[真人真事]唔知你地既初戀係點架呢 我既初戀係咁: 相愛(第五章)

到去海馬公園果日喇，跟住我地都照係約埋食完早餐先去，食完就塔車去到大門口喇，排隊果陣已經覺得好多人，我地之中有條蛋散唔知係咪想睇女仔濕身，一入到去就話第一樣野緊係玩"熱帶激流"，我心諗點解次次都係要玩水先安樂

咁果個遊戲係幾個人坐晒一個圓形既野度，舊野順水滑落去果陣中間有D SET好左既水槍會射你咁，水槍果D其實一開始都唔算濕得好誇張，因為都避得到，但唔知邊條仆街遊戲設計師諗到係段路既中間加幾枝可以比遊客射鳩我地既水槍，仲要D遊客係向住D女仔射，射完仲要同我地揮手!!

玩完之後我諗我已經係最無乜點濕果個，我廢事D咸濕佬望蝕MIKI，我將我件外套比左佢，我自已就好MK咁著住底衫繼續玩其他機動遊戲，咁我地咁多人濕晒，我地就去玩剌激D架啦，順便整乾件衫，我地去玩果個唔知"咩咩太空船"，我唔記得果舊野咩名，我平時叫開果舊野做洗衣機，果樣野我覺得非玩不可

因為果架機既構造係可以一架太空船入面前後坐兩個人，有D身體接觸咁既，諗起都有少少流鼻血，到我地排完隊，我同MIKI好自然去同一架太空船度，MIKI坐我前面，到個機動遊戲開始，由於衝力既問題佢個背脊貼住我心口，我有諗過趁呢個機會攬住佢，但我又好驚佢拒絕，又覺得如果我攬住佢既話，我用咩黎捉實D扶手呢?我成個遊戲過程又驚又怕醜又緊張又想流鼻血，但係我竟然最後我咩都無做就玩完個機動遊戲.....

玩完之後我地大家好有默契咁一男一女咁"失散"，我緊係唔會放過呢個機會啦，跟住我同MIKI睇動物，有D其實都幾得意，例如有金魚個頭兩邊有兩個好似氣球咁既野，我唔知點解一見到呢D我就有種強迫症咁想用針吉爆佢。



經過水母館果陣MIKI話D水母好靚，佢話想養，問我邊度有得買，老老實實我都未聽過有人養水母，果陣我地真係好似情侶拍拖咁

我地夜晚先集合返一齊玩灘位遊戲，我贏左好多公仔比MIKI，或者可能我呢世人淨係得呢樣才能啦，MIKI第一次讚我好叻，我果一刻都唔知應唔應該開心好，到我地走果陣我決定之後開始追MIKI

但係雖然我講就咁講，我覺得自已又無百份百機會成功，而且我地已經成日一齊，我好驚佢當左我係朋友，雖然之前臨收線有講曖昧野，但好似已經幾個月無講過喇喎，就係我唔知點做既時侯就又就快到聖誕節

我問過其餘果四個人既意見，個個都叫我去馬，仲比好多信心我，叫我聖誕果陣講係最好，咁我就決定學校既聖誕聯歡果陣比驚喜佢，同佢表白.....