[情人節限定短篇] 餐肉煎蛋飯，毒撚既午餐: 第六章：痴心定痴根

傾傾下就見到E小姐陪住阿Sue佢地行過黎。咦？完全睇唔出阿Sue個傷心樣既？反而Ada同Nancy個神情有些古怪。


坐底晒後反而唔見傑傑，我就細細聲問子明傑傑幾時到，佢又話唔清楚。但Ada同Nancy反而係度係咁whatsapp同行開講電話。最後我忍唔住問E小姐Ada兩個搞乜鬼，而傑傑又去咗邊。點知佢突然臉色一沉之後叫我唔好多事…


我無奈咁同子明繼續吹水，班女仔就繼續圍埋咁有講有笑，言語間好似係度講緊話咩男人無用，男人點衰之類既話題。我聽到之後反一反白眼就同子明講我頂唔順，完全唔知自己係度做乜。子明就話我慢慢會慣，真痴線！


唔知幾時Ada傾完個電話返黎之後係E小姐旁邊耳語幾句，之後就急急忙忙咁拉咗Nancy落樓。再過一陣連E小姐都係咁行開傾電話，我越來越覺得有問題，想再出口問時E小姐已經拉埋子明落樓，得返我同阿Sue係度。




首先打破沉默既係阿Sue。


「Don，你知唔知我做咩同Eric分手？」


我點點頭表示知道。




「唉，有時感覺既野真係好奇怪，未係埋一齊果時好期待，但一係埋一齊無耐個感覺就唔同晒…」


我無出聲，坐係繼續聽佢慢慢講。


「其實唔只我失戀。」




聽到時我第一個反應唔係想知邊個失戀，而係心諗係你飛?Eric，都唔知邊個慘情。


「其實早排E小姐都同佢男朋友分手。當年睇住佢地走埋一齊，點知拍?咁多年拖都係咁，真係覺得愛情好兒戲。」


我好愕然，因為我印象中E小姐同佢男朋友感情好穩定，成日定時聯絡，近來係公司同食飯時又唔覺佢有咩異樣，真係估唔到佢地已經分手。唯一令我覺得有關聯既係，次次活動都唔見佢男朋友出現。


「你地男人，係埋耐咗就咩情趣都無晒。明明一開始時好開心好有情趣，之後就慢慢變得悶，變得枯燥冷淡。」


「乜Eric咁快就對你冷淡喇？係既就抵你飛起佢啦。」




阿Sue瞪一瞪我之後話：「我幾時話Eric係咁？你知唔知係我覺得佢太熱情，係埋之後更加變本加厲，我頂唔順先要同佢分手。」


我心諗又係你話怕冷淡枯燥既感情生活，宜家人地熱情你又嫌人過火，即係點？不過我無出聲等佢講埋落去。


「你知唔知佢地走晒去邊？佢地落晒去擋住Eric唔比佢上黎見我呀！Ada佢地由Eric知道?我今晚出黎，而又唔覆佢電話whatsapp時就一直比佢轟炸。你知Eric係傑傑個friend，佢仲慘，自從我分手後頂唔順Eric既電話whatsapp而block晒佢之後，佢就比Eric煩足咁多日，佢今日下晝開始係度應付緊條友呀！」