(二十九)夜晚晾衫

唔知大家有無聽過呢個禁忌? - 唔好夜晚晾衫。

聽d老人家講,濕氣就最容易聚陰,
果味野就最鐘意聚響d濕氣重嘅地方,
仲要係夜媽媽,有個月光曬住,就特別客易招惹。

係係係…我明吖,香港地都市人繁忙,放得工黎都七、八點(好彩嘅話),
沖過涼食過飯後,好多時將d衫放得入洗衣機果陣都已經十點,十一點,


洗完跟手就將d衫拎出露台晾,呢個係現今好多人嘅日常習慣。

包括我…

的確,真係好難避免,搵食嘛…

我曾經聽過一個朋友嘅親身經驗,
之後每次夜晚晾完衫都總係有少少怯,少少疑心咁,
可能只係自己多疑...
係,我當然唔會自私啦,而家就開心share俾大家。



如果你都有夜晚晾衫嘅習慣,請自行選擇睇唔睇落去…

話說,我個friend自己租屋住,住長沙灣果邊。

佢個露台唔大,係响個廚房再轉入去,向正街景,唔錯嘅。
大細岩岩夠擺個洗衣機同上面有d竹用黎晾衫咁。

有晚佢如常放工返屋企,食飯盒,睇電視,洗衫,沖涼,晾衫…



一件件濕答答嘅衫就係咁晾左出露台。

搞掂曬,就去訓啦。

大約訓到半夜,零晨一點到啦,見口乾乾,去廚房倒杯凍水飲。

一入廚房,行去雪櫃倒杯水。

咦喂?好似眼尾哨到有d野係露台。

佢褪後兩步,莊一莊出去…

唔…

唔... 無野吖,係d衫係衫架上面飄飄下啫。



大風呢今晚。

佢不以為然繼續飲水…

喂…好似真係有d唔妥…

雖知道,如果有人一路望住黎,你係會feel 到嘅。
我個friend話,佢當時就係有好強烈嘅呢種感覺。

佢骨碌一聲飲埋啖水,然後慢慢咁伸過頭出去再望一次露台。

「啪!」

嘩屌,嚇得佢吖,就响佢聚精會神咁望出露台嘅同時,


有個衣架「啪!」一聲咁俾風重重咁吹跌左係地下。

我個friend當堂鬆一口氣,仲笑自己生人唔生膽。

不過就响佢行左出露台,踎低身伸手係地下執返個衫架果一?間…

佢全身突然打曬冷震,有一種好不安嘅感覺遍佈皮膚之上…

佢感覺到頭頂上面晾起左個d衫到...有d野,
好實實在在咁,响到...
佢慢慢向上望... 屏息靜氣...
無嘢嘅無嘢嘅...
佢同自己咁講...
骨碌... 慢慢...
望上去。



佢見到...有個男人嘅臉孔由上面望返落黎望住佢...

就.掛.住.係.佢.件.衫.到。

清楚d講,就係佢件掛起左嘅tee上面,有個頭掛左係個衫領到。
目無表情,面色蒼白。見唔到頸,見唔到下身,淩空咁係件衫上面。

望實佢。

而更甚嘅係...我個friend發現係呢件衫嘅後面果件衫,同樣有個頭掛左係到!

佢當時連港人最直接最真嘅即時反應「屌!」
一聲都嗌唔出,一支箭咁衝左落樓,
一路跑一路跑係咁跑,跑到去大街上邊先定到神落黎。



點解我會知得咁清楚?

因為我個friend果晚無返過去,
走左黎我屋企打地鋪,原原本本咁即時描述返俾我聽...
夜媽媽衝上黎人地屋企,講佢個毛骨悚然撞鬼經歴...
佢一路講...
我不其然咁起勢望向我岩岩晾出去果堆衫到。

果刻我唔知道我係咪應該收返d衫入黎...
我淨係知道,佢真係夠老友...。

自此,當我每次係夜晚晾衫都總係難免會諗起...
佢形容嘅果個...
衫領上面嘅男人人頭。

... 你今晚...收左衫未?



夜晚晾衫    參考圖片


已有 0 人追稿