「你無撚嘢呀??我做左咁多嘢,你地都唔信我信條八婆!?」我說
 
「......事實上,我覺得流主唔係會亂殺人嘅人...係咪中間有咩誤會?」阿健說
 
「咁好呀,投票囉!咁樣最撚公平!!我投你走!」求撚奇說
 
「我都投你走。」盧Sir說
 
「...流主...對唔住......」呂晨也舉手示意
 




「...我投反對。」阿健說
 
「我都反對。」阿凝說
 
「...我......我棄權...」Brandy說
 
然而,其他人包括王生王太他們都投票要我離開...
 
「......好......你地好自為之......Brandy當初真係講得啱...話我入世未深,叫我要小心唔好亂信人...」我無奈說
 




「...對唔住......」Brandy低下頭說
 
「流主,我同你走。」華女說
 
對於這個無奈的事態發展,我只能無奈地接受。我和華女拿回我們的行裝,便悄悄離開了他們的據點。但是我們漫無目的,也不知道應該到哪兒去。於是,我們隨便找個安全的地方睡了一晚...
 
 
.........
 
 




「起身啦?」華女說
 
「......今次到妳唔叫我...」我說
 
「你尋日辛苦呀嘛。」華女強顏歡笑說
 
「...估唔到因為一個女人,會變成咁。」我慨嘆說
 
「我地之後點好?」華女說
 
反正沒有想去、也沒有可以去的地方,我們決定回到寶妮的屍體處...就把那裡當做據點,至少,她是少數知道真相的人。
 
「家姐...」華女撫摸著寶妮的屍體
 
「......」我沒有說話,只是默默陪著華女




 
「...嗰日,因為仇恨...都無好好咁同妳道別。」華女說
 
「...寶妮,我會好好照顧華女。妳安息啦。」我說
 
「家姐...妳放心,我會堅強。」華女說
 
「佢就係妳所講,比保安強姦左嘅家姐?」一把女子的聲音傳來
 
我們立即回頭看,原來是阿凝和阿健!
 
「妳地點解會嚟依度...?」我問
 
「我睇返啲片,知道你地嗰日係嚟左依層,所以諗住嚟睇下真相。宜家,真係咩都睇到晒。」阿凝說
 




「...我地啱啱仲經過車站嘅檔案室,搵到尋晚Locker房閉路電視嘅片段。」阿健說
 
「咁即係你地知道晒???」我驚喜地說
 
「嗯。其實尋晚我已經覺得奇怪,呂晨佢話「財神可能根本都係你殺」,但係早兩日我地遇到嘅時候,我聽你地講,係話財神死左,你先同呂晨失散,所以我就開始懷疑。...而且,我覺得如果你係一個會亂殺人、會強姦人嘅人,唔會幫我拎返隻手指。...不過唔等於我認同你殺人係啱。」阿凝說
 
「點都好啦,對唔住呀流主...怪錯左你。」阿健說
 
「算啦......不過呂晨嘅事就由佢啦,最重要係大家都可以生存落去。」我說
 
「...我會同佢地傾下,將件事搞返清楚。到時小濠灣嗰邊搞掂,我地就可以一齊走。」阿健說
 
「......車廠嗰邊唔會嚟架啦。」我說
 
「咩話?」阿健和阿凝異口同聲說




 
「其實之前同盧Sir嘈,就係為左依件事。」我說
 
「你意思係,嗰陣佢已經知?」阿凝說
 
「應該更早已經知,但係佢唔係好接受到。...我唔敢話車廠嗰邊一定已經淪陷,但係無人應機係事實,可能佢地已經著左草都話唔定。」我說
 
「會唔會係接收唔好咋?」阿健說
 
「我估盧Sir嗰日無啦啦叫你去巡邏,就係自己走左去檢查,因為佢唔想比人知。」我說
 
「咁點解佢唔講出嚟?我地應該即刻搵第二個方法逃生個喎!」阿健說
 
「佢話走出去都無用。」我說
 




「咁都得?」阿凝說
 
「或者我地可以襯宜家去搵一搵會唔會有其他方法走?」阿健說
 
「其實依度天台有我地坐嚟依度嘅直昇機,我地可以上去睇下有無咩逃生嘅線索。」我說
 
「有直昇機?咁我地坐佢走咪得囉!...係喎,我地無人識揸...阿凝識唔識?」阿健說
 
「緊係唔識啦...」阿凝說
 
於是,我們乘昇降機來到最高層並走到天台。
 
我們向街外視察,街上都佈滿著喪屍...香港人口爆炸的問題,從來都沒有解決過...想不到,末日來了,這問題仍然讓人頭痛...
 
「唔似有咩方法...」華女說
 
「就咁睇,的確無地方比我地宜家個站更安全...」阿健說
 
難道我們真的要在這裡渡過餘生?這個香港已經死了,不再是以前繁榮的城市...就算我們這樣拾荒偷生下去,每天膽顫心驚地過活,總有一天還是會慘死...難得阿凝找到了替我澄清的證據...也找到了事件的起源...
 
不,不可以放棄,我們有直昇機,會不會應該找一個會駕駛直昇機的人來?...當初不應該殺子誠的...而且還殺了他兩次...怎麼辦...
 
「唉...連碼頭都無晒船...得一隻係海中間...游水都去唔到啦...」華女說
 
的確就算會游泳,不是游泳好手,在海上游也一樣會遇溺...慢著,為什麼船會停在海中間?漂浮了出去?不可能的,如果船停在岸邊,一定會打錨的!這麼說,那隻船上有人??
 
「架船可能有人架!有無望遠鏡??」我說
 
「無端端...點會有...」華女說
 
「我部相機咪係囉。」阿凝說著,便用相機的變焦功能看過去
 
「點呀?」阿健說
 
「好似真係有人...但係太遠啦,我個鏡頭睇唔清,有可能係喪屍都唔定。」阿凝說
 
「有無方法可以令佢都望過嚟?」我說
 
「閃佢得唔得?睇戲咪好興拎塊鏡仔反射...」阿健說
 
「睇戲呀嘛。」阿凝說
 
「直昇機度好似有信號彈...寫住Flare...」華女說
 
「真架!?可以試下喎!!」我說
 
我們打開一個寫著Flare的盒子,裡面裝有的並不是信號彈,而是一支支像棍棒的東西。
 
「咦?唔係嚟嘅??」華女說
 
「Handsmoke?」阿凝閱讀著棍棒上的字
 
「...啊,Handsmoke作用同信號彈差唔多,你甩左個蓋佢就會係咁噴啲有顏色嘅煙出嚟架啦。」阿健說
 
「好,就得等我試下。」我說
 
我走到天台的邊緣,把棍棒上的蓋拔下來,果然,一陣燈色的煙霧隨即不斷從棍棒中噴出來。我立即把它高舉,並不斷搖晃著。
 
「......佢睇到啦!」阿凝從相機觀察著