第六集 ~ 龜︰搵我?我…我決定咗離開你…

「咁呀,不如叫做…GRACE丫!意思有優雅,恩澤,慈悲等意思,好似好適合你。」

呢句說話﹑「龜匙」呢個洋名,仲有「有我喺度,你呢世都唔使再驚」呢句…

當晚就係咁,一直一直喺我耳邊度冇停過咁回響,我亦整整陶醉咗一個夜晚…

同鳳初一返到屋企…



我就攞咗山下酒舖周老闆為咗多謝我送俾佢嘅山草藥而送俾我嘅一壺酒出嚟…

「今晚咁高興,不如我哋飲返杯囉。」

點知鳳初咁講︰

「酒能亂性,不如飲茶啦。」

我個心覺得俾鳳初拒絕咗,所以有D唔開心,仲亂噏咗句︰



「亂性!?咁咪啱囉。」

「吓!?」

當我知道自己講錯,我即刻就去兜返…

「我…我…我只係話大家飲得開心就啱咋。」

當時真係好尷尬啊,所以我面都紅晒…



淨係不停咁斟酒俾鳳初佢飲,點知…

佢越飲越多,越飲越快,而我就繼續不停係咁斟…

直到…

飲晒為止。

之後…

鳳初佢似乎係飲醉咗,佢竟然…

雙手好用力咁抱住我,仲…

錫咗落我個…嘴仔度…



當時我真係成個頭都紅晒,個人熱到想爆炸咁滯…

之後佢仲…

好尷尬啊,真係講唔出口,之後我就同佢「好」咗囉。

當然係我嘅第一次啦,嗰種感覺就好似好唔舒服,但係又好似好舒服咁…

我真係唔識形容,只係覺得…

我呢一世都會依靠住呢個男人。

好可惜,開心快樂嘅時光真係過得好快,美夢亦總有一日會醒嘅…



「鳳初呀,唔好咁啦,我…我…丫~丫~」

「師姐,師姐…」

我起初只係覺得「師姐」二字係代號,或者係亂嗌…

「師姐,師姐…」

佢再講,我亦只係當佢講洋文,但係…

「師姐,麗葉,唔好走啊,我真係好鍾意你嫁…」

我更蠢,更想呃自己都冇可能說服到自己佢所講嘅人係我…

同佢「交好」嘅係我,而鳳初佢個心就只有…



另一個。

覆雨翻雲嘅一晚,換咗我一個驚天動地嘅決定…

我決定離開呢個傷心地,從此唔再返嚟…

我留低咗一封「信」,鳳初佢即使明唔明白都好,我亦都係留低咗…

「信」寫完,我望住鳳初…



我真係好想同佢喺埋一齊,但係…



我真係接受唔到自己愛嘅男人心裡面有第二個…

所以…

我只係喺鳳初手上攞咗一粒玉豬就離開咗呢個家園。

我就係咁帶住依依不捨嘅心情,漫無目的咁行咗去白水溪度…

諗住同呢個地方「道別」…

點知…

「瑞基!GRACE!瑞基!GRACE!」

我聽到係鳳初把聲啊!但係…

我唔敢…亦唔想…亦唔敢…

見佢…

所以,我為咗避佢,我竟然不知不覺間衝咗入惡鬼洞…

外面雖然係朝早,但係呢度裡面依然係密不透光,漆黑一片…

我坐咗喺洞裡面一段時間…

估計,鳳初應該已經走咗,所以我起返身,諗住離開呢度,點知…

「小妹妹,乜你咁快就走喇?」

一把有幾道回音嘅聲喺我耳邊響起…



我聽到之後呆咗,回音聲似曾相識…

係尋晚嘅山靈妖婆嘅聲音…

我…我呢次…唔通要俾妖怪食?

「你唔使驚,我唔會害你嘅,我已經睇住你好幾年喇。」

睇咗我好幾年?仲要我一直唔知,乜唔係仲驚咩?

我就連頭都唔敢另轉去望佢…

但係…

我見到我塊面嘅旁邊慢慢有D嘢出現咗…

係…係…

一塊塊面好似麻布咁,仲有一雙拳頭咁大會發出淡光嘅巨眼…

我呢刻…我呢刻差D就嚇到抖唔到氣…

「都話唔使驚囉,你唔係歧視我樣衰丫嘛?」妖婆咁講。

「Eee…當然唔係…」我好自然咁為咗自己安全而奉承佢…

「咁就好喇。妹妹,尋晚嗰個男人呢?」

「Eee…佢…就喺出面!」

我覺得佢應該會驚鳳初,所以為咗保護自己一定要嚇一嚇佢,點知…

「吓!?你唔會係想嚇怕我呱?」

俾佢發現咗添,點算好呢?

「傻妹,嗰個男人冇料嫁,得把口,我感應唔到佢有靈力,淨係拋我話自己係火鳳派傳人,如果我要食咗你哋,真係同殺死隻蟻咁易啊。」

肉隨砧板上,佢可以殺我,但係就唔可以講鳳初…

「鳳初佢唔會呃我嫁,佢有能力可以消滅你呢隻怪物!」

「吓!?消滅我?點解要消滅我啊?我又冇對你哋做D咩?」

「你…你而家唔係脅持我咩?」

「傻妹,我…」

我突然記起鳳初所教嘅「隱身咒」,襯妖婆仲講緊廢話,我就…

兩指一點額頭就衝出洞外面…

我頭都冇另返轉就一直衝,一直衝…



終於,衝到去城鎮先停落嚟…

而妖婆又真係冇追到我…

「嘻嘻,我都話鳳初唔會呃我嫁啦。」

嚟到商周城鎮,我第一時間就係諗起好錫我嘅西施嬸嬸,所以就去搵佢…



「肥婆,俾兩磚豆腐嚟!」

我一去到西施嬸嬸個檔位,就聽到有人似乎想摟打,西施嬸嬸最憎人叫佢肥婆嫁…

「你夠膽講多次~!」西施嬸嬸蹬到對眼凸出嚟咁滯…

「哈哈,叫你肥婆又點啊?打我呀?」

原來摟打嘅係一個高過嬸嬸成個頭嘅大隻佬,但係…

我諗呢個人肯定係新嚟嘅,因為…

西施嬸嬸從來都唔會理對手係邊個,打法都係一樣嘅啫…

「抄你撈胡丫!沈魚飛拳!」

「抄你撈胡」係西施嬸嬸鄉下嘅粗口,至於「沈魚飛拳」犀利嘅地方係…

(啪~)

「啊~~~」大隻佬應聲倒地…

之後,西施嬸嬸連環快打,拳打腳踢,打到大隻佬落荒而逃…

而我就去咗幫西施嬸嬸降火…

講返「沈魚飛拳」犀利嘅地方先…

就係佢唔係用拳打,而係用腳踢,至於踢邊度,就大家諗諗喇。

「西施嬸嬸,唔好嬲啦。」

「最憎人話我肥嫁喇,我邊忽肥啫,係豐滿D喳嘛。」

「係喇,係喇,孫燕姿都有得唱啦,波大,蘿大,好醜怪…」

「哈哈哈,衰妹,總係用D奇怪方式氹嬸嬸開心嘅…」

「孫燕姿」係喺街頭賣唱嘅,「醜怪」二字對嬸嬸嚟講即係靚,佢鄉下興咁樣讚人靚嘅,我仲要讚佢波大蘿大添,所以嬸嬸會覺得好高興囉。

「衰妹,你身材夠好啦,仲醜怪過嬸嬸添噃,有識到男仔未呀?」

「Eee…未啊。」

「聽講,你之前同我講嗰戶個大少爺徵婚噃,你唔去試吓?」

「徵婚!?」

(待續)

下集預告︰

「…神,劍!」
已有 0 人追稿