樓下有喪屍: Act 34 陰謀
「康師傅其實係我嘅線人，佢以前係警隊嘅高級教官，專門訓練飛虎隊依啲特別行動組。一直由我做記者開始到佢退左休都不時比料我，今次依件事，其實佢一早已經有調查。就喺早幾日前，佢聯絡我話有大單嘢，叫我即刻去搵佢，但係當時我有嘢喺香港依邊跟緊行唔開，到第二日我可以搵佢嘅時候，警察已經封晒路，唔比我地過海。」阿凝說
「唔怪得佢咁叻．．．．．．咁之後妳就一直喺依邊等？」我問
「之後我有聯絡過康師傅，話佢知我無辦法過去，於是佢就話佢會過嚟。點知轉頭就連依邊都有喪屍出沒．．．後嚟，最後一次同佢通話，佢話佢喺一間學校入面，好快就會坐直昇機嚟金融中心，叫我嚟搵佢。然後，喺我嚟嘅途中就遇到求撚奇佢地。」阿凝說
「．．．當時淨係得求撚奇同Brandy？」我問
Brandy說：「當時我地已經同呂晨一齊。碼頭度求撚奇救左我之後，我同佢無辦法之下唯有匿喺附近啲工廠，我地見個碼頭已經淪陷，仲諗你地都應該凶多吉少，點知第二日又比我地撞返呂晨。之後我地沿住海邊行左兩日，終於搵到隻快艇過嚟，然後就遇到阿凝。．．．其實頭先我一眼就睇得出你同呂晨之間有啲嘢發生左，講嚟聽下。」Brandy說著，華女也看著我
「．．．呂晨點同妳地講？」我問
「佢咪話你地一直比喪屍追住，之後財神叫你地走先，然後你兩個走走下就走散左。．．．．．．不過我事實上唔係好信佢講嘢，雖然唔多關我事。」Brandy說
「．．．我都唔知點講．．．．．．」我說
「點解頭先你要附和呂晨嘅大話？其實照直講係佢殺左你朋友，仲想害死你咪仲好。」華女面色有點難看地說
「．．．妳意思係佢．．．殺左財神？仲想殺埋流主？？」Brandy十分意外
「．．．我唔知應該點交代，我唔係咁想因為私人恩怨影響大家。宜家最首要目的係大家生存落去。」我說
「咁你就更加應該講出嚟，如果唔係可能連我地都比佢害死。」阿凝說
「唔．．．．．．咁好啦。」然後，我把當晚發生的事都告訴了她們
「．．．．．．我一開始都睇依個女仔唔順眼，郁啲就投懷送抱，依個痴下嗰個嗲下咁，都估到佢唔係好人。妳話係咪？」Brandy問阿凝
「．．．我無意見。」從表情看得出阿凝不是沒有想法，只是不想多口
「咁我地係咪應該做啲嘢？」華女問
「我都唔知應該點，殺左佢？」我問
Brandy和阿凝聽到我若無其事地問出這個問題，都十分愕然地看著我．．．此時我才留意到自己，甚麼時候開始，竟然會如此輕易便想到用殺人來解決問題．．．
「咩方法都得，最重要係唔好比佢有機會害死我地。」華女冷冷地說
華女的反應使Brandy和阿凝更加意外．．．
「．．．．．．我唔知你地經歷過啲咩，令你地有咁嘅諗法，但係殺人，點都唔係一個正確嘅方法。」阿凝說
「．．．睇情況啦。」雖然我對自己對於殺人已經感到麻木這件事有點在意，但是我不能認同阿凝的說法
當然，阿凝沒有回應，但是從她的表情看得出，她對我的想法頗為反感。也罷，沒經歷過的人，總是能夠輕易說出一些冠冕堂皇的說話。
我們在晶石店等了良久，一如預料並沒有生還者出現，於是我們便回休息室。原來大家都早已回來，晚飯也已經預備好。
「好耐未試過咁多人一齊食飯啦！」梅姨說
「大家食飯啦，食飯啦。」王生說
可是，一整頓飯，大家的氣氛都很沈重．．．驟眼看來，大家都好像各懷心事。華女是因為呂晨的出現吧？Brandy相信是因為知道了呂晨的真面目。阿凝一定是想著如何從數千喪屍手中拿回資料。而求撚奇也不時用奇怪的眼神看著我，一定是剛才呂晨跟他說了甚麼．．．但是，我倒是有點意外，盧Sir怎麼也好像心事重重似的．．．而且一吃完飯便回在通訊器前不斷在調教什麼，看起來很是煩惱．．．
「盧Sir，做咩事？」我說
「吓？啊．．．嗯，無事。」盧Sir表情可疑地說
「有咩唔怕照直講，有咩場面我未見過。」我說
「．．．無事。」盧Sir說
「你唔係想話車廠嗰邊無人應機下話．．．」我盲猜說
「你唔好咁大聲．．．比佢地聽到點算？？」盧Sir說
「點解呀？嗰邊無應機，有可能係已經淪陷左個喎，緊係要比大家知啦！」我說
「知道又點呀？唔通走呀？」盧Sir說
「咁緊係啦！」我說
「你傻架？出面咩情況你都知架！！出到去我地死硬架！」盧Sir說
「咁我地喺度等到幾時呀？？」我說
我們愈說愈大聲，而且開始有點變成爭執，華女她們也開始注意到了。
「流主？做咩事呀？」華女走過來說
「車廠嗰邊．．．」我還是沒有說出來
「嗰邊咩事呀？」阿健說
盧Sir沒有說話，只是瞪了我一眼便擺出一個埋怨的表情走開了．．．
「流主．．．？」阿健說
「車廠．．．佢地話要多少少時間，移走列車嘅工程比想像中難．．．」我說
盧Sir有點愕然看著我．．．
「咁好少事啫．．．我以為你地嘈交．．．」阿健說
「唔好意思．．．因為我有啲緊張．．．唔好意思盧Sir。」我說
「．．．我頭先態度都有啲唔好嘅．．．」盧Sir說
最終我和盧Sir都沒有說出真相。吃完晚飯後，我走到洗手間，恰巧求撚奇也在。
「求撚奇，晏晝．．．呂晨係咪同你講左啲咩？」我說
「．．．其實你兩個啲嘢，我係唔撚應該多嘴。但係我覺得你有啲仆街囉！」求撚奇說
「我仆街？？呂晨同你講左啲咩？？」我十分意外
「你扮乜撚嘢呀，講真依啲嘢係就係你情我願，但係你竟然呃鳩住大家，就係因為你宜家有第二條女？我覺得你好撚應該三口六面同大家講清楚。」求撚奇說著便離開了
這是甚麼一回事？？？到底呂晨對求撚奇說了甚麼？？？？我抱著疑問，一整晚不能入睡．．．