米米蓮妖怪作品 -《再遇見到你》(長篇) (暫停刊): 第四十二集 ~ 龜︰機械人我哋冇遇過噃，不過第四層呢度都唔係好惹。
第四十二集 ~ 龜︰機械人我哋冇遇過噃，不過第四層呢度都唔係好惹。
個神女咁衰嫁，蝦我鳳初。
(你講得啱，佢係神女，唔係仙女，正所謂，神女有心，襄王無夢…)
我講錯喳嘛，不過…你咁講係咩意思啊？
(呢個仙女好明顯係鍾意你個鳳初啦，你唔係睇唔出呀？)
吓…
(你放心啦，你個「襄王」佢對呢個仙女「無夢」啊，不過佢即使係有「夢」，都只會係「夢」佢師姐，唔係你。)
我夠知囉！使乜你講噃！我知我比唔上佢師姐啊…
…
「傻妹，梗係發緊開口夢。」我聽到我旁邊有人咁講，似乎係白波姐姐。
我睜開眼先發現原來自己頭先只係發夢。
嚟到第四層呢度之後…
我哋四個人，包括白波姐姐﹑易面容同錢阿土…
遇到一個怪人，佢一身古代文人裝扮，手上一把羽扇，扮晒「諸葛亮」咁款。
之後我知道咗佢叫做諸葛象，佢個人原來都幾健談，幾好人…
我哋之後五個人一齊喺度嘆茶傾計休息。
「好耐冇見噃，靚仔小丑，妖怪阿土，靚女白波。呢位美女又係乜家科啊？」
「佢係我新收嘅徒弟，叫瑞基，估唔到你把口仲係咁識講嘢噃。」
「見人講人話啫。靚仔兩個字擺明就係串我。」易面容佢側起面，托起個鰓。
「都唔係丫，你以前真係好靚仔丫。」阿土佢就反而好似好開心咁。
易面容就顯得好唔耐煩，阿土雖然面帶笑容，但係就好似想隨時起行咁…
我都知佢哋其實係好心急想去救申月兒，但係大家亦都明白係時候要休息吓。
「咪係囉，你以前真係靚仔丫嘛，我成日睇你D戲嫁，俏潘安。」諸葛象講。
佢哋之後仲講返，原來易面容之前係做粵劇大戲嫁…
因為佢當時英氣不凡，氣宇軒昂，所以每次都係做靚仔小生，但係…
點解佢而家咁樣呢？我再望一望佢個樣…
真係唔敢相信佢當時係一個靚仔。
(啪~) 白波姐姐突然拍我膊頭，仲伸個頭埋嚟我耳邊講…
「因為申月兒…」
「係申月兒害成佢而家咁架？」我好細聲咁問姐姐。
「聽講係因為申月兒拒絕過佢。申月兒因為自己身世同樣貌，覺得自己配唔上易面容，所以拒絕佢，但係雖然係咁，易面容依然冇放棄過…」姐姐回應。
我聽到呢度，都忍唔住望咗一吓易面容。
「不過，佢條友就自己轉牛角尖，以為申月兒係忌憚佢嘅樣貌，怕佢會始亂終棄，所以把心一橫，一刀割開自己一邊面，仲刻意用面粉整白自己塊面，為嘅就係要話俾申月兒聽，佢可以為佢放棄一切…」
姐姐講到呢度，我真係有D欣賞易面容，估唔到佢會咁痴情。
但係姐姐佢越講越興奮，越講越大聲，所以…
「講夠未啊？」易面容佢終於聽到，但係佢冇發嬲，只係一面哀愁咁問姐姐。
「阿容佢真係付出咗好多。」阿土佢及吓及吓頭講。
就好似覺得自己嘅付出完全比唔上易面容咁。
而我就因為白波姐姐嘅說話而尷尬起嚟，所以…
「哈哈哈，不如講吓第二樣丫，頭先你哋咪話諸葛象係傻佬嚟嘅…」
點知又講錯嘢，仲更加尷尬添…
(…) 大家第一時間都啞咗，之後…
「冇！」「冇冇！」「冇冇冇！」佢哋三個都耍晒手咁講。
「冇咩丫冇，你哋又唔係第一堆人覺得我係傻佬，你哋話我傻，其實我一D都唔介意，因為我自己知自己事…」諸葛象回應。
佢講到好似認咗咁，但係大家都因為尷尬，所以都只係聽佢繼續講。
「我係三國迷，三國痴，就連仙術都係用三國人物嘅，所以D人咪誤解我，成日話我傻囉。不如咁啦，我哋一齊出發去打吓妖怪啦！」諸葛象佢講完就突然起咗身。
「喂，咪住，做乜你會喺呢座妖塔裡面嫁，你仲未講。」易面容問。
「你哋頭先都冇問。唉，不過算啦，而家講你哋知啦，我嚟呢度係為咗練習吓我嘅仙術，我得閒無事就會嚟呢度練吓嫁喇。」諸葛象回應。
「練仙！？你吓吓要從頭打你唔悶咩？」阿土問。
「乜從頭打啊？有鎖匙家嘛，你哋唔係話俾我聽你哋唔知呀？」
之後我哋先知道，原來每層完咗都會有個鎖匙盒喺途中嘅凹位度…
仲有可以憑住D鎖匙，喺個槽位度自出自入添。
「你哋跟我嚟啦，呢度D妖怪我打到熟晒嫁喇，行前D就有。」諸葛象講。
雖然佢咁講，但係大家都認為要休息吓，所以我都喺度訓咗陣…
仲發咗個有關鳳初嘅夢，雖然係一個唔係咁開心嘅夢。
訓醒之後，我哋就正式出發。
我哋四個人跟咗諸葛象行咗入森林，呢度個環境直頭好似係另一個空間咁…
點睇都唔似喺個塔裡面，又有陽光，又有高樹，又有飛禽走獸嘅叫聲…
係一個…好大自然嘅森林。
(哇~ 哇~) 動物嘅聲音好似已經好近我哋。
「唔使行喇，佢哋嚟咗喇，今次都幾多隻噃。」諸葛象突然咁講。
大家都顯得比之前緊張，仲四周圍望…
「猿，猩，猴。」白波姐姐講。
「邊個原星侯啊？又係高人嚟架？」我問。
「猿人，猩猩同猴子啊，你睇吓周圍。」阿土講。
我之後再用心D睇吓，發現原來有一大堆猩猩馬騮…
佢哋都匿喺唔同嘅大樹後面望住我哋，仲似乎唔多友善。
仲有個好大嘅問題，就係…
佢哋根本唔係動物咁簡單，有D鷹嘴，有D蛇尾，有D獅子頭…
但係身體都係猩猩馬騮科動物，感覺好詭異恐怖，仲好危險。
「妹妹，見你咁驚，就等我露兩手攪掂佢哋啦，你哋三個唔使出手。」諸葛象講。
佢拿起兩邊袖，執起羽扇就…
「出嚟啦！五虎大將！」
之後地下就突然發出隆隆聲，仲有五個英偉而強大嘅軀體慢慢升上嚟…
「哈，上次見你都未搵齊嫁喎。」阿土講。
「哼，D傀儡嘅軀體又搵得幾好噃。」易面容講。
「車，殭屍就殭屍啦，傀乜儡軀體啫。」白波姐姐講。
場面太過震撼，D傀儡太有型喇，我亦真係好期待佢哋嘅出手，點知…
完全令我失望囉，因為…
「出手啦！五虎大將！」
「關羽」﹑「張飛」﹑「馬超」﹑「趙雲」﹑「黃忠」五個各施其職…
「貂你個嬋！」關羽。
「怒漢推車！」張飛。
「海膽獅頭！」馬超。
「隱！君子劍！」趙雲。
「老漢顏射！」黃忠。
聽完佢哋D招，你哋話丫，係咪失望丫，唉 ~
(待續)
下集預告︰
「因為…其中一個就係將我打到殘廢嘅人。」