米米蓮妖怪作品 -《再遇見到你》(長篇) (暫停刊): 第十四集 ~ 鳳︰搵搵吓余二十，竟然搵到…佢！？
第十四集 ~ 鳳︰搵搵吓余二十，竟然搵到…佢！？
搵唔到瑞基，我就轉咗去余二十，但係竟然搵咗另一個余二十…
我唯有先去食嘢啦，點知…
我諗我呢世都估唔到嘅事情，就喺呢一刻，喺我面前發生咗。
一個茶樓老闆不停咁鬧緊個職員，而個職員…
就係余二十嚟，一個後生版嘅余二十。
我覺得好奇怪，點解會有兩個後生嘅余二十出現喺呢個時空嘅呢？
雖然我話我面前呢個余二十係後生版，但係估計佢都最少有三十歲嫁喇。
我認真諗諗，頭先喺蘭花山莊嘅余二十可能仲老D添。
「你條死廢柴，你再做錯嘢，我就連你另一隻腳都打跛埋！」老闆再鬧。
我本來覺得余二十一定會還手，我個心仲一直喺度諗住…
「打佢啦，打佢啦，打佢就啱喇，咁我就可以肯定你係未來嘅余二十喇！」
但係…
佢不單止冇還手，仲…
(啪~ 啪~ 啪~)
「咩啊，唔順氣啊？打我丫笨！」一直係咁俾個老闆車埋去塊面度。
有測隱之心嘅我，根本冇可能再睇落去，所以…
「停手！」
我講呢句其實係多餘嘅，因為我已經忍唔住行咗埋去好用力咁捉住咗老闆隻手。
「吓！？Eee…貴客請問咩事啊？」老闆當堂痛到淆晒底。
「唔好再打佢！」我好嚴正咁同佢講。
「我…我…我只係想教佢咋，佢係我員工，我…eee…請問佢同你咩關係呢？」
「仇人！」
「吓！？仇人？咁我幫你教訓佢唔係好事咩？英雄，你做咩捉到我咁痛啊？」
「只有我可以打佢。」
「係嘅，係嘅，小人先離開，唔阻你打佢喇。」
我慢慢放開咗手，老闆見我鬆手，嗱嗱聲就走咗去。
「老闆！老闆！eee…英雄…饒命啊！」後生版余二十講。
「你係咪叫余二十？」
「Eee…小人唔敢隱瞞英雄，小人的而且確係余二十，但係我…」
「你咩啊？」
「我好似唔識英雄你噃，應該更加冇可能得罪過你啦，可以饒恕我嗎？」
(唔通呢個先係後生時候嘅余二十？咁頭先嗰個係邊個呢？) 我咁諗。
「Eee…點呢英雄？我係咪可以返去做嘢喇？」
「唔得！」我諗唔明啊，所以發惡大嗌咗出嚟。
後生余二十當場嚇到企到直一直，操兵咁款。
但係我見到佢一隻腳真係好似佢老闆咁講，企唔直嘅，應該係跛嘅。
「你…你點解跛嘅？」
「係…係俾人打跛嘅。」
「邊個？」
「我唔識佢，亦唔知點解佢要咁做。」
「佢咩樣？你幾時俾佢整跛嘅？」
「係一年前嘅事，其實講起嚟好奇怪，佢個樣好似有鬍鬚嘅我，不過再瘦D。」
我呆咗一陣，喺度組織吓究竟發生咩事…我諗…
我明白咗一D嘢…
之前蘭花山莊嗰個真係2000年嗰個余二十嚟。
「你識妖術？」我再問。
「吓…eee…唉…我諗都瞞唔到英雄你喇，冇錯，我本來係江湖上有D名氣嘅邪術之士，人哋俾面，仲俾咗個稱號我，叫我做西斜嘅，但係就係喺一年前，俾我頭先講嗰個人…佢…佢攞晒我D力量，仲…打跛埋我…」
男兒有淚不輕彈，我早兩日都係咁，所以我好明白，佢比我仲要慘…
冇晒靈力，仲要跛咗，跛都唔緊要，仲竟然淪落到俾D咁嘅廢人老闆恰。
我拍一拍佢膊頭…
「以後你跟我，我係教書嘅，我會教好你，跟住我啦！」
其實我係借D倚想查清楚佢身體裡面仲有冇靈力，點知發現佢真係俾人吸得一乾二淨，一滴都冇，變成廢人一個。
「英雄，其實你而家係咪黑幫收O靚啊？」
我正想應佢話我係正派嚟嫁，點知…
「係佢哋喇，幫我拉晒佢哋，佢哋喺我茶樓攪事啊。」
個趴街老闆竟然報咗警拉我哋，原因係…
莫須有，只要你有錢，你想D警察拉柴都仲得。
而我當然…
俾人拉咗啦，人哋有槍嫁，打公安，想死咩？
其實我係因為講過要教好余二十，所以要保護埋佢啫，唔係我一個人肯定走得甩。
我同後生余二十就係咁，俾班公安拉咗嚟呢度…
呢度好污糟，成地草，好似幾百年前嘅牢獄咁。
「Eee…英雄，我…我應該點叫你啊？」後生余二十問。
「唔好意思啊，累到你添。你叫我…陳…光管，陳鳳光啦。」
我唔想俾佢知我係陳鳳初。
「鳳光兄你好，唔緊要，其實我一早就想離開嗰個衰老闆，只係我未搵到好似你咁勁嘅人啫，你肯嚟救我，我反而覺得好開心就真。」
「你…你知道我係勁人？你仲可以感應到我嘅靈力咩？」
「當然，我天生唔使學就有呢種感應力，所以我學術會比人快，比人容易，呢個就係點解我廿幾歲時就已經出晒名嘅原因，不過我最錯嘅就係學咗妖術，因為我貪佢易學易精又易玩，所以攪成而家咁…」
「你咁講，我反而覺得你個人有D假，但係我希望你真係後悔啦，唔怕開門見山同你講，我係唔會教你道術嘅，因為真係驚你再去做返壞人。」我好直接咁同佢講。
「咁…咁你會教我咩啊？」佢好似唔係咁開心咁。
「洋文。」
「真架？好啊！」但係又奇怪佢呢句一D都唔假，仲好似好真誠想學咁。
「你做過D咩壞事啊？講嚟聽吓。睇吓你點解出名都好啊。殺過人？」
「冇。」
「放過火？」
「冇。」
「姦淫擄掠？」
「都冇。」
「咁你衰咩啊？」
「我冇殺過人，但係殺過邪，殺過魔，殺過妖精，所以出名，我冇放過火，但係放過水，放過風，放過雷電，都係妖術嚟，我冇試過姦淫擄掠，淨係試過偷呃拐騙，所以個名臭咗，俾人當咗係邪術妖士。」
「哦~ 殺精~ 放水~ 但係…擄同拐有咩分別呢？一個你話試過，一個你又話冇試過。」
「Eee…」
「邊鬼個嘈喧巴閉啊？」我哋身後突然傳出一把咁嘅死人聲。
我同後生余二十另轉頭一睇，發現一條友撥開咗D草，佢個樣好污糟…
「你係邊個啊？」我同後生余二十一齊問。
「行不改名，坐不改名，死姓不改，改正趴街，陳鳳初就係我喇！」
下集預告︰
係啊，雙面神偷申月兒。