突然做左人地老豆，多左個女: 40
最後，我地每一個人都返去所謂既正常生活到，我又重新拖住小貞返幼稚園啦。
返到幼稚園，我最擔心既事又係見到Miss Cheung，佢whatsapp嗰句「去黎無用」依然深深咁印係我腦海之中。啲人話，經過今次件事，有好多親朋戚友既關係都破裂左，但我無諗過，破裂既會係我同Miss Cheung既關係，係我心入面，對於Miss Cheung呢個人，又多左條刺係到。
不過，醜婦終須見家翁，有啲野你愈係唔想見，佢就愈係會出現係你面前。
「小貞、小貞爸爸！」Miss Cheung道。
佢依舊都係嗰個笑到見到兩顆虎牙既樣，好似所有野都從來無發生過咁。
「Miss Cheung！」小貞好禮貌地道。
「近呢幾日都唔見你接小貞，都係伯母代勞，你有事忙緊？」Miss Cheung問。
「係呀，我去左佔領。」我故意咁講。
「哦……我啱先都見到瑜仔既姐姐，佢又係幾日都無黎接瑜仔，我又係問佢係咪有咩事忙緊，佢又係答我去左佔領……」Miss Cheung略有所思咁講。
「係呀，雖然我地唔係一齊去，但有撞到對方。」
「係呀……」講完之後，Miss Cheung垂低頭沉默左一陣。
「呀！！！！！！！！！！！！」係呢個時候，我又聽小海既咆哮聲。
小貞即刻拖住我走去小海到，只見小海竟然係到喊緊。
小貞捉住小海隻手仔溫柔地問：「小海，你做咩事喊呀？」
「嗚……」小海喊到都講唔到野，淨係指住自己個書包。
小貞一望，就話：「小海你唔記得帶畫筆呀？」
小海點點頭回應。
Miss Cheung都走左過黎，話：「唔緊要啦小海，等陣上美勞堂嗰時，你可以問小貞借架嘛。」
然後小貞好可愛咁摸摸小海個頭仔話：「我一定會借俾你架小海！」
小海雖然點點頭，但都係繼續喊緊。
我望下四周圍，再問小海：「小海，點解唔見你個工人姐姐既？」
「呢幾日佢個工人都病左，小海媽媽就每日揸車送小海到幼稚園門口，然後又好快咁走左。」Miss Cheung代答。
「我已經好多日帶漏野啦……」小海喊住講。
我諗，係因為小海無左個印傭係佢身邊照顧佢，而佢既老豆老母又忙於工作，所以搞到小貞呢幾日都甩甩漏漏咁。
雖然呢一刻我好想恥笑佢，但見佢喊到眼都腫哂咁，我又唔忍心啦。
「小海，咁你個工人姐姐而家係邊？」我問。
「Ju……Julia話唔想傳染俾我……去左朋友到住……」小海答。
呢個印傭真係唔話得，就算自己病左，都係擔心緊會傳染俾大小姐。
我摸摸小海個頭話：「咁啦小海，放左學之後，我同你一齊去探Julia好無？」
小海用力咁點點頭，睇黎佢終於都知道個印傭對佢黎講係幾咁重要啦。
「不過咁喎小海，你要通知聲你老豆老母先喎。」我續道。
小海點點頭，然後係個書包到拎左部手機出黎，打俾佢老母。
真係屌你老母，而家連一個幼稚園生都有自己既手機啦。
「媽媽話ok！」小海笑住講。
小貞見到小海笑返，佢開心到攬住小海。
當小海同小貞手拉手咁入到幼稚園，Miss Cheung又走過黎同我講：「呢幾日，送瑜仔返黎既係佢家姐既男朋友。」
「咁又點？」
「無，只係想提醒你，人地有男朋友啫。」
「我知道。」講完之後，我就輕輕的走了。
我唔明白，Miss Cheung咁同我講有咩意思，但係佢咁既舉動，只會令我更加唔鐘意佢。
好快咁，又到左放學時間，今次我要接兩個細路放學，左邊拖住小貞，右邊拖住小海。
「小海，你知道Julia朋友個屋企係邊？」我問。
小海點點頭話：「Julia帶過我去，係呢到附近。」
最後，小海帶左我地去一棟略舊既唐樓到，行左三層樓梯，終於到左小海所講既目的地，只見裡面劏左唔多間房，因為唐樓啲單位都比較大，所以呢到都劏左成五個單位，不過比較特別既係，每個單位都唔係閂住門，而係打開門，每個單位門口都有個南亞裔既男人企左係到互相吹水。
班南亞裔男人見到我一個麻甩佬拖住兩個細路，都好好奇咁望住我，然後講埋啲我聽唔明既話。
小貞見到佢地個個都神高神大咁，佢有啲驚，就縮係我身後。
其中有個比較黑既南亞裔走左過黎，同小海講：「搵Julia？」
咦喂！識講廣東話架喎！
小海一啲都唔驚咁點點頭，似乎係互相識得，應該係Julia帶小海黎既時候彼此介紹過。
然後個男人上下咁打量我，好老實講，我未試過同南亞裔人交流過，唔多唔少我都有啲咁多淆底。
個男人見我迴避佢既眼神，佢就笑笑話：「老友，我地唔會食左你。」
哇屌！乜啲南亞裔人咁撚幽默既？
佢見我無回應，佢就繼續講：「行啦，帶你地去見Julia。」
雖然小海同佢地好似好熟咁，但係我真係淆淆地，連小貞都係縮係我身後，最後反而係小海拖住我地行。
我地入到去其中一個單位到，裡面設備好簡陋，有個好細既廁所，無廚房，有張上下格床，而Julia就訓左係下格床到休息緊，佢身邊坐住左個菲律賓女人。
「小海！」Julia一見到小海，佢就喜出望外咁講。
小海見到Julia，即刻衝過去攬住佢，不過Julia輕輕推開左小海，話自己未病好，唔想傳染俾佢。
只見小海又喊住咁擰擰頭。
原本坐係Julia身邊個菲律賓女人見到咁既情況，佢就好識做咁行開左。
好啦，識講廣東話就易溝通啦。
「小海好掛住你。」我道。
Julia笑笑，就對住小海講：「多謝你呀小海。」
小海又只係喊住咁擰擰頭。
「小海，你以後要對Julia好啲，唔好咁惡啦。」我最終都係忍唔住要潤下佢。
小海啤一啤我，又攬住左Julia。
之後，小海同小貞兩個細路就坐埋一邊玩，我就同Julia吹水啦，第一次同個印傭吹水，唔多唔少都係緊張既。
「小海好似好熟呢到咁，你成日帶佢黎呢到？」我問。
Julia點點頭道：「小海有時唔想返屋企，話屋企無人好悶，我就會帶佢黎呢到探下我啲朋友。」
我望下四周圍啲南亞裔人……嗯……朋友……
Julia笑笑講：「你唔好睇佢地咁樣，佢地都好好人架，係有時口花花咁啫。」
「其實你對小海真係好好。」
「小海係我由細湊到大既，我地好深感情架。」
「但係佢成日都鬧到你喊。」
「唔係，係我真係做得唔夠好，其實小海唔係真係咁惡架，佢好乖好好。」
小海好乖？我真係唔信啦。
Julia見我一臉疑惑，佢就笑住咁繼續講：「佢成日話炒我炒我，但無一次係真既，有次我媽媽係鄉下到病得好緊要，需要筆錢去醫病，我一時心急，靜雞雞咁係小海屋企偷左啲錢，小海見到架，不過佢無出聲，到後來阿mum發現左，佢想炒我架，不過小海就幫我求情，最後仲叫阿mum俾多啲錢俾我，當係勤工獎喎。」
諗唔到小海都會有呢一面。
「但係小海無左你真係唔得，佢呢幾日都係甩甩漏漏咁。」
「係呀，小海佢成日都好大意，但佢真係一個好人黎架。」
「係你寵到佢壞哂啦，K3仲唔識自己執好啲書包。」
Julia笑笑道：「可能係啦，但我真係好愛小海架。」
我望住同小貞玩得好開心既小海，忽然感慨，係呢個年代，啲細路身邊最親密既，並唔係自己既老豆老母，反而係一個一直照顧住佢既印傭。