細細個見到嘅靈異事件勿語: （二十八）大門口攝信位

（二十八）大門口攝信位

大家屋企條大門，有無個位可以「攝」信入黎？

通常舊式d嘅屋邨就有呢款設計，係俾d郵差行過直接掉d信入黎你間屋到嘅。

而屋裡面嘅人如果踎低由呢個隙位「莊」出去嘅話，係可以直接望到出面條走廊嘅。

記得細個，有件幾奇怪嘅事，但可能太細，又無乜印象話特別太驚咁。





當時約莫係大約黃昏六點零左右，我做完功課，坐係地下玩GI JOE 公仔，阿媽煮緊飯果d時候。
每日呢段時間度，我都會聽到出邊走廊傳黎一d鎖鏈聲。
「勒勒…勒勒…」 咁我就好奇由個插信位向外望出去啦。
我見到對面條大門外面，企左個細佬仔，
大約四、五歲到，好似面壁咁，哄住對門，
當時，我淨係見到佢個後尾枕，見唔到佢個正面。

之後，幾日都係咁，就算有人經過，佢都仍然係郁都唔郁，一直咁望住對門。
我有時就係咁踎係屋企裡面望住佢望住對門…
氣氛其實係幾怪幾詭異，不過佢d衣著各樣都好正常，




當時又無乜話真係好驚，亦無嘈端巴閉要話俾阿媽知咁。

佢每次都係黃昏呢段時間係到，再夜d都無見過佢。

而最最最離奇嘅係，當我係攝信位見到佢企係到嘅時候，
我試過打開對大門，但一開門，佢就消失唔見左。
我以為佢跑得咁快，但係當我關返門，
再係個隙位望出去嘅時候，佢又原封不動咁企返係到！

郁都唔郁咁，哄住對門。





再打開，再消失。再係個信位到望，又係返到…

次次都係咁。

而我最後一次「莊」佢嘅時候，
我記得，係我望到佢腳上面嘅鎖鏈果次。

如果你試過嘅話，你就知，果個入信位係斜斜地嘅。
我每次都係跪係地，斜斜地咁望上去。
就係果次，我哄到好埋，窄角度左右望佢，
我發現到，有一條好長嘅鎖鏈綁住左個細佬仔隻腳，
條鎖鏈一直係地下廷伸出去?口，好長好長，
我轉盡角度睇都睇唔到鎖頭嘅另一邊…





而家諗返，睇唔到，或者仲好…

果次之後，我都仍然會係黃昏時份聽到出面傳黎「勒…勒勒…」嘅鎖鏈聲，但係都無再一次八卦望出去嚕。

唔係因為諗到係果味野，而係果時細個，
以為個細佬仔係俾屋企人罰，綁住佢罰佢係出面走廊企咁，
所以驚望望下，俾佢屋企人發現，屌埋我啫。

當然，你而家問我，就有另一番解讀啦。

好彩。

細佬仔唔識世界啫。

PS. （留名學嘢）有無巴絲打做郵差知攝信入黎果條隙其實應該點叫…？一講人地就明，求教。






大門口攝信位    參考圖片