愛在宇宙大爆炸前: （十二）

一個如常既工作日，放工迫地鐵返屋企既途中，我收到一個電話。

「張浩賢？」一把熟悉既女聲。
「我係。」
「好耐冇見，我係蔡婉玲呀！」
「原來係你，搵我咩事呀。」
「有事先可以搵你嫁咩？」
「唔係，我都唔想你有事既。」
「仲記唔記得你應承過我啲咩先？」
「我應承過你啲咩？」



原來中七畢業，已經係七年前既事。

「咁遲嫁？我比蚊咬到成腳都係喇。」林逸峰一見到我就係度呻。
「對唔住兩位，我啱啱先係實驗室趕過黎。」我一邊將手上既筆記放返入袋。
「碩士畢業係唔可以遲到嫁。」蔡婉玲仲係冇變。

因為林若妍唔係香港，我地三個人私自約出黎打開時間囊。
雖然七年冇上過學校後山，但係條路仲係好熟悉，我地不費吹灰之力就搵到當年埋時間囊既地方。
我地徒手挖開啲泥，終於見返果個曲奇餅罐。



「我地要開估喇，七年前既今日我地最珍惜既野。」蔡婉玲既興奮程度有增無減。

佢打開咗個餅罐，塵封七年既記憶返哂黎。
我地攞返屬於自己既「寶物」，大家都不約而同咁笑起上黎。

林逸峰率先打開包裝紙，係一個乒乓波。

「請問，可唔可以解釋吓呢？」蔡婉玲好明顯睇唔起個乒乓波。
「你唔知嫁喇，中一果年我同張浩賢係乒乓球隊識嫁，呢個係我地第一次對打用果個波黎。」林逸峰懷緬過去。


「果時我熱血扣殺，佢完全招架唔住。」我加多把口。
「完全冇聽你地提過既？」蔡婉玲同學，呢個係一個好問題。
「因為中一上學期完咗，我地就退出咗球隊喇。」林逸峰望住個乒乓波，百感交雜。
「自此之後乒乓球界既『立花兄弟』傳奇亦都落幕喇。」不過我地呢一世都會係好兄弟。

之後到我打開我手上既「寶物」，係我同林若妍既合照，林逸峰個頭攝係中間果張。
仲有一封用學校單行紙寫既信，果張單行紙上面寫住：

———————————————————————————————————————————

打開呢個時間囊既時候，我地應該已經25歲喇。
如無意外，我應該已經同林若妍結咗婚，然後佢會挨住我膊頭叫我陪佢去睇周杰倫演唱會。
我地會一直相親相愛、相敬如賓，直頭羡煞旁人。

但係，如果當呢個時間囊打開既時候，我仲未向林若妍求婚成功既話，我希望同25歲既我講幾句。



仲記唔記得係我地既人生當中，出現咗一個女仔，佢既一顰一笑都深深吸引住我。
我曾經為咗佢，將周杰倫既每句歌詞記哂入腦。
我曾經為咗佢，日日係自修室惡補進度。
我曾經為咗佢，用咗一個月時間去琴行學彈琴。
我曾經為咗佢，連小提琴都學埋。

我記得佢好鍾意周杰倫既《愛在西元前》。
果晚，我同佢睇完演唱會之後，其實我好想問佢：「知唔知點解周杰倫冇唱《愛在西元前》呀？」

因為愛可以係宇宙大爆炸之前。

我對佢既愛，係有科學根據嫁！

林若妍，從前從前，有個人愛你很久！



25歲既你，麻煩你幫我講個答案比佢知。

———————————————————————————————————————————

「我冇睇錯人，你果然係一個好男仔。」蔡婉玲竟然感動到眼濕濕。
「你地要應承我，唔好將呢封信既內容講比林若妍知。」我差在冇跪低求佢地。
「你唔會後悔？」蔡婉玲一邊抹乾眼角既眼淚。
「七年喇，我要後悔唔駛等咁耐。佢依家係外國發展得咁好，我憑咩叫佢返黎？」

「你地果然係呢度！」係我忘記唔到既聲線。

我地三個擰轉頭，見到一個傻婆拎住銀包同護照，企咗係我地面前。
蔡婉玲已經忍唔住衝埋去攬住呢個叫做林若妍既傻婆，我同林逸峰都驚訝到唔識反應。



我下意識收埋咗封信。

蔡婉玲啱啱先抹乾眼淚，一見到林若妍又喊到成面眼淚。
我望住林若妍慢慢行過黎，好想伸手去摸吓佢塊面，睇吓係唔係真既。

「明明係四個人一齊埋既時間囊，你地做咩唔等埋我就偷睇呀？」林若妍扁嘴。
「我地以為你唔會有時間返黎，所以…」林逸峰仲未回復正常。
「好耐冇見喇。」林若妍既微笑，我都好耐冇見喇。