年曆拎左出黎...

Emma拎上手,左望望,右望望,上望望,下望望:「飛揚~伸隻手出黎~」

做咩丫?

你想點丫?

Emma將隻PATRIMONY TRADITIONNELLE計時萬年曆套到我手腕上...

我帶住層樓...手都震埋...

Emma捉住我隻手望多兩望...

又將我隻手放到我自己個心口前望多兩望...

「果然好襯你~年青才俊~」Emma向我打左個眼色...

唔好玩啦...

成一百二十萬帶喺手道,我乜撚都諗唔到喇...

『OK丫...OK丫...』我快快手手小小心心咁除返隻錶俾店長姐姐...

「幫我包埋呢隻唔該~」Emma望住隻PATRIMONY TRADITIONNELLE計時萬年曆指左一指...

唔係丫嘛…

會唔會吹得太大啦?!

『Emma…』我捉一捉住Emma隻手,好認真咁望住佢...

「嗯?」Emma帶住微笑望住我...

『你唔係諗住送俾我丫嘛?』我好認真好認真咁望住Emma...

領帶我都仲算可以話勉勉強強收下...

但呢隻錶...

「係丫~我知你鍾意呢隻錶~所以想送俾你囉~」Emma點點頭...

『我唔收得架...』我望住Emma擰擰頭...

「點解丫~」Emma帶住微笑咁問...

『太貴重喇…』百幾萬丫大佬...成層樓咁制丫大佬...

「都唔係好貴重姐~」Emma帶住微笑擰擰頭...

對你黎講散紙黎架姐~

但對我黎講,一世都儲唔到丫...

『我真係唔收得架...』我收左就變謝繼聰架喇!

我唔想俾人話“佢老公丫?正廢柴黎架~”丫!

我唔要做李飛揚呀!

Emma眼定定望住我諗左一陣,再笑瞇瞇望住我:「你而家唔收唔緊要~到左合適既時候...我先將佢送俾你~」

合適既時候?

即係幾時?

等D飯再軟D既時候?