細細個見到嘅靈異事件勿語: （二十）地鐵．下

（二十）地鐵．下

講起地鐵，再講地鐵。

以下呢個係我自己親眼見到嘅親身經歷。

呢單真係好驚，其實本來諗住琴晚打出黎，
但係夜媽媽係房對住部電腦，諗返起呢件事，自己都覺得r，
背脊寒寒地咁，結果我都係等今日朝早先打，我認我細膽。





言歸正傳。

話說有日搭地鐵，當時大約係五點幾到，
我一上車廂，就企響門口位。
我細過有個習慣，好鐘意伸過頭出去望下側邊左右，
你會見到車身同月台中間d人上上落落果到有個罅位。
可以望到好遠，d人上曬車臨關門果下，
甚至可以望到車頭車尾，大家試下就知我講咩架喇。
但係，記得關門前縮返入黎，唔係好易夾親就唔好賴我喇…





果日我又係咁，伸個頭出去擰向左面，想睇下d人上曬車未。
果站比較多人，仍然有好多乘客出出入入。
就係人頭湧湧中間，我見到有個女人零零舍舍企左係中間，
一隻腳踏住車廂一隻腳踏係月台咁樣，面向我果邊。
雖然有太多人來人往，但因為佢企定定，所以好出，好易見到。
佢d衫同打扮都係正常嘅，長頭髮，黑色上衣，有d似上左年紀嘅老師果種look。

然後d人開始上曬車，條罅位開始疏落，我正面望到佢個樣。

當時一望，我即刻縮返入黎車廂，個心一下子跳得勁快，





唔．L．係．卦…

果個女人，企左響果條罅中間，面向住我呢邊，一切都好正常，除左…條脷申左出黎。

而脷嘅長度…係長過佢下巴位置！

嘩！唔係呀嘛！睇錯咋嘛！

我同自己咁講，好奇心驅使下，我再一次伸過頭出去。
我吞左啖口水，伸個頭望出去，頭擰向左邊... 嘩！
今次，仲大鑊，個女人仍然實實在在咁企響到，
係！無錯，條利申得好長。
但係今次佢更加近左我個車卡位置！





佢企嘅位置更加接近我。

距離我只有兩三個車卡距離。

嘟嘟嘟嘟，車門關上，我差d就俾夾到，即該縮返入黎。
我個刻真係咩野反應都比唔到，一個人，原來好驚嘅時候，
唔一定會好似睇戲咁歇斯底里咁嗌，
相反，你係會呆左響現場，
個腦好似處於缺氧狀態咁，係咁喘氣，係咁標冷汗，
隻腳好軟，連想講句咩野都講唔到出聲。

我，當其時就係呢種感覺。甚至乎，架車一路開嘅時候，我望住車玻璃上嘅倒影，
我淨係夠膽望住面前自己個倒影，唔敢望多隔離多少少，更加唔敢擰轉頭。

因為我真係好驚，好驚再望多眼，果個長舌過下巴嘅中年女人，就係我身邊隔離…





直到今時今日搭地鐵，我都成日好有衝動伸出去昅下果個車門之間嘅罅隙位，
不過每次都係盡力克制住自己個好奇心，
因為果個位，真係好易見到嘢。

閣下可以一試。

仲有一個位，係你腳下果條路軌罅…

等您分享。



地鐵  參考圖片