『假人真事』我的宅男脫毒日記: 9.九月十一日

九月十一日    狂風暴雨
 
今日好大雨，好彩學校完美連接地鐵站，我濕都冇濕過。唔知係咪天氣影響心情，今日行過學會攤位大家都冇黎神氣。
 
「我有事，走先。你咃要我做乜就E-mail 比我啦。」
 
石他講完一支箭咁走左。本來諗住落左堂大家一齊做Project，因為石他哥走左，我哋都冇乜心機，做兩做又開始玩。
 
我打開高登感情台，我一向都冇上開，但因為要脫毒，心諗知多啲人哋諗乜都冇壞姐。
 


一個一個題目係我眼前滾過。
 
「求救！點樣令自己脫離兵役。」
 
我心諗，服唔服役唔係自己揀嫁咩，唔通娘娘揸住支鎗迫你入伍咩！
 
「有冇巴絲覺得天蠍座好命苦？」
 
頂！我見到你個標題，浪費咗人生重要嘅幾秒我重命苦呀！
 


「秋天緣份計劃招生！巴絲齊來過暖意秋冬」
 
我慨嘆高登已經唔係毒男嘅天堂，如今只剩下一堆堆旺角男女叫春呻吟。我出返去吹水台，繼續瀏覽我感興趣嘅時事硬件帖。
 
「Hi，我張畢業証書有689個名。」
 
我諗起我今年畢業，特首任期未滿，我張證書會有六八九個大名。我覺得將會係我一生污點之一，決定入去留言一齊鬧。
 
「Hi，我真係生不逢時，689 個死人名要跟我一世。」
 


一位名為「豬扒都係肉」嘅巴打咁樣講。我留意到佢個名，於是我係個帖留下對特首嘅咀咒，然後乖乖咁返去感情台。
 
「豬扒都係肉，好過去自瀆。」
 
我內心浮現依句處世金句。
 
的確，我認為我對旺角男女有先入為主嘅壞慨念。我搵返「秋天緣份計劃招生！巴絲齊來過暖意秋冬」依個帖。作為一個講道理嘅大學生，應該要對旺角女孩有全面嘅認識後再批評同恥笑佢哋。
 
我細心咁閱讀計劃嘅規矩，原來相當簡單，只需要填上個人資料同自我介紹，等絲打巴打們選擇，如果相方同時選擇對方，你就可以得到佢嘅聯絡方法。
 
可能係希望顧及旺角男女嘅程度，如果太麻煩，佢哋就唔會參加。我估計活動主辦人相當熟識旺角男女嘅生態。
 
我依規矩寫上個人資料，主辦人話要過兩日先可以發放參加者名單比我地選擇配對。我八掛哋望下帖入面有咩留言，我發現有部分人已經傾得十分熟絡，但佢哋熟絡嘅原因，係因為男方身高超過一百八十厘米及擁有私樓。
 
而我，身高不及一百八十同居住係公屋，實在冇辨法同帖入面嘅旺角男女匹敵。我只好熄左個瀏覽器，默默咁寄望有清泉絲打會揀中我。