我參加了籃毛毛演奏會: 突特得得特特行動

我地行到去興偉中心既大門，企左係一盤植物後面，視察緊入面既情況。大叔問

”見唔見到？”

”見到咩？”

我企前少少，終於比我見到啦，係一位老伯保安。
”有個呀伯係度lo”

”唔只咁簡單，你睇唔睇得出佢手上面渣住部咩，做緊啲咩？”





咁我就再望真啲，嗯...佢渣住部iPad。
”佢渣住部iPad”

”哩一樣唔係重點，最重要既係佢渣住部iPad做緊啲咩。

你見唔見到佢係度上緊咸網，係thisav，睇緊北川曈既其中一套戲，
果套戲我都曾經睇過，影片時間大概係49分34秒，我頭先見到佢果一段大概係44分到，
我地只要等多5分鐘，就可以入到去過大堂，而佢仲要發現唔到我地。”





大叔哩一番話實在係語出驚人，小弟自問睇AV都有一段時間，雖然及不上高登果啲咩JJ狗，西九陳Sir，
但都算係稱得上係專家級。而哩位大叔居然可以咁勁，
連咁遠都睇到個女優係邊個，知道時間幾耐，段片既位置去到邊。
果然，大叔係一位老江湖。但係，我有一樣野唔明，

”咁點解5分鐘後入去大堂佢會發現唔到我地？”

”你個問題問得好好，我做左一個好大膽既假設。
我相信個呀伯會係段片完結時既5分鐘之內完事。你睇吓，佢隻右手已經開始不斷擺動，
5分鐘後佢就會進入聖人模式。由於呀伯年時已高，相信佢係咁激烈既運動之下而影響心跳率，




心跳快，血壓自然會提高。如果血壓突然從160毫米跳至240毫米以上，則可能引起劇烈頭痛，噁心，視覺障礙等。
而我地，就係要趁佢係高血壓同聖人模式既影響之下入去大堂，咁佢就發現唔到我地。”

既然大叔講到咁有把握，我就惟有相信佢，更何況，係哩一係，我只有大叔可以相信。
就係咁樣，我地就等咗5分鐘啦。突然，老伯傳來一聲

”呀～～～～～～～～～～～”

大叔指住大堂，講左句
”係時候啦，入去！”

大叔輕輕力推開度門，
我跟住佢跑咗去大堂果邊，係哩一度，保安佢見唔到我地。
然後，我地去咗走火通道樓梯度。






係走火通道哩度，就意味住我地即將進行尋找他毛的故事。
我地唔知佢地係幾樓，所以，我地會check每一層樓。
但係，即使係搵到藍毛毛佢地，我地都唔知點算，我地唔夠佢打，唔夠佢快，
唔得啦，愈諗愈驚。

大叔佢坐係樓梯級到，打開佢既背囊，拎左部對講機比我，同埋一枝槍。
槍？咩槍？真係真既手槍！唔係柯震東打果啲！我拎住枝槍，連手都震埋，
大叔同我講，

”細路，冷靜啲，記住，槍可殺人，也可救人。”

我口都震埋同佢講
”大...大...大叔，你究...究竟係邊個，你...你...你係啲咩人？”





大叔，係佢褲袋到拎左枝雪卡出黎，點著佢，吸一啖，吐出一股氣，佢望住啲煙，佢慢慢咁講
”一切往事已化作為煙，隨風飄散，如今，大叔我只係一個黎自MIT既地盤佬。”


大叔指住佢隻手錶，好嚴肅咁話，

”而家係十一點半，一個鐘頭後返黎哩度，我地各自咁搵佢地。
我會係最高果層掃落黎，而你就係最低果層掃返上黎，只要我地搵到藍毛毛佢地或被捉走既人，
就係對講機果度講：從前，有隻大笨象，佢係河邊吸水。但係，我唔知你係第幾層，所以，
你要講有幾多隻大笨象係河邊吸水，你明唔明？”

”應該明，除非唔明。”

”好，記住，今次行動既大前題係避免接觸藍毛毛佢地，所以，絕對唔可以比佢地發現。”





嘩，而家我個感覺就好似做緊特務咁，未出發先興奮，興奮得黎又少少緊張，緊張得黎又少少驚。
有睇過特務果啲電影都知道每次行動都會有代號，例如好似寒戰、ARGO咁，於是我就提議啦，

”不如起返個行動代號，等我地有啲士氣。”

大叔低頭沉思左一陣，就話
”少年與大叔的奇幻漂流”

”唔得，太老套。不如就叫，怪獸公司2之媽咪麵雄霸天下。"

”唔得，太9唔搭8，我地不如叫盜毛迷城。”

”都係唔好，算啦，簡單啲，我地就叫做突特得 得特特啦！”

就係咁，突特得 得特特既行動正式開始。