米米蓮妖怪作品 -《再遇見到你》(長篇) (暫停刊): 第三十一集 ~ 龜︰我喺妖塔喇！仲去到第二層…
第三十一集 ~ 龜︰我喺妖塔喇！仲去到第二層…
鳳初！我之前留俾你D錢呢？你使晒喇咩？
(跟我學嘢要專心D，我唔准我徒弟咁容易分心嫁。)
係噃，周白波上次識穿咗我係女仔之後，仲話要做我師父嫁喎。
「既然你有咁嘅靈力，就要有一定底力去載返咁多靈力，唔係會慢慢冇晒嫁。不如咁啦，以後你跟我啦，我教你嘢。」
「吓！？」我嘅回應。
「底力，即係根底嘅力量，就好似一個水池咁，靈力就好似水咁，冇一個大嘅水池，水就會慢慢流走晒，所以既然你有咗雞仔嘅靈力，不如就練吓個根底，等D力量有D作為都好丫，唔係再過一段時間就會冇晒嫁喇。就咁話啦，由今日起，你就係我周白波嘅徒弟，你叫咩名啊？」
「陸…陸瑞基。」
之後，我哋仲傾咗好多有關於男男女女同唔同道術流派嘅嘢…
估唔到嘅係…
周白波佢仲有一顆少女嘅心，我哋傾得好開心。
…
好快咁，又到咗第二日，我哋就再次出發去七重妖塔…
「前面就係七重妖塔喇！」錢阿土指住一座樓塔講。
「你哋係咪已經入過去？」周白波講。而家我或者用老師嚟稱呼佢啦。
「入過喇，頭兩層應該好簡單，估計月兒最少喺第六層。」易面容講。
「門口好似有兩隻…妖怪把關噃。」我見到，所以咁講。
「係啊，一般人睇唔到嫁，係我哋呢D有一定靈力嘅人先睇到，一般人係冇辦法入到呢座塔。」易面容回應我。
「咁行啦，等咩啫？」白波老師講。
「有錢使得鬼推磨，門口呢兩個守衛能力唔低，不過有錢就易攪掂。」錢阿土講。
「上樑不正下樑歪，陸羽石條潤腸，就連佢身邊D牛鬼蛇神都係貪財好色嘅，好在陸小姐你扮成男人咋。」易面容講。
「咁我呢？」白波老師問。
「塵世間又有邊個唔俾你嘅威名所壓到丫？邊個夠膽鹹濕你？」易面容回應。
白波老師竟然默認咗，冇再回應。
而錢阿土佢就行咗前去兩個守衛度…
我見到佢好似俾入場費咁…
我哋之後就好似入場睇戲咁，好簡單就一齊入咗去裡面。
(嘰~ 嘭~！)
入到去之後，門口自然閂埋咗，感覺有D奇怪。
我覺得雙腳有D感覺，所以向下一望…
原來呢度地下有一層水面，水面浸過咗我腳掌…
呢度唔係咩陰森恐佈，只不過有D似D種水種植物嘅地方…
不過D水好清，植物又只係每一段距離咁先得幾棵草咁…
樓底就最少有十層樓高，個天花係奇怪嘅，因為好似一個幕咁，有雲有光…
我嘗試行前幾步，發現原來D水位會愈嚟愈深…
但係我就感覺到易面容同錢阿土愈嚟愈高咁…
「你兩條死佬係咪博鬧啊？你兩個就企喺法術上面，我同基仔就濕晒對腳！」
白波老師佢竟然叫我做基仔，我覺得好似有D尷尬。
「老師呀，我係女嚟嫁，你叫我阿妹咪得囉。」我講。
「咁你又叫我老師？你叫我白波姐姐，我咪叫你阿妹囉，傻妹。」
「嘻嘻，好啊！」
「你兩條醜樣捨得答我嘢未啊？」白波姐姐另返過去同佢哋講。
「我哋見你兩師徒傾緊計，唔敢打攪你哋咋，唔係你咪又鬧我哋…」易面容講。
佢又好似講得幾啱噃。
「何況你頭先唔係問我哋係咪博鬧咩？我唔敢答啊。」錢阿土講。
「咁你兩個係咪想死丫？快D幫我諗辦法！我唔要濕身！」白波姐姐語氣加重。
「好，不過我用嘅係「綠葉水上飄」，我自己可以將體重抑壓，踩住一片樹葉喺水上面飄浮，但係幫唔到你哋減體重，所以你哋跟我唔到；而阿土用嘅係「土行雲」，泥土由佢對腳度出嚟嘅，伸到去踩到水底，頂起人身嘅，所以唯一你哋用到而又唔濕身嘅嘅方法就係…阿土佢抱住你兩個行，你哋覺得好唔好丫？」易面容講。
我同姐姐當然即刻另頭啦，唔係話歧視阿土佢醜樣啊，不過…
我哋都係女仔嚟家嘛，點好意思俾個大男人抱住周圍走啫…
「我諗到辦法喇！」白波姐姐突然大嗌，仲…
「扇風，點火！」
佢用扇嘅風力將錢阿土撥到失去平衡，跌咗落水…
(揼~) (落水聲)
再用火點燃易面容腳下塊樹葉…
(揼~) (落水聲)
「哇，你攪乜嘢啊？」
「哇，做乜事！？」
「我又唔係一定要唔濕身，我只係唔抵得你哋可以唔濕身喳嘛，而家我心都涼晒喇，繼續行啦。」白波姐姐咁講。
就連我都覺得有D無奈。
之後我哋四個就一齊濕住下身慢慢行…
「喂，醜樣，又話你哋嚟過嘅，呢層有乜嘢要打要解決嫁？成身濕晒喇，好煩啊！」
「原本我哋兩個，一個用「綠葉水上飄」，一個用「土行雲」，喺水上面行，一陣就去打呢層隻大妖怪喇，而家咁濕住身行，起碼慢十倍啦。」易面容講。
「你而家係咪俾說話我聽丫？一係我返轉頭，你哋自己去救申月兒喇，好嗎？」
「唔好，唔好，聽你嘅，聽你嘅，慢慢行，慢慢行。」錢阿土講。
好在，個水位暫時都仲係到我哋腰間啫，我哋繼續向前行…
咦，好似見到條上樓上嘅樓梯喇！
「咁奇怪嘅，水鬼水妖嘅呢一層點解連一隻鬼怪都冇出現過嘅？」白波姐姐講。
「一講曹操曹操就到喇！」錢阿土講。
我見到一隻…
一隻嘢喺我哋面前慢慢由水度升上嚟…
佢身上嘅水，好似流唔完嘅咁，一直流，一直流…
佢係一隻長髮女鬼，全身呈清水藍色…
「高人你哋好！」佢對住我哋咁講。
「有咩事？快D講。」錢阿土突然顯得好有霸氣。
「上次高人你哋打敗咗我哋層主之後，佢仲未好返，所以請幾位直接上樓上啦。」
「咁順攤？」白波姐姐都覺得愕然。
「乜之前你哋打到佢好傷咩？」我問錢阿土。
「嘻嘻。」錢阿土佢淨係傻笑，好似有D尷尬咁。
「阿土佢個衰仔，上次用一招「土包子」，將舊泥塞咗入隻嘢個口度，再用「土生土長」之術，將舊泥倍化變咗做巨岩石，你哋諗吓咁大舊嘢喺身體裡面，佢仲點作惡丫。阿土佢都算好人嫁喇，如果佢用埋必殺技「土地僧直碎」，將隻嘢身體舊岩石爆開，佢肯定死得好慘。」易面容講。
「哇，難怪隻層主妖怪，甚至D水鬼水妖都唔敢行近我哋啦，佢哋睇嚟怕咗你。」
「傻妹，仲講？快D上上層，等我用火烘返乾你個身先啦，唔係中途冷病咗就煩喇。」白波姐姐咁同我講。
我哋之後就一齊行上呢條樓梯，我仲發現…
「呢度有個凹位，使唔使入去睇吓啊？」我問。
「唔使啦，我哋上次都冇行入去，一樣可以上到第二層。」錢阿土講。
之後我哋繼續向上行…
途中穿過一個影幕，估計就係分開妖怪樓層作用嘅一個保護幕…
好快咁，我哋就到咗第二層…
呢度個天幕同高度都同第一層差唔多，但係地上面係泥土，再唔係水層…
(吱吱 ~ 吱吱 ~) 地下傳嚟D咁嘅聲。
「唔使驚，我哋烘返乾個身先。」白波姐姐烘乾緊我同佢個身。
「你哋唔使烘乾個身咩？」我問易面容同錢阿土。
「都冇人幫我哋烘乾。」錢阿土。
「又想俾說話我聽呀？蝦！自己烘啦。」
白波姐姐「蝦」一聲點咗個火喺地下俾佢哋用。
(吱吱 ~ 吱吱 ~) 地下再傳嚟D咁嘅聲…
我望一望聲音方向，見到…
一D好似田鼠咁嘅嘢。
「咦，佢哋好得意啊。」我咁講。
「哈，得意！？妖怪嚟嫁。」易面容佢笑我。
「咁妖怪都可以得意啫。」我回應佢。
「佢個頭就得意，佢個身體係赤裸裸嘅男人嚟嫁。」錢阿土講。
我一聽到，再諗到隻妖怪個樣，就想嘔喇。
睇嚟呢層會好惡攪…
因為我稍為定神，向前一望，原來周圍都係田鼠頭﹑稻草人…
遠處仲有一個…
一個農夫！？唔通佢就係呢層嘅層主妖怪？
(待續)
下集預告︰
「男人大丈夫，流血不流淚」