第二十三集 ~ 雞︰師姐!(一吓撕裂嘅叫喊聲)

師兄佢就咁就走咗,而我就望到師父佢依依不捨嘅樣…

「多謝你啊,師父。」呢句係我喺心裡面代師兄多謝師父嘅。

我輕輕力閂返埋師父房門,就同師姐出咗去。





時間一日一日咁過去,又一段平靜嘅時間喇…

我同師姐嘅感情並唔係咩咩激情咁,而係好慢好慢嘅細水長流…

每星期一齊返教會,一齊唱歌,一齊分享,一齊跟師父學術等等等等…

感情慢慢累積起嚟,呢份初戀就係咁陪住我同師姐佢一齊成長…

(你係單戀,有冇諗過佢只係當你細佬咋,傻仔 ~)



「神音」講得啱,我真係有咁諗過,但係我又可以點丫…

我細師姐佢幾年,佢真係當我係細佬,我都冇計嫁…

我只係想佢開心,陪住佢,佢有難時,我總係喺佢身邊保護到佢啫。

何況…其實我覺得單戀人都都幾開心丫…

嗰份心意,一直埋藏喺個心度唔講出嚟,其實個感覺都幾好丫…



(死傻佬,自己呃自己啦你,你驚表白之後,連朋友都冇得做,你驚瘀喳嘛 ~)

係丫,我認啊,問世間又有幾多個單戀人嘅人唔係好似我咁嫁丫…

(我知你嫁,肯定唔甘心嫁,搵個方法chok下佢啦!)

知我者莫若「神音」也,我係咪太老即呢?

不過冇計啦,人仔細細就已經經歷咁多嘢,講真丫,當年「大戰殭屍王」嗰度…

俾著係我同年嘅細路,可能早就嚇破膽喇。

之後,我下定決心,只要有機會,我一定chok下師姐…

睇吓佢會唔會有機會鍾意我都好啊,嘻。



點知機會真係好快就嚟到…

「約翰神父,你咁急,去邊啊?」

「急就梗係有急嘅地方要去嫁啦,仲問,行開先啦。」

估唔到平時心平氣和嘅神父急起嚟,語氣都會變成咁。

我見佢負責嘅告解房度而家冇人,咪入去觀摩吓囉,點知…

「神父呀,我…我好似喜歡咗一個人啊…」

係…係師姐把聲啊!我亦傻吓傻吓咁回應咗佢…



「吓!?邊個啊?」

「咦,點解神父你把聲同平時唔同嘅?」

我本來都唔想扮神父嫁,但係…

機會嚟喇,可以知道師姐心裡面有冇我嘅機會嚟喇,我要把握,所以…

「我今…天有D唔舒服啊。你先將你嘅事情告解俾我聽先丫。」

我盡量用神父半鹹淡嘅廣州話回應。

「哦,係咁嘅…自從識咗佢之後,佢帶咗好多嘢俾我,最少最少啊,都有一大班教會嘅弟兄姊妹丫…」

「咳咳…」咦,講到咁,仲唔係講緊我!?



「我…我好似有少少鐘意咗佢啊。」正啊!真係架?我真係唔敢相信啊!

我已經開心到失晒暈,但係又記得係時候要走喇,唔係神父返嚟就穿煲喇…

「吓!咁…咁你…咁你就繼續鐘意佢囉,喜歡一個人又唔係錯嘅,你…你哋要一起努力啊!神父我唔舒服,要走先喇,你唔好走住,等我走咗先,免得感染你。丫,臨走前,想確認一下一D嘢,可以講個男仔個名俾我聽吓嘛?」

講我個名啦!講我個名啦!

點知…

「…我鍾意嘅咪就係神父你囉!」

(嘭 ~!) 晴天霹靂…



「吓!?」我個心當場死咗。

「Eee…算啦,咁你等我走咗你先走…啦…」我就好似個就死嘅人咁回應。

又點知…

「咦,大BEN哥!?」教友「大BEN哥」企咗喺告解房門口。

師姐亦同時嬲爆爆咁喺告解房行咗出嚟…

「哼,Phoneix你咁衰玩我丫嗱,我就唔同你講嘢。」

佢之後仲走咗去…

我個心嘅裂縫未修復,我就連行步路都有困難,所以我就係咁…

望住師姐佢走咗。

之後嘅好半個鐘,我就好似一條死屍咁,教友們叫我都冇回應。

但係…

當我稍為冷靜返,望一望遠處嘅天空…

我發現有D灰灰紫紫,妖氣沖天咁,好似唔太尋常,亦…

發現舊灰紫雲嗰邊就係師姐屋企嗰邊添。

「死喇,個天咁唔正常,睇嚟有妖怪,師姐會唔會有事嫁?」

我大嗌完呢句之後,就一支箭咁標咗出去搵師姐…

「師姐!師姐!」我跑到過去師姐屋企嘅嗰條小路之後一直大嗌。

突然…

遠處傳嚟一聲巨響…

(嘭 ~!)

我即刻向住聲音方向衝去…

點知…

我萬萬都估唔到…

我見到…

師姐佢…

佢…
(或許 ~ 終於要 ~ 放手了 ~)

我唔敢相信…
(縱使你我心機費了不少 ~)

師姐佢死咗…
(或許都知道救不了 ~ 某天有過之火 ~ 再也不燒 ~)

佢死咗喺地上面…
(那些過往溫柔 ~ 你我亦信可沒盡頭 ~)

「師…師姐…」呢一刻,我真正嘅崩潰…
(想不到共對多年後 ~ 讓你走 ~)

就只有攬住師姐條屍喺度喊。
(再會了 ~ 讓我哭 ~ 哭你我堅持仍然未能成事 ~)

時間過咗好耐,耐都唔知幾耐…
(再會了 ~ 讓我痛千次 ~)

我終於總算冷靜返落嚟,再慢慢抬住師姐嘅屍體返去搵師父…
(我痛心你我堅持 ~ 卻終於理智 ~)



「雞仔,做乜事啊?」師父見到我抬住師姐,即刻咁問。

「師姐…師姐…」「師姐」二字早就傳到師父耳邊,佢亦知道晒來龍去脈,所以我之後當住師父面前我都係咁叫師姐,再唔係叫「師妹」。

「師姐佢死咗」五個字到呢一刻我都唔想相信,所以亦都講唔出口。

師父喺我度接過師姐嘅屍體,冇發出過一聲,顯得好凝重…

之後望一望我…

「雞仔,我知道你好傷心,但係你係男仔嚟嫁,要堅強D,有更多嘅事仲要你去做嫁,你先講俾我究竟聽發生咗咩事先啦。」

「我…我唔知啊,淨係知道師姐喺教堂走咗之後,我見到佢屋企附近有妖氣,我擔心師姐佢有事…」

「唔好喊住喇,講埋先啦。」

「所以…所以我咪走過去睇吓囉,點知中途聽到一吓爆炸聲,我咪再去睇吓咩事囉,之後就發現…師姐佢…」

「得喇,你唔好咁傷心住,你休息吓先,我去準備一吓安葬麗葉佢嘅遺體。」

我之後冇再做任何嘢,只係呆咗咁坐咗喺地下…

而師父就突然發現咗D嘢,仲問我︰

「睇嚟我都傻咗,梗係掛住傷心,唔記得咗D嘢,麗葉個靈魂呢?」

「靈…靈魂!?」

係噃,頭先我一聽到爆炸聲就衝咗去,師姐應該只係啱啱死…

佢嘅靈魂冇可能咁快就唔見咗嫁喎。

「師父,係咪有咩蹺蹊啊?」

「我懷疑有人捉咗麗葉嘅靈魂,但係一時之間我諗唔到附近有咩人會咁做。」

「會唔會係妖怪食咗師姐嘅靈魂啊?」

「食靈魂嘅妖怪喺我哋住嘅呢區附近都應該冇,所以應該唔係,我係怕有人想用佢個靈魂做事。」

「即係點啊?」

「麗葉佢已經識用靈力,比起平常人,靈氣會較重,佢嘅靈魂比平常人,甚至係妖怪都要值錢,因為可以做到嘅事情會更多。」

講到呢度,我有D憤怒…

「係邊個?係邊個要咁對師姐?」

「我諗唔到。」

師父雖然咁講,但係我睇得出佢心裡面似乎係有人選嘅,只係唔敢相信。

「不如…師父用通靈術同問吓師姐丫!」

「可以,但係…」

「但係乜嘢?」

「佢啱啱被捉,捉佢嘅人應該冇咁快會用佢,我諗…要等個捉佢嘅人用完佢先,就…三日啦,三日後嘅傍晚應該差唔多喇。」

「要咁耐?」我雖然覺得係耐,但係我相信師父嘅判斷,所以我雖然有講出口,但係就好似自言自語咁講完就轉身行返入房。

呢三日嘅我就好似想行屍咁,完全冇做過任何嘢一樣,就連訓覺都冇,就只係期待住第三日嘅來臨,時間過得好慢,就好似過咗成千年咁,身體亦開始發出警號,不斷咁同我意志博鬥,真係好攰好攰…

「師姐,師姐,你冇事喇?你去咗邊啊?你冇死到啊?」

我眼前係一個完整嘅師姐,但係佢冇出聲,淨係不斷咁向後飄…

而我就不斷咁向前追…

「師姐,師姐,唔好走啊!唔好走啊!」

「起身喇,係時候喇!」我突然聽到師父把聲。

佢亦將我由夢境叫返出嚟…

「衰仔,你肯定好攰喇,發夢都仲掛住麗葉,睇嚟你真係好喜歡佢,希望通靈嘅時間啱啦,而家開始喇,去洗個面,準備見你師姐啦!」

(待續)

下集預告︰

伏魔劍十九式嘅始創人,林十九!?

註腳︰首歌係劉德華嘅《再會了》
已有 0 人追稿