無啦啦有兩條女同左我一齊住: 39
39
老母呢句說話,令在場本應喜氣洋洋既氣氛變得尷尬
「咩話,阿池同兩條女住?」
「唔係掛....該煨囉」
眾人七嘴八舌討論
「老母...點解你...」
老母走到我身邊:「好想我唔返黎咩?」
「你之前明明話過....我可以自己揀架....點解依家又反口呀?」
「我頭先行入黎果陣聽到哂啦,你大舅父好心介紹女仔比你識,你竟然咁樣落佢面?」
「我原本只係比你用呢三個月去同果兩條女住,等你可以學識獨立下,同女仔相處」
「不過估唔到你....竟然會鐘意哂佢地兩個,仲要為左佢地咁樣落大舅父同carol面?!」
唔通揀carol都唔揀阿白智詩咩?老母你醒下啦
「何況姑丈個仔matthew 30號就會返黎,咁唔通因為你地三個就要matthew出去住酒店咩?」
吓?!!!!!!
「咩..咩話?佢地唔係..移左民咩?」
「matthew佢前幾日打比我,話總公司黎緊會調佢返黎」
我個心當堂沉一沉
「咁..咁我真係...鐘意佢地喎..」
「所以呢?咁就要揀哂佢兩個呀?你唔駛結婚生仔架?定係你想玩3p呀?」
全場人即刻好似tvb劇咁「嘩!!!!!!!!!!!!」
「你up乜鳩呀老母?!我同阿白智詩唔係你所講咁架!」
mari表姐拉住我:「阿池呀,你冷靜d先啦....姨媽,阿池同阿白智詩三個真係唔係你咁諗架..佢地..」
其中一個舅父又好似驚仲未夠多花生咁:「咩話?mari你一早就知阿池佢亂搞呢d野?」
我一怒之下,指住個舅父:「屌你你講乜撚野呀?亂搞d咩呀?!」
啪!
老母.....摑左我一巴,係我人生,第一次比人掌摑
「江天池!你發乜癲呀?!!舅父你都鬧?!」
「屌你!係你比我同阿白智詩一齊住..依家又話我有錯,神又係你鬼又係你,你玩撚哂啦!」
「江天池你收聲!!我就係唔想你....」
「啊!原來你咁樣都係因為老豆單野!不過我知自己...係唔會好似老豆辜負其中一個女仔呀!」
你地或者唔知,其實呢件事我都係響老豆老母離婚之後先聽老母講過一次...
老豆果陣除左有老母呢個女朋友之外,仲有個紅顏知己
不過果陣老母已經有左我,所以老豆唯有焗住同老母結婚
而個紅顏知己知道之後好傷心,求其搵左個人嫁
但係後來老豆發現,自己係鐘意果個紅顏知己
所以響我三歲果陣,佢覺得太內疚就同我老母離左婚
件事實在太似tvb劇情,不過呢個係真事黎
提到老豆,老母頓時質一質:「江天池,你..你唔好再講你果個老豆啦吓..」
「咩呀...老母你根本就係對我冇信心,驚我好似老豆咁做錯事姐,我會證明比你睇,我同阿白智詩以後一樣可以好似依家咁簡簡單單咁生活!」
「我唔理!我只會比果兩條女住到去12月1號,完左租約佢地一定要走!!如果唔係就唯有....」
12月1號,正正係我既生日
「我係唔會比佢地走架!!」
一講完呢句,我就一把火拎埋背囊走出酒樓
mari表姐拉住我:「阿池呀...」
「唔駛理我!」
呢次係我第一次響咁多親戚面前發脾氣,仲要係發咁大脾氣
我真係唔明,點解老母仲掛住老豆以前件事
老老實實,上次同老母傾過電話,佢都好似冇乜野咁
點解今次就好似食左火藥咁?
當初又要我同兩條女住,依家又話唔可以
咁我咪即係比你玩鳩緊?
真係諗唔明...做乜要咁執著姐?
我響酒樓冇乜食過野就走,所以我返到元朗都求其食左個吉野家先返去
一番到屋企既時候,更令我驚訝既畫面就響我面前出現
阿白同智詩,坐左響梳化,眼紅紅咁,好似岩岩喊完黎
「喂..你地..做咩呀?」
智詩平復心情,先開聲:「阿池...」
「頭先..mari表姐打過黎..」
我覺得奇怪:「吓..點解mari表姐有你..」
「上次佢黎果陣我比左我個電話number佢....」
「佢話,頭先你響大舅父生日果度,因為我同阿白既事,而同你阿媽炒大獲...」
「喂..唔關你地事喎,係我老母佢玩鳩我之嘛,佢又要我同你地一齊住,但係又唔比我...」
「mari表姐佢仲話,你阿媽話你姑丈個仔黎緊會返黎香港,要我同阿白...12月1號搬走...」
一聽到呢度,我真係呆撚左
「屌,唔駛理我老母架!我地三個以後繼續一齊住,睇佢可以點囉!」
「但係...我同阿白都唔想阿池你..因為我地而同屋企人反面呀!」
「屌!唔撚緊要啦,最緊要係同你地一齊住姐」
智詩:「何況...果份租約真係寫明3個月限期.......其他野都唔重要呀」
「....」去到呢度,我真係答唔到落去
阿白眼紅紅咁:「阿池呀...」
「其實..我同智詩都好想...同你繼續生活架...不過...我真係唔想你為左我地而同你屋企人搞成咁呀」
「阿白你唔駛講啦,我係唔會比你地兩個走呀」
智詩:「其實..點解,阿池你阿媽會突然之間咁既...之前又會要你同我地一齊住,依家又會咁既?」
我將我老豆以前既事講比佢地兩個聽
智詩:「咁你阿媽都幾狗架喎,咁即係特登裝你彈弓姐...」
「不過我都明既...你老豆又曾經....」
「佢根本就係打橫黎!」
阿白:「其實...auntie..都..都係驚你會第時後悔姐...」
我摸住阿白同智詩既手:「我點會後悔呀....放心啦,我唔會比你地兩個離開呢間屋架」
今晚所發生既事實在太多
老母返黎,兼且仲話阿白同智詩一定要12月1號搬走
雖然我口口聲聲話唔會比佢地走,不過我有預感
佢地最後都會離開我
之後既成個禮拜,我同阿白,智詩都係同平時一樣咁生活
彷佛就好似忘記左12月1號既事
直到,星期日
朝早十點
我同阿白智詩食緊早餐既時候
叮噹!
有人禁鐘
阿白:「咦,咁早就有人禁門鐘既?係邊個呢?」
「我出去開門丫..」
一行出去就見到
係我老母
我d火即刻上黎:「老母你仲黎做咩呀?!」
「阿池,我今日係黎搵白小姐同游小姐架」
阿白同智詩走出黎:「阿池...做咩呀」
「咦,係...係江太你呀...」
老母同佢地打過招呼之後:「我今日黎,係想同白小姐同游小姐你兩個講呢..你地既租約,我係唔會續既」
「不過我今日係黎睇下,你地三個有冇搞到間屋亂七八嘈,如果唔係matthew投訴既話...」
老母講完呢句就想行入去間屋
我阻住佢:「入乜撚呀,呢一刻呢度都仲係我地三個既屋企呀! 」
「我都唔明,我係你個仔黎架!你幫果個matthew都唔幫我?」
「你根本就係驚我好似老豆咁!」
阿白拉住我:「阿池呀算啦,a...auntie都係跟規矩姐」
老母冇理到我,擅自走入間屋
無幾耐,老母出返黎
「嗯...間屋都冇問題...」
「嗱,你地三個12月1號果日就要搬走,仲要放低哂d鎖匙..阿池,你舊屋企條鎖匙響呢度」老母遞上一條鎖匙
我一手掉落地下:「老母!呢個先係我屋企呀!」
「你咪唔好搬走囉,睇下到時會點」
「咁你果陣就唔好要我搬過黎啦!!!」講到呢度,我都忍唔住眼濕濕
「我果陣係為左想你獨立先借佢地兩個過橋之嘛...」
講完呢句,老母就離開..
智詩拍拍我:「阿池呀...睇黎,我地三個... 」
我望住老母既背影,我知道....
今次真係冇得再呃自己
12月1號之後,我同阿白智詩,真係冇得再響呢間屋一齊住
可以點呢...我一定要諗辦法.....