在Instagram談一場戀愛: 第三十九章

「做咩？」我問。
 
 
「無。我問下啫。」他仿佛有意避開我的眼神。
 
 
「同小寶有咩關係？」我追問。
 
 
「無啊，我只係提過。」他再說。


 
 
「真係無？不如講真。」他的反應不禁讓人質疑。
 
 
「我唔知啊。」
 
 
「小寶搵過你？你係咪知啲咩？」
 


 
「佢係搵過我，但……無乜野……」
 
 
大概接近三點，活動終於正式開始，我們坐在百萬大道的中段，看不見大台那裡，只聽見有多人輪流上堂發言，大都是在五三一被捕的人，說來愧疚，我連五三一也沒出過什麼力。
 
 
「你會唔會覺得係被我拉黎？」信義問。
 
 


「唔會啊，我自願既，你唔叫我都會黎。」
 
 
「咁就好……」他鬆一口氣，然後說：「你好似變左。」
 
 
「人會成長架嘛。」
 
 
他仿佛又想說什麼，不過還是把話吞進肚裡。
 
 
數萬大專生高喊口號和唱歌，大叫著我們的理想。
 
 


我們的理想，就是希望社會能夠公平一些，公義能在這土地上長存不朽，自由民主能開花結果。
 
 
這個夢，全世界的人都在追求，只是這一次輪到香港而已。
 
 
活動的詳情我不說太多了，畢竟這不是一個抗命故事。
 
 
這只是一個小小的愛情故事。
 
 
接下來的幾天，我和信義都到公民課堂上堂，其中一堂課蠻令我印象深刻的，就是講中國怎樣去維穩。
 
 


只是這幾天，小寶仍是照舊找不到，沒有任何回應。
 
 
信義對此不聞不問，也不擔心，好像一早已經知道什麼。
 
 
可是他卻不肯說。
 
 
「新加坡個感覺好似香港。」Krystal在新加坡whatapps說。
 
 
她像匯報一樣，吿訴我新加坡的氣熱怎麼熱，不過比香港的濕熱好得多。那些鳥不像香港一樣，人一走近就馬上警惕地飛走，反而呆呆愕愕的，人走近也不會害怕，街上有時甚至會看見它們的屍體。
 
 


「佢地好蠢……好似你咁。」
 
 
「如果佢地似我，大概就係全世界最聰明既動物。」我自豪的問。
 
 
「你都好意思講既。」
 
 
「不過啲景好靚。」
 
 
「自拍一張黎睇下先啦。」
 
 


她之後寄了許多張相片來，不過沒有一張有她的臉孔。
 
 
「點解無妳既樣既？」
 
 
「廢事阻住你睇風景嘛。」
 
 
「我都唔係想睇風景。」
 
 
「好攰啊，聽日想係酒店訓下。」
 
 
這幾天我們都很少機會能聊天，她的旅程排滿一整天，回到酒店洗完澡倒到床上己經訓得昏迷。
 
 
「我覺得自己就病，所以都係唔出去啦。」
 
 
「咁你就休息下啦，咁攰！」
 
 
「知道！」
 
 
我心裡忽然想起，就問：「點解妳Instagram唔放旅行相，放埋啲數字相，字母？我睇唔明。」
 
 
我等了片刻，她仍然在線上卻沒有回應。
 
 
「做咩唔講野既？」
 
 
「Krystal？」
 
 
終於，她轉為輸入中，然後說：「你……」
 
 
 
我什麼？
 
 
「我咩？」
 
 
「你就係IG嗰個男仔……？」
 
 
什麼意思……我不懂……？