我係網上面識左個女仔: 第十九章-身後事(2)

之後搬屋呀死亡證呀果啲姨媽都幫我搞掂曬，學校果邊就Ms Lam幫我，終於搞掂曬呢啲。

跟住……就係阿媽喪禮。

好多野都係姨媽幫手搞，我就負責幫阿媽搵返件靚衫搞下遺物果啲。

返返去屋企，又一陣莫名既悲傷。

話左要振作架嘛！



我望住屋企一草一木，強忍悲傷，去執拾阿媽既野。

阿媽既野……好快就告一段落。

唔好話我不孝，只係唔想多提，阿媽既野就唔再講啦。


喪禮既日子……已經到左。

一切正常，不少親戚朋友都有安慰下我咁，不過，我估都估唔到……



佢會黎

佢真係黎左……

佢……姐係我阿爸。

不過佢一黎就比姨媽趕走左。

阿爸……？點解你會黎？


掉低阿媽同我，一走了之，害死阿媽既人，點解會黎？

之後姨媽都幫阿媽整左個靈位果啲。

大家拜完阿媽，走曬果時，我自己一個留低左，想陪多阿媽一陣……

期間我人有三急，去左洗手間，返黎果時，又見到佢。

「對唔住……係我害死你……你會原諒我嗎？」
「唔會。」
阿爸驚訝咁拎轉頭。

「點解要咁做？點解要掉低我地？點解要害死阿媽？點解仲要返來？點解？」
阿爸睜大雙眼望住我。



「你地…唔係…已經走左啦咩……？」
「我想陪多阿媽一陣姐」

阿爸突然垂低頭，講左句「對唔住……」然後轉頭走左去。
我見到……佢雙眼……眼泛淚光……
阿爸……你係咪有咩苦衷……？