於是我就望住呀雪既上線時間兩個幾鍾,直至1點,我先訓得著。 

其實訓地下真係幾辛苦,雖然係好涼,但係成身都痛痛地~ 

------------ 

「喂冬仔起身喇唔洗番學咩。」呀媽叫醒左我。 

「啊…?」我覺得全身都好熱,仲頭暈暈咁。 



「呀冬你係咪唔舒服呀?」呀汶一早已經著好曬校服,真係好有氣質啊… 

「啊……?」其實我都好想講聲女神早晨,不過我諗我已經感冒到鳩都戇埋。 

「又真係有燒喎~」呀媽摸摸我個頭。 

「啊………?」唉我都好想講句有意義既對白呀。 

「呀仔睇黎今日都番唔到,汶汶呀,可唔可以幫佢請一請假呀?」呀媽轉頭同呀汶講。 



呀媽其實妳知唔知請假,妳打個電話去就得架喇? 

「緊係得啦auntie,咁我行先喇喎,呀冬你休息多D呀。」女神就咁走左。 

唉,我仲有功課要抄架,點可以病架? 

於是呀媽就的左我去睇醫生,跟住佢就番左工。 

而我訓到著唔多下午三點,見好D就起身打機喇。 



打打下就聽到門鍾聲喇~ 

「呀冬,你好番D未呢?」係又pure又true既汶女神。 

「食完藥訓左覺好番好多喇!」 

「咁你肚唔肚餓呀?」 

問我肚唔肚餓?!想煮野比我?!我即刻望住部死人手機,唔會有任務掛? 

「少少咁啦哈哈。」 

「我買左碗粥呀,食啦。」哇我真係如釋重負。

--------------------------------------------------------------------------------



食完之後我緊係繼續打機啦,岩岩sleeping dogs捉左個女人番屋企都未同佢玩。 

「呀冬你玩緊咩game呀。」睇黎呀汶對好多野都好有興趣咁喎。 

「無呀我玩個遊戲,係講主角係一隻成日訓教既狗,唔小心變左做人,咁就周圍去幫人囉。」 

呢獲真係攔路雨偏似雪花,9up的你凍嗎。 

「哦原來係咁…」 

「係呢呀汶妳有無打過機呀?」 

「下…我好少玩呢D架~」女神果然係唔會比呢D凡夫俗子既野吸引。 



「不如我拎部wii出黎一齊玩丫!」

於是我地就開始左玩wii既網球game,而呀汶簡直一理通馬國明,一教就識玩。 

「向左,上呀上呀,遙控向下,係喇係喇。」 

「呀冬你咁勁架!」緊係啦,肥仔做運動先係高手呀。 

「我網球王子黎架。」網球胖子就有份…… 

「哈~你一講完就失左分啦!」 

「哼~~我呢個大師又點會同妳呢個新手認真比劃?」 

(其實我已經盡全力) 



就係呢個時候我打出左個完美既角球,我敢肯定就算跑得快過小明都唔會接到! 

「哇!」呀汶為左接我呢個波,成個人左撞埋黎我度。 

屌妳正呀喂! 

今次佢真係驚慌到失足向前,然後撲入我一雙肩。 

我幾想大聲唱:再給我兩分鐘~~~~ 

女神既身體十分之咁柔軟,而我既身體十分之咁堅硬。 

可以話係天做地設既一對。 



我簡直想好似大文豪咁唉一聲黎抒發我既感恩。 

多謝部wii……… 

「有無事呀~~」 

「無事呀冬,原來wii咁好玩架?」呀汶完全無當岩岩住身體接觸係一回事。 

「都幾正架,不過要多人玩先得囉~」 

「咁我地以後咪可以成日玩囉!」女神今次既笑容,係我幾日以來睇過笑得最開心既。 

呢個先係我要多謝部wii既原因。
已有 0 人追稿