第二十一集 ~ 豬︰中間插兩集,講吓我嘅生世,可以嗎?
 
冇錯,我就係「豬」。
 
我就係嗰個俾火鳳派江雲林師父話佢係「豬頭柄」嗰個人嘅女,朱麗葉。
 
識咗雞仔之後,佢帶咗我返教會,喺教會度,大家都會叫我Juliet。
 
我屋企有D錢,因為係皇族後裔,有D人會覺得奇怪咁問︰
 


(你姓朱?皇族後裔?幾多千百年前啊?)
 
冇錯,我就係中國明朝開國皇帝朱元璋嘅後裔。
 
(都改朝換代啦,你仲有錢?D錢邊度嚟啊?你吹水啊?)
 
老實講,我都唔知,只係知道我屋企真係有本族譜,仲真係仲有好多唔知乜人會唔知點解源源不絕咁送錢送財物俾我屋企,所以我屋企喺附部區域嚟講都真係算大戶有錢人家。
 
而我就係嬌生慣養咁喺呢個家庭長大,我有個細佬,年紀比雞仔仲要細。
 


喺未發生呢件事之前,我嘅人生真係一條大直路嚟,完全冇波折嘅…
 
而呢件事就係…
 

 
「嫲嫲啊,你匿埋喺邊啊?哼,你匿埋喺邊我都會捉到你嫁喇!」
 
冇錯,我就係同我屋企幾個僕人,仲有嫲嫲佢喺屋企個花園度玩緊「捉依恩」…
 


其他僕人我都捉到喇,就係未搵到我嫲嫲,我已經將成個花園都反轉…
 
但係都搵唔到佢,所以我估…
 
嫲嫲係匿咗喺地庫之類嘅地方。
 
「管家,幫我開咗個鎖佢。」我要求管家幫我開咗通去地庫嘅門。
 
門係爸爸鎖嘅,仲唔知點解畫咗好多符咒喺門口,仲叫我哋唔准入去添。
 
「小姐啊,老夫人唔會匿喺度啦,佢點樣可以入咗去先鎖返出面啊?」
 
「鎖嘅係你哋咪得囉。」我懷疑僕人幫嫲嫲手,等我捉唔到佢。
 
「俾個天我做膽都唔敢咁做啦,何況老爺唔俾人入呢個地庫嫁!」


 
佢越係咁講,我就越覺得可疑。
 
「開啊!」
 

 
(咔嚓~)
 
管家最後都係要屈服,開咗個鎖。
 
管家跟我行咗入去,呢度好暗,淨係靠門外面D光透入嚟先睇到嘢…
 
不過呢度乜嘢都冇,淨係得…
 


地板上面嘅一堆黃色鬼畫符。
 
「小姐啊,不如我哋走啦,呢度好陰森恐怖咁。」
 
「管家,呢度做乜嫁,做咩咁多鬼畫符嘅?」
 
「我唔知啊,不過老爺叫咗我哋千祈唔好入嚟嫁,呢度咁恐怖,不如走啦,我諗老夫人都唔會匿喺D咁嘅地方啦。」
 
「哼,我知喇!」
 
我一手就抆走晒地板D鬼畫符,仲發現咗另一道門添!
 
我一打開,見到一條樓梯係通向下面嘅。
 
「哼,早知有暗格嫁喇,嫲嫲仲唔係喺下面。」


 
講真丫,其實當時我個心已經唔係淨係想搵嫲嫲,我係好奇呢個地庫究竟用嚟做乜啫。
 
「小姐,唔好落去啊!」
 
我當然冇聽啦,仲慢慢行咗落去,而管家就喺上面等我。
 
「嫲嫲,你冇得走嫁喇,呢度又黑又霉又臭,出嚟啦。」
 
(咔咔~) 似係有D嘢撞到D木箱嘅聲。
 
我向聲音方向望過去,見到D嘢…
 
「嫲嫲,我見到你喇!」我隱約見到「嫲嫲」個頭頂喺木箱後面…
 


所以我慢慢行埋去…
 
到咗佢嘅位置,我就諗住一吓跳出去嚇佢…
 
「呢次仲捉你唔到!」
 
點知…
 
「嫲嫲」背住咗我,仲…
 
俾一條繩綁住咗…
 
「嫲嫲,你做乜俾人綁住啊?」
 
… (佢冇第一時間回應)
 
「嫲嫲…」我再叫叫佢。
 
「嗄,嫲嫲俾賊仔綁住咗,快D嚟幫我鬆綁啦。」「嫲嫲」終於出聲,但係…
 
聲音有D奇怪,不過喺我哋屋企就只有佢一個老人家…
 
所以一聽佢把老聲,我就…
 
幫嫲嫲佢鬆綁。
 
問題係…
 
我發現條繩並冇打結,只係就咁打圈打圈再打圈…
 
所以我就解圈解圈再解圈…
 
「嫲嫲呀,個賊仔冇綁住你噃,其實你大力D就可以鬆綁。」
 
「係呀?你幫嫲嫲解埋,等嫲嫲解釋你聽丫…」佢回應。
 
「好啊,解好喇。」
 
嫲嫲慢慢另咗個頭過嚟,仲…
 
「嘻嘻~!」對住我笑,但係…
 
佢根本唔係我嫲嫲,佢係一個…
 
一個個樣就好似鬼咁嘅老女人,喺呢度有限嘅光線底下,我淨係見到佢個鼻好大好尖,笑起嚟嘴角會去到眼邊咁…
 
呢一刻,我呆咗,唔知點算好!
 
「點解我自己鬆綁唔到?係因為呢條繩叫做綑仙索,嘻嘻~!」
 
我驚起嚟,將手上面嘅繩掟返去佢度,轉身就走…
 
第一吓起步就係有難度,因為太驚,但係當一起到步,個人就比平時走得仲要快…
 
我三兩吓就走返出花園,仲…
 
見返我真正嘅嫲嫲。
 
「嫲嫲,怪物啊,下面有怪物啊!」
 
(嚓 ~)
 
我抱住咗嫲嫲條腰,但係就聽唔到嫲嫲嘅回應。
 
我稍微側咗吓頭,望到喺嫲嫲旁邊嘅管家佢驚訝嘅表情…
 
我再向上望望嫲嫲個樣…
 
但係嫲嫲已經冇樣喇!
 
因為嫲嫲個頭俾隻怪物扯甩咗…
 
到我呆咗咁鬆開手嗰陣,我見到隻怪物喺前面幾米距離度…
 
食緊我嫲嫲個頭。
 
呢一刻,我就連憤怒同慚愧都爆發唔到出嚟,雙眼望住呢個情景,成個人就只有…
 
就只有崩潰。
 
「毛婆老妖?!做乜會出咗嚟嫁?」爸爸啱啱喺外面返咗嚟。
 
「毛婆老妖」見到爸爸,立即就另個頭嚟望住我,仲好似想衝向我度咁…
 
「布衣捉妖,金身護航!」爸爸大嗌一聲,將佢上身件衫掟咗過嚟保護我!
 
而「毛婆老妖」見到爸爸出手俾佢快,就唯有跳過外牆逃走咗。
 
我當時仲喺度呆緊,而爸爸就不斷追問管家發生咩事…
 
爸爸知道晒成件事之後,都冇鬧過我一句,可能因為佢真係好寵愛我…
 
爸爸就連管家都冇鬧過,大家各自返去做嘢,佢自己就去鎖好返地庫道門…
 
過咗一段時間,我哋就將嫲嫲嘅屍體葬咗喺屋企後山個家墳度。
 
葬完嫲嫲之後,我嘅憤怒同慚愧都一次過爆發返出嚟…
 
「爸爸,我要為嫲嫲佢報仇,求你教我布衣金身啦!」
 
「唔得,你女仔人家唔可以學。」
 
「咁…咁你或者請其他高人教我丫。」
 
「唔得啊,我講咗你女仔人家唔可以學囉。」
 
「點解喎?」
 
「總之唔得!」
 
爸爸從來都唔會喝我嘅,就只有呢一次。
 
雖然我表面係當算數,但係我嘅性格就係咁…
 
心裡面根本冇屈服過,所以喺我明查暗訪之下,終於搵到個高手可以跟佢學嘢…
 
我搵到佢…
 
火鳳派傳人,江雲林!
 

 
之後,我偷偷地去咗佢住嘅嗰間茅屋,入咗個圍欄,見到茅屋外面有個細路仔…
 
「喂,呢度係咪有個好出名嘅道士喺度嫁?」
 
「好靚啊!」
 
「鄉下仔,你呢度係咪有個咩咩咩鳳派道士啊?」
 
「Eee…係啊!」
 
「咁佢喺邊啊?」
 
佢呆咗咁望住我,之後竟然話︰
 
「我就係喇。」
 
呢次就係我同雞仔嘅第一次相遇。
 
(待續)
 
下集預告︰
 
「…我鍾意嘅咪就係神父你囉!」
 
已有 0 人追稿