[真人真事]唔知你地既初戀係點架呢 我既初戀係咁: 相愛(第六章)
我就決定係學校既聖誕聯歡果陣比驚喜佢，同佢表白，我打算用聖誕聯歡既抽禮物環節比份禮物佢，我已經一早諗好左點樣做，我打算送花，不過唔係普通既花，係上面有字既花，不過個諗法可能太特別，我行左好多地方先搵得晒D材料
我買左27枝玫瑰花，不過係假花，唔係淨係因為學生哥無錢所以先要買假花，而係個制作過程一定唔可以用真花，點解係27枝?因為"Miki i love you"有12個字，但我唔想咁奇怪送12呢個數字比佢，我就加埋自已署名變14個字，所以27枝玫瑰入面13係紅玫瑰，14係白玫瑰，而我d字會寫係白玫瑰度，喻意一生一世
買埋包裝紙同絲帶，問超市拎個紙皮箱，之後就係搵熒光漆，果時無"淘x"咁方便上網搵下就有，我成個深水埗行晒先搵到，我買左紅，白，綠色，我用熒光漆係因為想佢收到第一刻都唔知邊個送，到返到屋企既夜晚先知道果句I LOVE YOU
返到去之後等聖誕聯歡前一日朝早先整，因為怕熒光漆有時效，但要令佢乾晒係要等24小時，所以我果日無返學咁整，咁我紅玫瑰就油紅色，花莖同葉油綠色，每枝花都用毛筆好小心好小心咁油，最後係白玫瑰寫埋字就攪掂喇，跟住我掛晒佢地係露台等佢吸收日月精華一日，跟住聖誕聯歡果日唔洗咁早返學，我係果日先將d花慢慢砌返好
砌果度我無乜點下過功夫，我主要都係砌返"Miki I Love You"同自已個署名，將D花砌返個層次等佢睇到，擰返正D字，白玫瑰放中間，紅玫瑰包圍住再用AA膠痴實唔比佢移位，跟住放埋入箱用花紙包好就真真正正攪掂喇
可能大家都唔知我點樣可以係一個抽獎環節令MIKI 100%抽到我既禮物，比大家估下
個環節係將所有禮物痴晒號碼，出黎既人抽到幾多號就會拎果件禮物，而禮物號碼唔係一定等於自已既學號
提示:
我地6個人入面其中一個係班會主席，我叫佢幫我手做幾件事，其中一樣係抽獎果陣一定要順學號去抽
全班有29人，學號果度MIKI係25，我係26，而且我收買左24號