樓下有喪屍: Act 35 挑撥離間
「流主．．．」華女說
「．．．做咩？妳都瞓唔著呀？」我說
「其實頭先你同盧Sir發生咩事？我直覺覺得如果只係咁少事，你唔會咁大反應。」華女說
「世事都被妳看透了。無錯，我講大話。」我說
「咁係咩事．．．？」華女捉著我的手說
「．．．無人會嚟救我地。」我說
「唔係話車廠嗰邊．．．唔通．．．」華女露出驚訝的眼神說
「嗯，淪陷左。我頭先就係同盧Sir嘈，因為佢睇嚟唔係啱啱先知，而且佢唔想比我地知。」我說
「點可以．．．既然無人嚟救我地，我地喺度等死呀？」華女說
「盧Sir似乎係咁諗。」我說
「痴線．．．咁你有咩諗法？」華女說
「我都唔知．．．不過的確，就算走，都唔知可以走去邊．．．」我說
「或者．．．睇定多一兩日先？」華女依偎著我說
「．．．嗯。」我說
．．．．．．．．．
第二天早上，我們依然是氣氛奇怪地用餐。
「．．．．．．今日之內，我想拎得返隻手指。」阿凝說
「都好，襯宜家人多，大家一齊諗諗辦法。」盧Sir說
「．．．．．．一時間，好難諗得到咩辦法喎，幾千隻喪屍喎．．．」Brandy說
「．．．殺入去就一定無可能。」阿健說
「引開佢地呢？」王生說
「都無咁大空間啦，始終係室內。除非引佢地出街，但係咁樣太危險。」我說
「或者我地可以先去地牢個保安室睇睇閉路電視，確認左子誠．．．大概位置先。」華女說
「．．．．．．我唔係想潑你冷水，我地一直都唔敢去嗰度．．．因為有幾個保安喺嗰度，佢地好多槍．．．而且唔係咁友善，我同細豪之前比佢地搶過一次嘢。」阿健說
「．．．．．．咁唔使擔心，我之前有經過過嗰度，佢地已經死晒。」我說，我認為不太適合讓他們知道我所幹過的事．．．
大家也靜了下來。
「．．．係有喪屍？」盧Sir說
「．．．．．．唔清楚。」我說
「．．．點都好啦，既然係咁，我地一係去左嗰度睇睇情況先，然後再諗下辦法。」阿凝說
於是，我、華女、求撚奇、阿健、阿凝、王生，還有呂晨七人一起到保安室查看。
「其實，阿凝因為係佢要隻手指，就話要跟埋嚟．．．華女同呂晨妳兩個女仔跟埋嚟做咩？」阿健問
「我想盡我所能幫大家，唔想喺你地度白食白住，而且我都想幫阿凝。」呂晨說
「．．．我唔會同流主分開。」華女說
然而，求撚奇卻好像一臉不高興似的．．．
不用片刻，我們便來到了控制室。大家也拿起武器戒備著，慎防會有喪屍出現．．．
「佢地啲屍體呢？」阿健問
「我之前搬晒出去停車場。」我說著，並走到閉路電視的監察器前
此時，阿凝走過來悄悄說：「．．．點解你要殺佢地？」
我被她突然奇來的質問嚇得心也跳了出來！
「果然．．．」阿凝看到我的反應便已經知道答案了
可惡，他媽的這個女記者很銳利！看來沒有甚麼可以騙得過她．．．要是讓大家知道了我殺過這麼多人，他們會怎麼想我？．．．要是萬一他們決定拋下我．．．公審我．．．甚至殺了我怎麼辦？？．．．．．．．．．還是．．．先下手為強？
「依度就係商場地下。」阿健走過來指著監視器
「哇．．．真係好多喎．．．」王生說
「．．．．．．好似係佢。」華女竟然從監視器上看到了子誠！
「妳肯定？？」阿凝問
「嗯，因為得佢係著成套嗰啲唔知咩部隊嘅制服。」華女說
「但係搵到又點？我唔好話要殺晒啲喪屍呀．．．淨係的佢出嚟都難啦．．．」王生說
「我有辦法！」呂晨突然說
「咩辦法？」阿健說
「夾公仔咁夾佢上嚟！」呂晨說
我們全部人都靜下來了．．．
「呂晨，我希望妳可以認真啲。」阿凝說
「咪住，未必唔得。」我說著，所有人都立即看著我
「個商場係開放式架嘛，我地可以喺上一層吊個人落去，捉子誠上嚟。」我說
然後，我們真的一行人來到了商場的二樓。這裡的喪屍不算多，特別是有我、求撚奇和阿健在，我們不算狼狽，便把附近的喪屍處理掉。而且非常幸運地，子誠的位置非常接近我們！
「好啦．．．任務非常困難，由邊個落去？」阿健問
「隻手指係我要，我落啦。」阿凝說
「．．．咁好啦，妳放心，依條安全帶係我地公司比員工高空工作用，絕對唔會斷。而且我地咁多人扯住，一定唔會跌妳落去。」阿健說
「我地點都會拉住你。」我說
「你信唔撚信得過呀？」求撚奇突然說
「吓？？？」我完全不明白求撚奇為甚麼突然這麼說
「你自己心撚照啦係咪呀？」求撚奇說
「．．．你講乜撚嘢呀！？」我說，究竟發生甚麼事了
「你地唔好嘈啦．．．唔好為左．．．總之唔好嘈啦．．．過左就算啦！」呂晨突然說
「乜撚嘢過左呀？妳講乜撚嘢呀！？」我說
「你條仆街我真係睇你唔出，原來你係咁撚賴皮！」求撚奇竟然舉起手想向我揮拳！
「你試下掂流主！」華女舉槍指著求撚奇
「．．．妳老味，妳自己都比人呃撚左呀！仲懞撚盛盛！」求撚奇說
阿凝突然插咀說：「夠啦！．．．宜家有緊要嘢要做，你地可唔可以放一放低你地啲無聊嘅私人恩怨？」
「．．．唔撚使講咁多，信我唔過呀嘛？Fine！我落去！」我意氣用事說
大家也都靜了下來．．．
「痴線！點解要你落去！」華女阻止說
「．．．事實上我係有責任嘅。」我意味著子誠是因我而死的事
「唔．．．．．．」華女明白我的意思
「．．．咁你著左條安全帶佢啦，放心，我點都唔會放手嘅。」阿健說
「王生，依度應該得返你係中立，你幫我睇住華女。華女妳都係，冷靜啲。為左隻手指，佢地唔會比我死，唔使擔心。」我說
「流主．．．．．．小心．．．」華女說
我穿好安全帶，便爬過欄杆，慢慢蹲下來．．．很好，子誠就在正下方．．．