第四十一集 ~ 鳳︰等我…咩話?機械人?
 
原來我係咁樣學識《伏魔劍十九式》架?
 
我真係唔記得咗,正如我之前咁講,應該係有一個原因…
 
令到我冇咗呢段時間嘅記憶,不過到而家都仲未知係乜原因啫。
 

 


入咗呢個七重妖塔之後,我遇到「小雲」呢個唔似神仙嘅神仙…
 
唔知點解,我覺得好似識咗佢好耐咁…
 
所以有佢喺我身邊嗰陣,我真係覺得自己連力都大D。
 
呢度嘅頭兩層,對我嚟講都唔係太難應付,都俾我同小雲攪掂咗…
 
但係人始終係人,係要休息吓嘅,所以我揀咗呢個較安全嘅地方休息…
 


喺第二層同第三層中間嘅呢一個凹位。
 
小雲佢俾咗支水我飲,但係…
 
(咔咔 ~) 我飲緊水嗰陣,左手撞到一D嘢。
 
我發現咗一個盒,仲打開咗佢…
 
「鎖匙!?」小雲佢都行咗埋嚟睇。
 


「做乜呢度咁多鎖匙嘅?」我問。
 
「我點知噃。」小雲回應。
 
個盒裡面唔係得一條鎖匙,而係一大堆一樣嘅鎖匙…
 
我攞起其中一條,再望望四周圍…
 
仲喺呢度發現咗個鎖匙窿,所以我好自然咁隊條鎖匙入去試吓開,點知…
 
(窮窮,窮窮,窮窮窮 ~) 一道石牆向上開咗。
 
「我知我窮,都唔使咁串我嘅。」我只係白痴噏廢話。
 
我隊咗個頭入去個石門度睇。


 
發現樓下有兩層,樓上有五層,呢個位就好似一條煙囪咁…
 
再正確D嚟講,呢度係一個無(車立)嘅(車立)槽。
 
我覺得奇怪,亦好直接咁有個感覺…
 
「唔通憑呢D鎖匙同呢個煙囪就可以自出自入呢度嘅?」我諗。
 
我仲好快有第二個感覺…
 
「咁頭先我咪蠢咗,第一層嗰度我唔記得攞鎖匙噃。」我再諗。
 
「你諗乜啊?呢D鎖匙唔使幸啦,你又唔會再嚟嘅。」小雲咁講。
 


我望一望小雲,諗一諗「臣婆」所講嘅「命運」,突然有個想法…
 
「唔通小雲就係我嘅「命運」?」我仲諗到出埋聲添。
 
至於小雲就冇回應我,淨係紅晒塊面咁。
 
「你做乜紅晒塊面啊?」我問。
 
「你…你識條毛毛咩?神仙發嬲先會面紅嫁!」佢仲…
 
將我推咗落「煙囪」…
 
「哎吔!」(噗 ~) 我跌咗落樓下,死唔去嘅,係個PAT痛D啫。
 
我仲順便查一下下面呢兩層嘅石門…


 
確定咗第一層係冇鎖匙真係冇辦法開到嘅…
 
至於地下嗰層就…
 
(窮窮,窮窮,窮窮窮 ~)
 
竟然可以開到出去。
 
我仲發現原來呢個位好奇怪…
 
景色係唔錯,但係前面係一大個湖面,一望無際…
 
可以踏足嘅地方大約只有一兩個人嘅位。
 


除咗撐船仔嚟,我諗就只有高手先可以嚟到…
 
仲要一定係知道呢度有道門嘅人先得。
 
我查完之後就跳返上去搵小雲。
 
「冇乜特別,休息一晚先。」我咁講,點知…
 
「冇乜特別丫嗱!」又俾小雲推咗落去。
 
我諗佢肯定係以為我串佢。
 
不過算啦,我都費事再跳返上去,直接就喺呢度訓咗。
 
呢一覺我真係訓得幾好,一訓就訓到…
 
「小雲呀,而家幾點啊?」我爬返上去二樓嗰度講,而小雲就依然喺度。
 
「唔知,不過你最少訓咗十二個鐘。」
 
休息夠,我用小雲支水拍拍塊面就又再出發去第三層…
 

 
「唔係咁攪呀?迷宮!?」我呢一世仔,最討厭嘅遊戲之一。
 
呢度有三個入口,好明顯就係一個迷宮。
 
「小雲呀,你係土地,不如你循地或者穿牆去睇吓丫。」
 
佢冇應我,仲用一線眼望住我,似乎仲嬲緊。
 
雖然我唔知佢嬲乜鬼嘢,但係就一於少理…
 
再正確D講,女人發緊嬲都係少惹為妙,所以我唯有靠自己。
 
我諗住呢度得三個門口,好快行晒啫…
 
我咪由左邊開始,順時針續個行囉。
 
我先由左邊門口入咗去,小雲雖然冇出聲,但係都咋咋啼跟住我行…
 
行咗大約三分鐘,終於好自然咁遇到第一隻妖怪,但係…
 
「咩嚟嫁?機械人!?」
 
佢有手有腳,全身黑色,正方形身體加正方形頭,兩隻眼係求其兩個黃色圓形…
 
長方形就係一個口,最白痴仲要有盞燈喺個頭頂,最攞命係…
 
耳邊仲有條波棍。
 
「我嗰代D細路仔都唔玩啦!攪乜啊?」我都忍唔住爆咗出口。
 
但係個機械人就…
 
(嗚…嗚…嗚…) 竟然學人喊,仲要用機械人嘅聲音喊。
 
「攪乜啊?你喊呀?」我問。
 
「人唔傷心唔流眼淚,你講中咗我傷心處,冇錯,我就係俾人拋棄嘅機械人公仔。」
 
佢講到咁,我都戥佢唔開心,真係忍唔住想安慰吓佢。
 
「你節哀順變啦,係佢哋唔珍惜你啫。」
 
「我知丫,所以…我一早就報咗仇,殺咗佢啦,哈哈哈哈哈!」佢咁回應我。
 
我亦立即感覺到氣氛有D異常,不過喺呢個妖塔裡面應該叫做正常。
 
呢隻機械怪似乎好記仇,對人類仇恨好深…
 
佢妖氣都唔弱,仲似乎想將我煎皮拆骨添。
 
但係我脾氣亦都唔係小嘢…
 
「我好心氹你你唔受,咁你唔好怪我喇。」
 
「OVER!OVER!」佢仲喺度用埋D白痴聲音回應我。
 
咦,咪住,佢…
 
唔通係拖馬?
 
之後,無聲無色無啦啦,突然間,周圍都嚟咗一堆機械怪物圍住我同小雲。
 
「你攪唔攪得掂嫁?」小雲問。
 
「唔知,淨係覺得而家有D似超級機械人大戰。」
 
而家圍住我哋嘅,圍數最少有二三十隻嘢…
 
唔係全部都係機械人,有D只係金屬系妖怪…
 
因為太多我都形容唔晒佢哋,就講吓最出名嘅呢隻啦…
 
「嗰隻係鐵甲萬能俠,我屋企都有隻啊!」我同小雲講。
 
「咁喺你屋企有冇打輸過俾佢啊?」小雲佢好似串緊我。
 
「雖然佢有原子光線﹑冷凍光線﹑高熱火焰同金剛飛拳,但係我係唔會怕佢嫁!」
 
我就連白痴動作都做埋,成四十歲人,有時連我自己都頂唔順自己。
 
所以亦都好正常,全場金屬妖怪都俾我嚇窒咗。
 
「知驚喇咩?」我咁講,但係…
 
成日「OVEROVER」嗰隻「趴街」襯呢個時候攻擊我。
 
「噢你個化!」佢真係咁講,仲喺對黃色圓型眼度射咗D嘢出嚟。
 
唔係光線,而係…
 
「益力力多多!」佢又真係咁講。
 
一PATPAT杰躂躂嘅嘢射咗出嚟…
 
仲中正…
 
「呢,次,你,趴,街,喇!」呢六個字我講嘅,因為…
 
佢D嘢射咗落小雲塊面度。
 
俾D「漿」遮住嘅小雲D火已經燒到冚冚聲,驚到噤住咗對耳嘅我都聽到。
 
(嘭 ~) 小雲仲只係用咗0.01秒就將…
 
成隻「OVER」機械人蒸發咗,而佢拖D馬,包括「鐵甲萬能俠」都著咗草…
 
而我之後亦都想靜靜雞離開呢個咁恐怖嘅地方,不過…
 
「你夠膽離開我線視範圍,後果就如此物!」小雲向住我講。
 
(嚓 ~) 仲一手揀爆埋隻機械人唯一嘅遺物,佢條波棍。
 
之後佢又唔知邊度嚟D水,仲不斷用D蒸餾水洗面…
 
「你D蒸…」我講。
 
「你夠膽再出聲丫嗱!」佢恐嚇我。
 
我其實只係想問佢D蒸餾水喺邊嚟,不過似乎都係唔好問好D。
 
之後我就連嘢都唔敢再講,淨係跟住佢行。
 
「啞咗呀?做乜唔出聲啊?」小雲背住我講。
 
人又係你,鬼又係你,我兩難啊,而家點算?好在…
 
「哈哈哈,終於有人類嚟俾我食喇!」
 
終於有替死鬼喇!有第二隻妖怪出現咗喺我哋前面。
 
我諗住我又可以喺旁邊靜觀其變,所以望住小雲,等佢出手。
 
「望咩啫,你自己打啦。」睇嚟佢今日真係好好火,可能係「親戚」到。
 
我唯有自己出手。
 
呢隻替死鬼真係隻剃死鬼,俾人剃到死嘅鬼…
 
成隻鬼好似個千層面咁,一片肉又一片肉咁疊起,肉同肉之間都係血絲,仲有…
 
一片片斷咗嘅刀片,睇嚟佢死得好慘吓。
 
「攪乜啊你?見你死得咁慘,我就放過你啦,你走啦。」我咁同佢講,但係…
 
「哈哈哈哈哈,死得慘呢?我專登咁死嫁,為嘅就係要有嚇人嘅效果!」
 
唉,呢個年頭真係多黐線佬。
 
「你使鬼攪到咁複雜咩,將個頭放落下身都已經夠恐怖啦!」我講。
 
「藝術嘅嘢你識條金條咩?食招啦!賤肉橫飛!」佢回應。
 
佢將身體其中一塊肉飛埋我度,肉嘅血會飛濺出嚟,影響對手判斷位置…
 
斷裂嘅刀片就會隨住塊肉旋轉咁斬過嚟,都算係一招唔錯嘅招式,但係…
 
(蓬 ~) 一吓火燒嘅聲音。
 
「我睇你仲未知死,你一隻金屬小妖,夠膽挑戰我火鳳凰?」
 
我雙手發出火焰,冇錯就係「鳳凰赤焰手」。
 
我都懶得再唗我時間,對呢D蝦蟆,我以指代劍就夠…
 
「鳳凰赤焰手!直刺式!衝擊式!拖劍式!擎天式!」
 
我先將手指發出火焰,直接刺入佢身體,將佢衝撞到牆上面,再拖返手指出嚟…
 
「擎天式」其實冇效果,只係我習慣咗呢招放最尾…
 
同埋想試吓玉麟金劍會唔會出現返,不過最後都係冇。
 
呢隻咁嘅妖怪就係咁被我掘掂咗。
 
而喺之後,我哋仲遇到返晒頭先喺「OVER」機械人嗰度出現過嘅所有妖怪…
 
原來佢哋就好似一隻妖怪守護一個地點咁,喺迷宮裡面各有各守…
 
鐵甲騎士﹑金屬狂人﹑金烏﹑羽衣人﹑鐵扇莊主…
 
一隻又一隻,到最後,都俾我哋打低晒…
 
不過,打晒我哋先發現原來左邊呢個入口係掘頭路,冇出口嘅。
 
之後,我同小雲唯有返去開頭再行過…
 
我哋行過中間個入口,不過都係搵唔到出口…
 
淨係咁樣,我哋已經唗咗足足一日時間。
 
到最後,我哋終於喺右邊呢個入口位入去…
 
仲搵到…
 
「出口!?」好在呢道牆寫明係「出口」,唔係我肯定又以為係掘頭路。
 
「意思係要燒熔呢度牆呀?」小雲問我。
 
「我估係囉。」我回應佢。
 
「不過要問過我先!」一把聲音突然喺高處發出嚟。
 
我向上一望,發現…
 
「鐵甲萬能俠!?」
 
睇嚟下集我要打佢喇!
 
(待續)
 
下集預告︰
 
「出嚟啦!五虎大將!」
 
註解︰
 
(1) 超級機械人大戰 — 一隻由歷代出名機械人組成嘅遊戲。
 
(2) 著咗草 — 逃走了。
 
(3) 「親戚」到 —「姨媽」到,又叫做M到,即係女性經期。
 
已有 0 人追稿