因為佔領既事令到我忽然覺得時間好似好快就過左去咁,明明夏天仲係好炎熱,但不知不覺得已經感受到冬天既到來,寒風刺骨,個個都著哂羽絨、戴哂頸巾同冷帽。 

今晚係平安夜,同時亦係我既生日。 

生日係平安夜有乜好處?咪就係成班兄弟會掛住媾女而唔會同你慶祝生日囉! 

小貞著左條紅黑色格仔吊帶連身裙,內裡就著左條長袖有喱士花邊既衫,相信係老母早幾日帶小貞去行街時買既。 

小貞跳下跳下咁走左過黎,蘋果腮紅噹噹咁,個感覺就好似聖誕老人隻鹿咁,好鬼得意。 



「傑哥哥!」小貞用住比卡超聲線講,而且笑到見牙唔見眼咁,似乎心情好好。 

「做乜呀小貞?」我笑笑回應。 

然後小貞用兩雙小手捉住我隻手,扭下個身咁話:「你跟我黎啦!」 

小貞拖住我入到房,之後將我放係房到,叫我唔好出黎住,跟手就閂左房門。 

「傑哥哥要乖乖係到等我呀!」臨走之前佢仲要咁樣提醒我。 



究竟小貞想做啲乜呢? 

過左無耐,小貞終於開返房門,不過佢就熄哂成間屋既燈,佢手上捧住左個蛋糕,蛋糕上插左支長長既蠟燭,零星既火點閃閃發光咁,而老母就伴住係小貞既後面。 

「Happy birthday to you, 
Happy birthday to you, 
Happy birthday to 傑哥哥, 
Happy birthday to you」 

小貞甜甜咁笑住,對住我唱呢首歌,我即刻好似食左棉花糖一樣咁冧,感動到都唔知講乜好。 



「個蛋糕係小貞同我一齊整架,小貞話想俾驚喜俾傑哥哥!」老母笑笑道。 

我好開心,亦有啲哽咽咁同小貞講:「多謝你呀小貞!」 

「唔洗客氣!傑哥哥快啲許願同吹蠟燭啦!」小貞興奮道。 

「好啦!」 

然後我合埋雙眼同雙手,心裡面諗住,呢個係小貞陪住我過既第一個生日,小貞為左我特登整左個生日蛋糕,呢種心思,就好似初戀你女朋友好俾心機咁為你織既第一條頸巾一樣美好、一樣甜蜜,人地話女係老豆既前世情人,呢句說話真係講得無錯。 

許完願之後,我張開眼晴,小貞就好興奮咁問:「傑哥哥許左個咩願呀?」 

老母就摸摸小貞個頭仔話:「傻妹,願望講左出黎就唔會實現架啦。」 



小貞頭側側咁問:「點解呀?」 

我吹熄左啲蠟燭,然後話:「好啦,小貞你捧住個蛋糕都好攰架啦,快啲開返燈我地一齊食蛋糕啦!」 

「好呀!」小貞張個蛋糕俾左我,然後又跳下跳下咁去左開燈。

我張個蛋糕放係餐枱到,而老母就去左拎餐具,仔細一睇,原來個蛋糕係藍梅芝士凍餅黎,消化餅做餅底,芝士係中間,藍梅同藍梅醬就埔滿左係面頭嗰層,仲有兩粒大大粒既士多啤梨做襯托,中間仲有個鵝蛋形既牌寫住「傑哥哥生日快樂!」,係個尾到仲畫左個心形添。 

我凝視住一個咁靚既蛋糕,想像到小貞點樣用兩隻小手吃力咁打蛋同打忌廉,然後又點樣小心翼翼咁將打起左啲芝士同忌廉倒落個餅底到,再充滿耐性咁等待個凍餅係雪櫃到凝結,跟住用充滿期待既眼神將個凍餅由雪櫃到返拎出黎,好俾心機咁係凍餅既面頭埔上藍梅醬,間中佢可能會忍唔住口偷食左兩粒藍梅,然後佢俾老母發現左,佢就甜甜咁笑一笑,最後,佢係塊鵝蛋形既牌到好小心咁寫上「傑哥哥生日快樂!」呢幾隻字,仲要加埋個心,大功造成就對住我老母笑眯眯咁,相當甜蜜。 

「傑哥哥!」小貞開哂燈之後又走左過黎。 

我攬住小貞坐上我大脾到話:「小貞,好多謝你!」 

小貞甜甜咁笑一笑,「傑哥哥你講左第二次啦!」 



然後我哄埋小貞個肚仔到講:「講幾多次都唔會厭!」搞到小貞又痕到格格聲咁笑。 

老母拎左啲餐具出黎,「好啦,快啲切蛋糕食啦。」 

我同小貞就一齊拎住把刀切左個蛋糕,老母就係另一邊幫我地影相。 

「對唔住呀小貞,你生日我都無咁樣整個蛋糕俾你。」我忽然內疚道。 

小貞擰擰頭回應:「唔緊要架傑哥哥!有傑哥哥係我身邊,小貞已經好開心!」 

然後我又忍唔住哄埋去小貞個肚仔到,又搞到佢哭笑不得。 

老母幫我地分左件蛋糕,小貞同我就你一啖我一啖咁互相餵大家,餵到咁上下,有啲藍梅醬痴左係小貞個鼻哥到,我就哄埋去舐走啲藍梅醬,小貞又笑到格格聲咁,然後忽然就錫左我個咀一啖話:「我最鐘意傑哥哥!」 



嗚哇!!!我就黎有糖尿病啦!!!!! 

食完野執完哂啲碗碟之後,老母拎左個中size既聖誕樹出黎,話係今日同小貞去買整蛋糕材料時見到順便買埋既。 

然後小貞就拎左一袋裝飾物出黎話:「傑哥哥!我地一齊佈置聖誕樹啦!」 

最後老母、小貞同我三個人就合力咁將啲天使公仔、波波球同埋唔同顏色既花紙掛係棵聖誕樹到。 

我拎左條五顏六色既間條紋聖誕襪俾小貞,「小貞,你將條聖誕襪掛係棵聖誕樹到,今晚聖誕老人就會偷偷地走入黎將小貞份聖誕禮物放係條襪到,小貞第日起身就會有聖誕禮物收架啦!」 

小貞笑笑咁接過條聖誕襪,然後眼仔碌碌咁問:「點解聖誕老人要送禮物俾小貞既?」 

「因為小貞乖,聖誕老人淨係送禮物俾乖既細路架咋。」 

「咁點解佢要偷偷地送既?」 



「因為佢想俾驚喜俾小貞囉。」 

雖然有人話過,到左「每事問」年紀既細路真係好煩,但係我一啲都唔覺得小貞好煩,反而覺得呢種溝通同交流真係好窩心。 

到左最後,小貞想掛粒大星星係聖誕樹樹頂,但係佢唔夠高,於是我抱起左佢,將佢放係我個膊頭到,小貞就腳仔fing fing咁掛左粒大星星,然後好開心係到格格聲笑。 

「係喎!差啲唔記得我買左件聖誕老人衫俾小貞!」老母道。 

哇老母,你不單止搞咁多野,仲要同小貞玩埋cosplay,你小心玩壞小貞呀。 

老母唔理我既眼神控訴,拖住小貞走左入房。 

無幾耐,小貞同老母又出返黎,只見小貞換左套聖誕老人既裝束,白色既毛毛球襯托住紅色既衣裳,仲戴住一頂聖誕帽,呢個咁得意咁趣緻既,就係我個女──小貞。 

小貞,你知道我既生日願係咩嗎? 

就係希望你可以快高長大、健康快樂咁成長! 

「登登登」 

Whatsapp響起,係Miss Cheung。

「Merry Christmas!?」 
「未到聖誕喎?」認真,我唔係有心打擊佢。 
「講定先啫?平安夜有咩搞呀?」 
「同小貞過生日」 
「小貞生日唔係10月咩??」 
「我生日?」 
「哇!平安夜生日!你係咪耶穌黎架???」 
「唔好笑」 
「sor?」 
「你等陣得唔得閒??」Miss Cheung繼續send。 
「做咩?」 
「我有份禮物想俾你??」 
「唔洗咁客氣啦」 
「唔係呀, 想多謝你無係校長面前爆我d事出黎??」 
「出黎啦, 唔出我會內疚?」佢續道。 
「好啦, 咁係邊到等?」 
「幼稚園附近個公園啦, 不見不散?」 

雖然唔知佢到底想做乜,但最後我都係將小貞交左俾老母,我自己出一出去咁。 

去到公園,就見到Miss Cheung係到等緊我,佢著左條深藍色連身裙,上身有件白色既毛毛斗篷,佢化左妝,睇起黎好有女人味。 

「小貞爸爸!」佢揮揮手道。 

「Hi.」 

然後,佢將佢手上袋紙袋雙手遞左俾我,我一望,裡面係條深藍色既冷頸巾,我好愕然咁望住佢。 

佢見我望住佢,佢就紅都面哂咁講:「係聖誕同生日禮物黎,祝你生日快樂。」 

「多謝你……」 

「咁你生日有無約人呀?」Miss Cheung問。 

「無呀,我想同小貞一齊過。」 

「好啦,咁唔阻你地啦,拜拜。」佢笑笑道。 

我捉住佢隻手,衷心咁講多次:「多謝你。」 

然後佢笑得好甜咁,「唔洗客氣。」
已有 0 人追稿