米米蓮妖怪作品 -《再遇見到你》(長篇) (暫停刊): 第三十集 ~ 鳳︰我咪救咗你囉，仲…咩話？要我去七重妖塔？
第三十集 ~ 鳳︰我咪救咗你囉，仲…咩話？要我去七重妖塔？
金玉麟！？咁熟嘅？係邊度聽過呢？
(你理吓我哋先得唔得啊？死喇！)
係噃，我差D唔記得咗我兩個兄弟添。
上一次講到靈兒醫師要我上山搵藥引嚟醫佢哋…
途中我仲遇到一D怪事，但係總算成功搵到…
當我帶住藥引返嚟嗰陣，發現呢度竟然發生咗一件慘劇…
「忠義阿哥，究…究竟發生咩事啊？」
當時林十九係呆咗咁抱住余忠義嘅上半身。
「個…個妖女襯住我唔為意，斬咗細佬佢哋D腳啊！我…我驚起嚟咪打佢囉…點知…點知殺咗佢啊。」
「你…你殺咗靈兒？」
我問完呢句，冇等佢回答，就衝咗去睇睇靈兒，點知…
「喂，嗰位先生冷靜返D未啊？」係靈兒佢訓住喺地單住眼咁細細聲問我。
佢冇死就好喇！
我另轉頭望一望林十九，再另返轉頭回應靈兒︰
「冇事喇，佢冷靜咗落嚟喇，但係可唔可以同我講頭先發生咩事啊？」
「冇事就好喇。」靈兒佢坐返起身。
林十九都有望過嚟，我驚佢又發癲，所以…
「忠義阿哥，你冷靜D先，俾我聽完醫師講吓發生咩事先！」
林十九佢傻戇戇咁冇做任何動作。
「頭先係咁嘅，我驚嚇親呢位先生，所以叫佢幫我出去攞少少嘢，其實我係想斬咗而家訓喺地，你嗰兩位朋友嘅廢腳…」
「冷靜D！冷靜D！聽埋先！」我見林十九又想出手，所以阻止咗先。
「我要斬咗佢哋嘅廢腳先可以醫到佢哋嫁，放心啦，斬之前我已經幫佢哋麻醉咗，佢哋而家只係訓緊啫，未死嫁，不過頭先止止吓血就俾呢位先生阻住咗，而家佢哋流多咗少少血囉。」靈兒佢繼續講。
「少少！？而家成地都係血噃！」我講。
「嘩，D血多到洗地都夠嚧。」藥引「得得B」講。
「車，又唔關我事嘅。頭先我差D死埋添啊，好在我識扮死咋。呢位先生一個箭步就衝咗埋嚟，仲想出手殺我，我咪即刻身體壓前，似係俾佢撞親咁，順勢訓低用丹田呼吸，造成假死現象囉。」靈兒佢一邊講，一邊著手收拾殘局，幫忠義﹑雞仔佢哋止返血先。
「哦，咁冇事啦，忠義阿哥你都可以放心喇，你細佬佢冇事，俾醫師幫佢止血先啦，你放心啦，佢好叻嫁，一定可以醫返好忠義。」
「咩…咩係忠義啊？細佬朋友你講緊咩啊？」林十九問我。
「哎吔，我都唔記得同你講添，余二十，你細佬佢之前同我一齊經歷咗一D嘢，所以我同佢同嗰邊嗰個冇咗雙腳嘅後生仔結成咗異姓兄弟，你細佬仲話想痛改前非，所以改咗個新名，叫做余忠義，所以我就叫佢忠義囉。」
我講完一大輪嘢，就好似冇講過咁，佢嘅回應，就係得個呆樣。
所以我都冇得再理佢，佢唔好又走去殺阿靈兒就好喇。
「係呢，靈兒醫師，我多口八卦問句丫，你會用咩方法醫佢哋啊？」
「我師父成名醫術，種生機！」
「種生機！？哈哈，我有聽過，不過去到我個年代，D人係用嚟呃神騙鬼嫁。」
佢講起呢句，我又唔知做乜突然有D思鄉情緒，真係有D掛住香港。
我諗諗吓嘢，仲諗起師父﹑師兄，香港班同事同學生，仲有…
師姐同瑞基，唔知佢哋點呢？
「係呢，種生機係點嫁？」我諗完嘢又多口問多句。
「乜你男人之家，咁八卦嫁，哈哈，好啦，講你聽啦。先將身體部份拆離人體，再用植物取代人嘅身體，植物要選用適合嘅就係技術喇，再要藥引靈力相助，其實唔用佢哋都得，不過醫師本身要唗多D自己嘅靈力，用靈力接合植物同人體，令人體知覺復元，至於被拆離人體部位，就要用另一種醫術嚟令佢所有機能重生，呢種技術叫納米治療術…」靈兒佢天真可愛，真係點睇都唔似個醫生，佢好欣賞佢師父嘅醫術咁，佢一一向我解釋返晒。
「納米治療術，乜又一樣咁似呃人嘅醫術嘅。」我笑笑口回應佢。
「咩呃人啊？第二個我唔敢講，我師父就肯定冇呃我…」
佢好似好耐冇講過嘢咁，所以我咪俾多D位佢講嘢，同佢傾吓計囉…
「咁又點解啊？」
「我個名，曾潔靈，係師父幫我改嘅，意思係真正純潔嘅精靈，我諗你班人都唔係普通人，應該一早估到我唔係人啦，冇錯，我係隻竹林精靈，係守護呢個竹林嘅精靈…」
「咁又點解你跟咗醫神學習啊？」
「我本來以為師父係壞人，不過見佢留咗喺呢個竹林一段時間都冇任何破壞，所以留意一下佢，點知每次見佢，佢都係醫緊人，所以我咪好奇囉。佢係我見過佢最犀利，最鍾意幫人嘅人，所以我之後咪成日偷偷地跟佢學嘢囉…」
「偷偷地！？你唔係話俾我聽你冇正式跟佢學過嘢啊？」
「哈哈，你估吓呢？」
佢咁講，我真係有少少驚佢真係冇料嘅。
不過我嘅懷疑好快就被釋除…
「師父佢叫你入去喎。」靈兒突然咁講。
「師父！？老先生佢唔係出咗門，有排都未返咩？何況…你點聽到啊？」我問。
「我呃你喳嘛。」
「你講邊句先？」
「我講師父出咗門係呃你啊，我聽到師父講嘢係因為師父用咗千里傳音，佢喺我耳邊講叫我叫你入去，佢話有人想見吓你。」
呢個女仔真係…
好似講嘢冇句真咁嘅，我只係希望佢真係有料救到忠義同雞仔。
佢叫我入去，咁我咪順吓佢意囉，我起個身就慢慢行入去內堂。
「唔好意思，打攪晒。」我慢慢打開門，見到…
「你就係火鳳派嘅後人嗱？」
一個黑皮膚嘅女仕坐咗喺枱邊，另個頭過嚟向我咁問。
「你…你係醫神陳逆瞬！？」
「你死架？陳逆瞬咁大個人喺嗰邊你睇唔到咩？」佢鬧我。
我望一望落地扇窗嗰邊，有個擺晒甫士望住外面嘅老人家企咗喺度…
「先…先生你係醫神陳逆瞬？係你叫我入嚟？」
我見到佢一頭白髮，白髮長到腳踭，外面嘅陽光映照住佢嘅白髮…
就好似散發出一陣仙氣一樣，一睇就知係高人。
「唔係我噃，係呢個黑鬼肥婆叫你入嚟嫁喎！」醫神佢另個頭過嚟咁回應我。
我當堂打咗個突，再望返去呢個黑人女仕身上。
「望咩啫？唔好話俾我聽你連我都唔識啊？唔識我，你好打都有限，你唔該出返呢個門口啊。」佢咁同我講。
但係我諗咗一諗，我諗我真係唔算係認識佢，不過…
佢應該就係…
大名鼎鼎嘅…
「臣婆！？占星二絕，風婦臣婆裡面嘅臣婆，係咪啊？」
「點解係都要連埋個死人瘋婦一齊講啫，我叫珍妮積臣啊！冇名你叫咩而家？不過算你啦，總算知我係乜水。」
「Eee…前輩，唔知搵我咩事呢？」
「一定要有事先搵得你嫁咩？你咩新鮮蘿蔔皮咁巴閉啊？」
「唔係，當然唔係啦。」
「你去白頭老坑嗰邊丫！」
「吓！？」我雖然咁回應佢，但係都有聽佢講咁做…
我慢慢行咗埋去醫神度。
「你睇吓遠處係咪有粒星？」臣婆咁問。
出面仲有日光，點會有星啊？不過…
點解遠處有一點黑色嘅？
「見唔見到嗰粒污糟咗嘅星啊？」臣婆再問。
我真係有少少想發佢脾氣，乜差嘢污糟咗嘅星啊？人哋明明係黑色喳嘛。
「嗰粒星係原本係發出金光嘅，而家被污染咗，已經變成黑色，意思即係有隻大惡魔已經重生咗喇，仲可能會毀滅世界添。」
「哈~！」唔好意思，我真係笑咗出聲，因為佢講嘢真係…
好似當我白痴咁，呢度雖然唔係二零零零年啫，但係八十年代都有晒軍備啦…
仲講咩毀滅世界喎，咪笑大人個口啦，除非係希特拉再世啫。
「你笑呀？你笑咩？」臣婆質問我。
「唔好意思啊，前輩，我真係笑咗，因為而家咩年代啊？打可能我哋呢D江湖術士仲打得吓，但係講到毀滅世界，而家D人有鎗有炮，點會怕你咩鬼怪啊？」
「哈，枉你係火鳳派傳人，我哋呢類人，殺人要用刀劍嫁咩？毀滅世界又點解需要鎗炮啊？毀滅人心，令當權者人心腐化就夠啦。」
一言驚醒夢中人，我真係諗嘢太現代，頭先竟然連咁簡單嘅道理都諗唔到。
「前輩，我失言喇，請你原諒。」
「哈哈哈，開心D啦，大家使乜咁愁丫，飲返杯茶先啦。」醫神想緩和氣氛。
醫神個樣係典型樂觀派嘅仙人款。
「飲咩茶啊？我都未講完，你睇吓嗰邊！」
臣婆起身，拍一吓我膊頭就指向扇窗外面嘅遠處…
佢指住咗一個塔。
「呢個係…七重妖塔？錄欽城至寶，七重妖塔？」
「冇錯，我想你去一敞！」
「點解啊？」
「我叫你去就去啦，問咩啫？」
「咁…咁我都要知道做乜先去得架…」
「你嘅命運喺嗰度！」
「命運！？」
「你係咪仲想問啊？」佢語氣變得更重，就好似如果我再問，佢就郁手打我咁。
所以我冇再問，轉個身就諗住去，但係…
我發現自己身上冇錢，所以忍唔住都要問埋呢一條問題︰
「可唔可以借D錢嚟先啊？」
不過換嚟嘅係…
「仲問丫嗱！係都要問丫嗱！我就打到你唔再問！」臣婆佢即刻就追打過嚟。
我當然即刻飛奔啦，仲經過靈兒佢哋…
「咁靈兒你幫我睇住我兩位兄弟喇，我會好快返嚟嫁！忠義阿哥辛苦你喇，得得B唔該晒啊！」
…
我一支箭咁，一口氣跑咗冇十公里都有幾千米路…
我定個神嚟，抖抖大氣，望去遠處個七重妖塔度…
原來只係差大約多千幾米路就會到。
我心諗，死人臣婆，係都唔肯講多D嘢我聽，都唔知叫我去嗰度做乜？
但係我諗諗吓，佢係占星神人，叫得我去嗰度，嗰度應該係會有嘢同我有關嘅…
所以我開始起行，慢慢行去七重妖塔。
…
去到呢度，呢度異常清靜，唔好話人，就連鬼影都冇隻…
所以我慢慢行去入口，但係…
突然…
「你做乜嘢？想入去啊？有冇錢先？」
我身邊出現咗兩隻比我仲要高兩三個頭嘅魁梧怪物…
我摸一摸自己個袋，發現空空如也…
「冇錢冇計傾噃。不過…你乜水啊？竟然可以將咁強嘅靈力壓制到只有半米範圍我哋先感覺到？」
下集預告︰
我覺得雙腳有D感覺，所以向下一望…