第十三集 ~ 雞︰高手雲集,準備大戰殭屍王!
 
上次我去咗虹霞門英雄救美…
 
(塊面你就紅,英雄喎!)
 
師兄總係要挖苦我嘅…
 
「…我諗師父好快就會知,一陣返到去你就知死。」
 


之後我哋三個就一齊返咗去茅屋。
 
師父亦好理所當然咁知道晒成件事,但係佢唔單止冇鬧我,仲襯師姐返咗屋企…
 
「衰仔,你真係好鍾意麗葉呀?」師姐叫做朱麗葉。
 
「吓!?我…我只係覺得師姐佢好靚,好似仙女咁,唔知點解,好似佢講咩我都要聽咁囉。」
 
「十歲未夠嘅人仔,竟然學人鍾意女仔,壞喇你。」
 


我哋兩師徒就係咁,坐定定喺茅屋裡面傾吓計囉,點知…
 
「師父,大件事喇!」係師兄喺出面衝返入屋大嗌。
 
佢仲帶咗一個…
 
膚色啡啡紅紅,黑頭髮好似草頭咁,一身白色紗衣嘅男人入嚟。
 
「先生就係鳳派高人江雲林嗎?」個男人咁問。
 


「係,請問咩事呢?」師父回應。
 
「百鬼之墓內,招魂師集結,怨靈群凝聚,殭屍王重生。」
 
百鬼墓!?咪早喺差唔多一年前,我打敗高秀藍嗰度。
 
「殭屍王?請問高人貴姓名?」
 
「我非中土之士,遊走各國,治邪捉鬼而已,他國之人稱我為…神通。」
 
「神通老兄,你係想…點呢?」
 
「我只是想集結正派高手,處理一下殭屍王。」
 
「哦,咁除咗我,仲有邊個啊?」


 
「適逢遇上龍字派高手白千龍,東洋高手虫節大師,以及西方兩位傳教聖人,我衡量過形勢,只要我等同心協力,一定可以解決殭屍王。」
 
「其他嗰D我唔認識,但係單單一個白千龍,我諗就足夠証明你有見識,好,我跟你去同大家集合,俾D時間我執執D嘢。」
 
師父好快就執好晒嘢,溜夜就帶埋我同師兄跟住神通先生出發…
 
「師父,唔使睇屋咩?」
 
「你係咪想留低丫?呢次係百年難得一遇嘅機會,我想你哋兩師兄弟都去見識一吓。」
 
「咁師姐呢?」
 
「衰仔,淨係掛住女仔,今次帶唔到佢喇,下次有機會先啦。」
 


「係噃,師父呀,而家我哋係咪去上年去過嗰度啊?」
 
「係啊,講起嚟你師父我都有D慚愧,其實上年去嗰陣,我已經係想去調查一下百鬼墓嫁喇,點知就撞到高秀藍同佢老闆,攪到我喺百鬼墓前嘅石崖就停咗,之後仲因為你D臭事同擔心阿達,又返咗屋企,最衰仲要返到屋企掛住執屋將成件事都忘記咗,唉~」
 
「師父,原來你咁擔心我架?我好感動啊!」師兄眼泛淚光咁講。
 
「當然啦,你係我最錫嘅大徒弟噃!」師父亦都配合。
 
佢哋仲手握手,你眼望我眼咁,有D熱血嘅感覺。
 
至於我就頂佢哋唔順,自己行開咗,跟住神通先生佢行。
 
沿路黑媽媽,靜蠅蠅,只係隱約有D月光,周圍亦只係聽到昆蟲叫聲…
 
行咗一段時間,終於到咗我同師父之前嚟過嘅石崖…


 
「江雲林,好耐冇見噃!」一個黑髮白鬚,好有英氣嘅先生講。
 
「白千龍,別來無恙丫嘛?做乜鬼嘢你D鬚白晒嫁?」師父回應。
 
「時髦丫嘛,我自己諗嫁,係咪好有型先?」
 
「哦,原來假嘢嚟,不過又真係幾好睇噃,我使唔使又整返D呢你估?」
 
「唔好唔好,我幫你諗好咗喇,你戴呢個,黑超,正嘢嚟嫁!」
 
佢兩位老人家雞啄唔斷,至於我…
 
「咦,你哋梗係達仔同雞仔喇,你哋好,我叫白百龍。」一位睇上去廿幾歲嘅師兄講嘢。
 


「你好,百龍師兄。」達師兄叫人師兄,我都係第一次聽,感覺都幾得意。
 
「百龍師兄你好,但係唔好叫我雞仔啦,我叫鳳初啊!」
 
我喺呢度,淨係認識咗百龍師兄咋,東洋虫節大師,應該講日文,所以我唔知點同佢講嘢,西方兩位聖人又自成一角咁,所以我都冇撩佢哋講過任何嘢。
 
佢哋幾位高人圍埋密密斟咗一陣,之後神通先生就開始帶領大家行喇…
 
周圍黑蚊蚊,我哋只好小心翼翼咁繞過石崖,穿過木林,走過河溪,終於…
 
嚟到一個滿佈墳墓嘅地方,相信呢度就係師父所講嘅…
 
百鬼墓。
 
D高人就高埋一堆,咁我哋呢D低人咪低埋一堆囉。
 
「百龍師兄,呢度係咪就係百鬼墓啊?」
 
「係啊。」
 
「係好多墳墓,但係睇落都好正常啫。」
 
「正常!?你D感應力去咗邊啊?」達師兄插口。
 
「咩啊,呢度都冇靈氣。」我講。
 
「鳳初,咪就係冇靈氣囉,墳頭唔多唔少正常都會有D靈氣,一D靈氣都冇係好奇怪嫁,仲要咁多墳墓,竟然一D靈氣都冇,咁實在太唔尋常喇。」百龍師兄回應。
 
「我哋行去後山啦。」白千龍前輩講。
 
之後我哋就再一齊行…
 
「百龍師兄,其實你知唔知發生咩事啫?殭屍王關呢度咩事?」
 
「原來你哋未知架?其實係咁嘅,大概一年前,唔知咩人請咗一班招魂師嚟呢度招魂,本來招魂師係正當職業,專幫人召喚前人先靈或者引導亡靈去正確地方嘅,但係請人嗰個心懷惡意,招魂師見錢開眼,去咗好多地方招魂,最後仲嚟埋呢度招,而請人嗰個其實係想呢班招魂師將D邪靈放喺一條本來就係惡屍嘅身體度,所以殭屍王就係咁形成咗,我哋嚟呢度就係要消滅佢。」
 
「咩人咁衰啊,攪D咁嘅嘢?」
 
「唔知,不過應該都係出名邪術士之一。」
 
「出名邪術士?有邊D啊?」
 
「好多嫁,近排最出名應該係東歪西斜,南轅北轍,中毛艷五個囉。」
 
「吓!?成語嚟架?咁…師父講過嘅八扇呢?唔夠佢哋勁架?」
 
「邊個勁D我就唔知喇,不過講出名就肯定我頭先講嗰五個出名D囉。」
 
「嘩,咩咁多壞人嫁。咦,係噃,而家一隻殭屍王就要我哋正派總動員,咁樣壞人喺埋一齊嘅話,我哋D正派咪玩完?」
 
「哈哈,鳳初呀,你要知道,佢哋叫得做壞人嘅,就連朋友都會出賣,即使表面喺一齊,其實都係互相猜忌緊,所以好難真係合作起嚟嫁,呢樣嘢,我諗就係正派同壞蛋嘅最大分別囉。」
 
「哦~」
 
「仲有啊,就嚟到喇,我見你應該好多嘢都未知,快D講埋俾你聽,等你有D心理準備先,其實早喺一個月前,殭屍王已經喺呢邊肆虐,百鬼墓只係佢嘅起點,山後面一連幾條村,而家已經變咗做殭屍城,比殭屍整死嘅人類而家都變晒做行屍,做咗佢嘅傀儡。」
 
「嘩,咁樣我哋咪有排打?咦,唔係噃,擒賊先擒王,我哋係咪攪掂咗操控殭屍王嗰個邪術士就得喇?」
 
「攪破壞嘅人又點會留喺度等人捉丫,而家我哋嚟係要消滅殭屍王。有樣嘢我想講清楚D添啊,殭屍王而家已經唔使俾人操縱,佢自己有自己諗法。對呢D邪物嚟講,不斷擴大自己勢力範圍就係最基本嘅想法,所以會不斷漫延開去,但係呢個亦係一個好處,因為我哋只要順住條路去,就會搵到佢。」
 
大家突然都停低咗,而我就…
 
叉錯腳,碌咗落個坡度…
 
「哎吔!」
 
我抬頭一望…
 
雖然天好黑,但係我仍然隱約見到…
 
眼前嘅係一條村嘅村口,有座石造嘅大門牌,寫住…
 
葵花村。
 
而直望前去,係一堆…
 
一大堆唔知做乜喺個地下執嘢食嘅怪人,佢哋仲…
 
另晒過嚟望住我…
 
(待續)

下集預告︰

打公安,想死咩?
 
已有 0 人追稿