(二十一) 泥鯭的

今晚都係講講交通工具 - 泥鯭的。

先解釋下咩係「泥鯭的」。其實即係夜晚,
一架的士載夠幾個大家都唔識大家嘅乘客去到某個目的地附近,
位位比一個特定價錢,人齊岩數就開車,
當然,泥鯭的唔係合法嘅。

有晚我係旺角等緊小巴,附近有d泥鯭的等緊客。


我無聊望入去架的士,兩個肥佬埃近車門呢邊坐,
中間個肥佬仲要着埋曬果d力威健身背心,攬住個足球係架車到,
大熱天時見到都惡頂。

我dup低少少個頭,望下最遠果邊,原來坐左個女仔,
個女仔好細個,我諗應該十一、二歲到,
幾清秀,幾靚下。
我果陣即時暗嘆,
熱辣辣要同兩個大肥威迫,
真係慘豬豬,唔迫死都臭死。



係!我認!男仔係膚淺。
當女仔白少少瘦少少靚少少係容易俾人憐香惜肉架喇。

咁我就不時望下佢啦,佢無發覺到,亦無乜表情。
佢前邊頭髮d蔭遮左少少眼,唔係太見到佢眼望緊邊。
我睇睇下,心諗,e?做咩做唔開車嘅,
前面兩個,後面三個,齊人喇喎,唔通傾唔掂價錢?

突然,對面車門一開,一個男仔上車,一下就坐左落果個女仔到。


我呃左一聲,再睇真d,個女仔唔見左!

係!車尾只係得兩個肥佬同岩岩上車果個男仔。

然後,司機開車。

我望住的士車尾駛走,再望望周圍,都唔見有果個女仔嘅踪影,我就知…

頭先一路係自己時運高喇。

個女仔應該係搭順風車啫。

咁我點?梗係上小巴走人啦。

我坐係近窗口單邊位,全程小巴,望住窗外景致緩緩倒退,我都心有忐忐,


唉,早知唔八卦周圍昅啦,
人類,總是重覆犯錯。

下次,一定要多加注意。夜媽媽,點會有個十一、二歲到嘅?妹自己搭泥鯭的架!
咁唔make sense都留意唔到,頂!

到站,司機有落。

落到車,決定唔諗喇,車門關上,van仔準備開走。

就係果陣,我望返入架van仔到,我望到,頭先我一路坐住果個單邊位,果個女仔竟然坐左係到!

然後van就響我側邊駛過。

我呆左企係路邊…



呃…

換句話說,我頭先係咪一路…


泥鯭的 參考圖片


已有 0 人追稿