愛在宇宙大爆炸前: （十三）

「頭先拆咗佢地兩個果份，仲差我同你。」蔡婉玲衝口而出。
「你地果兩份係咩黎嫁？」林若妍問。
「我果個係乒乓波，係我同張浩賢相識既紀念品。」林逸峰雖然幫我頂咗第一波衝擊，但係我始終都要面對現實。

我係衫袋拎咗果張合照出黎，我留意到林若妍有一刻收起咗笑容。

「呢張相係我第一次係你地面前表演小提琴果日影既，重點係後面搶鏡既林逸峰，我呢世人識到佢呢個朋友都唔知開心定唔開心好。」我呢個解釋有啲牽強。
「你地又埋咗啲咩？」林逸峰即刻轉移話題。

我望向林逸峰，用眼神同佢表達一個訊息：我呢世人，最開心係識到你。


而林逸峰既眼神亦都回咗個訊息比我：你正契弟。

蔡婉玲拆開包裝，係一支鉛芯筆。
佢既表情由本來有啲尷尬，到最後笑得好開心。

「呢支筆好似係我嫁喎？」林逸峰攞咗支筆黎研究。
「係你嫁。果陣羅偉倫咪搞咗個留校溫書會既，張浩賢退出之後得返我地四個，羅偉倫又淨係教林若妍，我一個人悶到死果陣你主動陪我傾計，唔記得邊日你漏低咗呢支筆，我咪袋起佢囉。」蔡婉玲既面上又重現返15歲果年既表情。

呢個時候，大家既眼光都落咗係林若妍身上。
應該話係佢手上拎住既果個信封。



林若妍打開信封，我地四個一齊睇呢封信。

———————————————————————————————————————————

林若妍同學：或許你會覺得唐突，或許你會覺得驚訝。
然而在我的心中，這是理所當然的舉動。我喜歡你，所以要讓你知道。

如果你也對我有好感的話，我們在放學後到小食部門外的長櫈見。



我等你。

羅偉倫

———————————————————————————————————————————

咩話？羅偉倫係林若妍既「寶物」？
不要再說了，我不能接受。

「我唔係因為羅偉倫所以收埋呢封信嫁。」林若妍解釋。
「你果日有冇去到呀？」蔡婉玲一臉錯愕。
「梗係冇啦，我當佢係一個可以互相學習既同學，其它野我諗都冇諗過。」林若妍既眼神好堅定。
「咁點解要放呢封信入時間囊？」不愧係好兄弟，同我諗既野一樣。
「其實佢係第一個向我表白既人，雖然我唔鍾意佢，不過我既內心對佢充滿感激。佢睇到我既優點，係其他人睇唔到既，我好開心呢個世界上面有一個識得欣賞我既人，只可惜我唔識欣賞佢。我將封信放入時間囊係因為我一直係度等，等一個我欣賞佢、佢又欣賞我既人向我表白，我希望係我打開呢個罐既時候，我身邊已經有一個咁既人。」林若妍依然笑得咁甜。



「咁呢個人出現咗未？」好兄弟。

林若妍冇回答，不過笑得比頭先更加甜。