米米蓮妖怪作品 -《再遇見到你》(長篇) (暫停刊): 第二十四集 ~ 鳳︰叫都冇用啦，最緊要係醫返好佢。
第二十四集 ~ 鳳︰叫都冇用啦，最緊要係醫返好佢。
冇見幾集唔知有冇掛住我呢？
(我掛啊 ~)
我心裡面好想聽到瑞基嘅呢把聲，可惜…
哼，上次講到我同余二十同雞仔一齊逃咗獄…
去到一棵大樹下面…
我幫余二十改咗名，佢而家叫做余忠義…
我哋仲結咗義，而家變成咗金蘭兄弟…
奇怪嘅係，我暫時要叫做陳鳳光。
「我，陳鳳光，今日同兩位兄弟結義於此，滴血為証！」
「我，余忠義，今日同兩位兄弟結義於此，滴血為証！」
「我，陳鳳初，今日同兩位兄弟結義於此，滴血為証！」
其實都唔知點解要「滴血」，不過滴少少血有D象徵意義都好嘅。
「係呢，雞仔，你做乜會攪成咁嘅？」我問。
「大哥連我叫乳名叫雞仔都知，果然神通廣大，我之所以殘廢咗，係因為我想逃獄，點知俾個獄警捉到，我唔夠佢打，仲俾佢整成咁，佢用燒熱嘅鐵棒壓落我對腳度…」雞仔講。
「你都唔夠佢打！？佢咩來頭啊？」我問。
「黐線架！？」二弟講。
「佢真係黐線嫁，不過佢好奇怪，雖然佢係咁對我，但係就同我講，話出面有人想殺我，佢話佢對我咁做係想釋除嗰個加害者嘅疑慮，仲話之後肯定有人會嚟救返我對腳，最起碼佢會相信，我之前都唔信嫁，淨係覺得佢係一個黐線嘅虐待狂，直到見到大哥你，我先稍為相信。」
「咁…想害你嘅人係邊個啊？」我問。
「我唔知，獄警冇講，我問極佢都唔肯講。」
「咁你點解會坐監嘅？」我再問。
「唔知，我當時只係去咗師姐屋企查D嘢，點知暈咗，起返身就喺監牢度喇。」
「咁…你會唔會知道一D關於個獄警嘅嘢丫？」
「佢…佢好似姓金嫁。」
「姓金！？出名又姓金嘅，應該得鏟家咋喎，但係又奇怪…」
「奇怪咩啊？」
「佢哋好似冇原因要害你或者幫你，不過算啦，我諗我哋要去醫返你對腳先。」
「邊個可以醫返我對殘廢嘅腳啊？」
「當今世上應該只有佢可以醫返你，佢係…醫神，陳逆瞬。」
「兩位兄弟，而家都夜喇，不如你哋都跟我返屋企先丫，我都有D掛住我阿哥。」二弟講。
「乜你有阿哥架？」
…
之後我哋就跟咗忠義佢返屋企…
「阿哥！我返嚟喇，我帶咗兩個朋友嚟啊！」
「返嚟喇？咁夜嘅。今晚開夜班啊？」一把中年男人嘅聲，但係好似…
「係咪有D奇怪呢？唔使奇怪啊，我阿哥佢係弱智嫁，不過仲識得煮嘢食同做家務，佢好叻嫁！」忠義回應。
我哋行到入佢家門，佢阿哥亦都啱啱好攞緊D餸出嚟…
「阿哥，呢兩位係我朋友，亦係我結義金蘭嘅好兄弟，呢位大哥，叫鳳光，呢位三弟，叫鳳初。兩位兄弟，呢位我哥哥，叫林十九。」
「林十九！？伏魔劍十九式嘅始創人，林十九！？」我覺得好驚奇。
「鳳乜鳳物過嚟食飯丫。」林十九講。
「二哥，點解你哥哥唔同你同姓嘅？」雞仔問。
「哦，係咁嘅，我哋同母二父嫁，阿爸阿媽就早死晒嚧，係阿哥佢養大我嫁。」
「吓！？佢…咁樣…可以養大你！？」
「阿哥佢係大約喺我十幾歲嗰陣先變成咁，不過佢而家都好叻嫁，家中大小事務都係佢負責，我淨係去搵錢嫁咋。」
之後，我哋都坐低咗食飯…
我望來望去都唔明白，點解林十九，一個世外高人會變成咁樣…
唔通只係同名同姓？我再諗諗我點解認識林十九，但係…
我竟然唔記得咗。唔通又係我空白咗嘅嗰幾年裡面識佢嘅！？我只係記得…
我識嘅「伏魔劍十九式」，唔係師父教嘅，好似係唔知喺邊跟林十九學咁嘅。
「嘩，唔係講笑，十九哥你煮D嘢真係好好食！」雞仔講。
林十九對住雞仔笑咗一吓。
「係呢，細佬，你又話去睇醫生醫返隻腳嘅，好返未啊？」林十九問余忠義。
「未啊，不過快喇，我哋聽日一齊去睇神醫啊，會去幾日嫁，大哥你一陣都執埋嘢一齊去丫。」忠義講。
而我就呆咗一呆…
帶完兩個殘廢都仲唔夠，而家仲要多個弱智嘅，話晒而家我哋都係逃犯丫，會唔會有D…
「大哥，你個樣做乜咁滑稽嘅？」雞仔問。
「大哥梗係覺得沿途有我阿哥負責衣食，好滿足頂啦！」忠義講。
「係…係…」我只能夠咁回應。
食完個飯，大家就去休息喇，佢哋安排咗個床位俾我…
唔啱，係俾我哋，我同雞仔孖舖…
佢就訓到鋸鋸聲嚧…
而我就諗緊好多嘢，一時之間認識到咁多嘢…
先有瑞基救我…
又有兩個或者三個余二十出現…
再有雞仔，一個喺呢個時代嘅自己出現喺我面前，而家仲要做埋兄弟…
仲有呢個林十九，一個唔知幾時喺邊度教過我「伏魔劍十九式」嘅人…
兼且佢仲要低咗能添…
真係太多奇怪嘅事喇…
嗰晚我冇訓到，直到天光。
我見到天蒙光，林十九就攬住一D嘢行咗出門口…
所以我咪起身八卦吓佢做乜，跟咗佢出去睇吓囉…
原來佢只係浪衫…
我諗住拍吓佢膊頭同佢講聲早晨啦，點知…
當我拍落佢膞頭度，我發現…
佢完來冇咗三魂七魄裡面嘅靈魂…
唔係咩恐怖嘅嘢，只係靈魂唔見咗…
就會冇咗智慧同分別善惡嘅能力，所以變得痴痴呆呆啫…
所以，我估係有D嘢嘅，並唔係單純弱智咁簡單…
「咦，鳳乜，早晨，你咁早起身嘅？」佢轉個身過嚟同我講。
「係…係啊，你又咁早嘅？」我回應。
「我不嬲都咁早嫁喎，一陣就係要去買餸，再之後就係抹地，執房，去附近睇人哋捉棋，聽雀仔唱歌，同旺財(附近人家隻狗)玩，開始入黑就要返嚟煮飯俾細佬食。」
我聽佢咁講，應該係余二弟教識佢一D每日都要做嘅事情，等佢唔會亂咗秩序，走失咗。
「阿哥，今日唔使喇，你唔記得咗尋日我話同你去街咩？」忠義都起咗身，行咗出嚟講。
「去街呀，好啊！」林十九聽到即刻好開心咁去執嘢。
「阿哥，執定三四套衣服丫！」
「二弟，你知唔知你阿哥係世外高人嚟嫁？」
「知又點丫，佢而家係弱智係事實，佢係咪高人對我根本唔重要，佢係我阿哥就一世都係我阿哥，我細個冇人照顧係佢將我養大嘅，所以我應承咗佢，亦應承咗我自己，呢一世都唔會放棄佢，我會一世保護佢。」
「就係因為咁，所以你即使跛咗都要出去受個打耙衰老細氣死死地氣打工賺錢養你哥哥？睇嚟我真係要對你改觀喇，我一直都以為你只係壞人，原來係有故事嘅。」
「我十幾歲就要出嚟賺錢，嗰時真係好困惑，好迷惘，真係想同阿哥一齊死咗去，但係我一見到阿哥，我就唔忍心落手，所以博晒命去工作。直至遇到「鬼頭佗」， 呢個人唔係對我好嘅，不過我有利用價值，所以佢亦將佢部份「鬼頭魔功」教咗我，諗住我可以幫佢做事，而我就只係想要生活費啫，佢叫我做咗好多違背良心同人性嘅嘢，為咗生活，我唔能夠唔做。「鬼頭魔功」我並唔係全部學識，但係我天生有感應力，學嘢好快，所以我將「鬼頭魔功」改良，變成「血鬼頭魔功」，所以我只有一次機會，就一次機會啫，我就將「鬼頭佗」殺咗。仲因為殺咗佢，所以出埋名添，不過諷刺嘅係，而家嘅我，又做返普通人，甚至係一個廢人…」
「唔廢丫，撥亂反正啫，好事嚟丫。叫醒雞仔，我哋出發啦！」
…
我帶住佢哋三個，就咁就行咗上山…
叫得醫神嘅，總係鍾意住喺深山嘅，其實佢哋明唔明好多人需要醫生嫁啫？
好心就住近D民居啦！
行咗成朝，終於到咗…
「竹林深處人家！？」
真係有個牌匾咁寫住嘅。
我當然知道呢度叫咩名啦，因為係我帶佢哋嚟家嘛，大驚小怪大嗌嘅係雞仔。
我哋行咗入去呢個「人家」…
「請問陳逆瞬老人家喺度嘛？」我大嗌，睇吓有冇人回應。
呢度小橋流水，到處都係流水聲，草屋，樹景，風和日麗，就好似風景畫咁靚。
我大嗌嘅回音配上雀鳥嘅叫聲，更加令呢度變成仙境一樣。
之後，一個好後生嘅女仔行咗落嚟…
「請問你哋係邊位啊？」佢一把溫柔嘅聲，笑得幾甜，係一個幾可愛嘅女仔。
「我叫陳鳳初，丫唔係，佢先係陳鳳初，我係陳鳳光，呢位係余忠義，仲有佢哥哥，你都見到啦，佢哋兩個隻腳都有D病，所以想搵陳逆瞬佢老人家醫吓佢哋。Eee…請問小姐你又係陳逆瞬佢老人家嘅邊位呢？」
「嘻，我係佢徒弟，我姓曾，名叫潔靈，你哋叫我靈兒就得嫁喇，師父佢出咗門，冇三兩個月唔會返到嚟嫁喎。」
「咁…似乎太長時間喇，或者我哋唔打攪佢老人家住，我哋自己再諗辦法啦。」
「你哋唔使咁失望噃，醫呢幾隻腳，有我就夠啦！」
「你！？」
「係啊，雖然我唔及我師父十分之一，但係應該足夠醫你哋嫁喇。」
「好！多謝，靈兒醫師，咁…請你帶一帶我哋去醫療嘅地方啦，唔該。」
「呢邊請。」
我哋跟咗佢行入竹屋裡面…
「係噃，你哋驚唔驚鬼嫁？」靈兒問。
「吓！？」
「屍變呢？」佢再問。
「吓！？」
「我一到咗夜晚就會屍變，個樣會變得好恐怖嫁喇，你哋唔好介意噃。」
哼，我哋三個係何許人啊，其實點會驚丫，只係奇怪佢點解要咁問啫。
我亦有借D倚感受一吓呢度有冇妖邪嘅靈氣…
當然最後都係冇啦，反而…
「你哋都唔回應我嘅，俾我嚇親啊？」靈兒佢咁講。
我即刻俾個眼色雞仔同忠義佢哋睇，叫佢哋扮吓驚。
佢哋都表示明白，仲回應︰
「係啊，我哋好驚啊，咁點算好啊…」
因為我哋唔知靈兒佢問呢D嘢係想點，我覺得有人驚又有人唔驚咁樣可以引到靈兒佢講晒兩邊嘢出嚟，所以我諗住話我見慣世面冇乜好驚啦，點知…
「傻仔嚟嘅，有乜好驚啫，有我係度，乜鬼都唔驚！」講嘢嘅係林十九。
我諗林十九係潛意識想保護自己細佬，所以咁講。
唉，我都唔記得講添，頭先個「反而」係講我感受到靈兒嘅靈氣雖然係善良嘅…
但係佢唔係人。
我冇諗住揭穿佢，亦估雞仔同忠義都同我一樣會感覺到…
所以只要靈兒真係幫到佢哋就夠喇。
我哋一齊坐咗係內堂地上面嘅地毯度…
「丫~~~~~」
「哇丫~~~~~」
靈兒突然同時間捉落雞仔同忠義隻殘腳度…
「做乜嘢啊？」我問。
「冇乜嘢，只係試吓佢哋隻腳死咗未啫，睇嚟佢哋只係郁唔到，有得救。不過…」靈兒回應。
「不過咩啊？」我再問。
「你都知呢度規矩啦，要答中我出嘅智力題先可以救人。」佢再回應。
「吓！？咁…你出啦。」
「一蚊三隻小雞，三蚊一隻中雞，五蚊一隻大雞，點樣用一百蚊買到一百隻雞？」
下集預告︰
…佢哋兩個真係好襯，根本就係神仙眷侶…