你被app選中了嗎？: 第4章 自我介紹
第4章
“我哋去考場後邊傾啦。雖然唔想係度畀佢哋煩，但是始終呢度是陣地，可以監察到出面既情況。”VT對所有app owner講。
乜料啊，一黎就指生曬。當自己係leader啊！天矢心諗。
不過，VT既建議都幾好，大家都跟住佢去後面。不少考生都望住呢堆怪人，有啲露出睇白痴嘅眼神，有啲分明係開始動搖。
“唔使理佢哋，你地繼續考試。”搞唔掂呢堆人，miss只好叫其他人繼續考試。
只係呢個時候，又有七八個考生向天矢佢哋走去。令考試場的氣氛越變得緊張和鬼異。
“重新介紹，我叫做杜鵬飛。你哋可以叫我阿飛。Whatsapp owner. 我哋而家不如先了解下各自嘅app和能力先。到時候合作起黎都容易啲。”杜鵬飛介紹自己。
“到我，我叫做VT. clean master owner. 能力有兩種。能力1：可以抹去人/物某部份存在感。能力2：Booster，可以加快腦部思考及運算速度3倍。”VT簡略咁講。
天矢聽到一舊舊，佢根本唔知道app嘅能力。天矢望咗望Ally, 見Ally完全無露出驚訝嘅樣。睇黎佢係知道啲野。唔通佢啱啱就係想同我講呢件事！？
“叫我alan, 我嘅app係openrice. 能力係有區域限制嘅。我要搜索附近嘅食市。按食肆嘅評分黎選擇。正評有十分，攞到嘅食物可以解毒。達二十分，食物可以驅除不良狀態。達三十分，食物可以治癒傷勢。相反，負評嘅話，睇分數而定，會肚痾。勁既話是劇毒。哈哈，啱啱攞到呢個app, 想免費食野嘛，點知揀咗間負評十分嘅，痾咗我成日。不過都好彩，我當時無揀到明將。”Alan拍拍心胸話。
“好了，下一個！”VT打斷咗Alan嘅說話，望向一個戴眼鏡，米五，六倒嘅男仔。
“我叫做小肥，是布卡嘅owner. 能力係用50%電量召喚動漫人物入面嘅武器。持續10分鐘。要發出武器招式需要再耗電量。你都唔知我幾慘，差啲畀布卡玩死。王道漫畫落曬架。好彩我一早down咗黎收藏姐。唔係既話得番啲少女漫，BL,到時真係要替月亮黎懲罰你。”小肥講。
“我叫做hugo, sketchbookx owner.
能力1:封鎖目標能力5分鐘，但要用筆係目標身上畫一個X，每次耗電55%
能力2:複製一件物品(除左任何電子用品)，小型(筆，文具，眼鏡，食物，刀)一次10%,大型(家具，車)一次30%. ”hugo望咗下各位，講。
跟住，大家把目光投向天矢。天矢成舊雲咁望住大家。能力？耗電量？佢識條鐵咩！
“都係我先講啦。”Ally幫天矢解圍，“我既能力是美圖秀秀。能力是改變身體構造。我係啱啱先發現app係真係有超能力嘅。對app嘅研究唔深！天矢都係…”
“唉，你兩個畀部手機我睇下。阿飛，你同佢哋解釋一下。”VT嘆咗口氣，用命令嘅語氣講。
天矢心中當然唔服啦，VT嘅態度差到爆。但是一諗到app可能有超能力，佢唯有乖乖交出手機。
阿飛被VT命令反而無乜野，佢友善咁同Ally和天矢講：“app能力有兩個基本條件，發動電量和持續電量。呢兩個好關鍵。控制得好嘅話，app能力就能發揮到最大限度。仲有其他發動條件就因app而異啦。總之，你哋要快啲知道自己嘅能力同耗電量。仲有就係後備電池！”
“後備電池？”天矢問。
“係，要長時間使用能力嘅話，電量太緊要啦。好似我咁，一知道個app既用途, 我就戴多個尿袋。仲諗住用whatsapp嘅能力感知嗰朋友嘅答案來作弊。點知遇到呢獲野。”阿飛灰心道。
作弊？噢！天矢恍然大悟，佢望向VT.唔使諗，VT早就開咗clean master黎作弊。而家肯定用緊能力黎提升運算速度。用黎分析我和Ally部手機。車，咁寸嘴，仲以為有乜咁勁。
VT突然抬頭，佢向天矢抛出佢部手機。嚇得天矢慌亂咁接住。對Ally都係咁嘅態度。
天矢火都黎埋，佢大聲同VT講：“喂，小心我部note 2啊！”
VT失望咁話：“車，你兩個嗰app都係無咩用嘅。根本幫唔到手！”
“你話咩話！無用！你睇清楚未啊！clean master可以增加你腦既運算速度姐，如果你係智障呢。又咪無用！”天矢話。
“你話我無腦！”VT啤咗天矢一眼，但是下一秒，佢就嘆咗口氣，話：“唉，唔同你呢啲連自己app是咩能力都唔知嘅人一般見識。”
氣氛頓時搞到好僵，最後都係阿飛做和事佬。“VT唔好咁啦，大家一陣都要合作架。力量越多梗係越好啦。”
VT沒好氣咁話：“你…電池，應該係同叉電有關。去試試幫其他手機叉電。你應該是輔助型。你，Ally, 美圖秀秀。我試個你個app, 可以拆開攝入鏡既人物嘅身體部分。正確黎講是生物。應該可以將動物既身體key落自己度，強化身體，屬於攻擊型。但是你既圖庫入面只有兩個阿嬸，一件猪排。有乜春用。”
“下，我…我能力只是幫人叉電….....”天矢O咗嘴。