第四十三集 ~ 雞︰攪乜啊?睇我深入虎穴好過啦。

佢哋兩個攪咩啊?一個打「萬能俠」,一個整個「騎呢五虎」,唉 ~

我就唔同啦,得到金玉麟幫手之後,我好快就練成《伏魔劍十九式》…

「十九哥,我想問你係咪已經畫晒嫁喇?」我問。

「好似畫得唔夠好睇。」佢咁回答。



有時我真係覺得佢係專登嘅,果種答非所問,問非所答真係有D奇怪…

好似係刻意迴避請教佢嘅人嘅問題咁。

不過算啦,我已經將佢所畫嘅都練好喇,最少…

唔計「格擋式」,我已經學識咗九式攻擊技…

「直刺式﹑橫削式﹑斜斬式…」
「旋風式﹑順劈式﹑拖劍式…」


「衝擊式﹑回旋式﹑擎天式!」

我估計所謂嘅「十九式」,只係懶勁咁先會加個「十」字喺前面…

又或者係因為十九哥叫林十九先會咁叫嫁啫。

「三弟,睇嚟你學識晒《伏魔劍十九式》喇喎!」二哥講。

「二哥你未搵到把可以遙控嘅劍啫,你都練成十七式啦。」我回應。



「你兩個好返晒喇咩?懶叻咁。」靈兒講。

「靈兒呀,唔知幾時我哋D腳可以變返做正常呢?」我問。

「今日。」醫神都行咗出嚟,仲咁講。

我同二哥聽到醫神咁講,都顯得好雀躍,好開心。

「咁就好喇!」就連十九哥都戥我哋高興。

之後,靈兒同醫神佢哋就做好準備…

為我哋麻醉,再幫我哋接駁返原本嘅腳…

… (手術期間)



「三弟!三弟!起身喇!我哋好返喇!我哋好返喇!」

喺度大嗌嘅係二哥,佢將我嘈醒咗。

我聽到佢咁講,立即就坐起身…

仲望吓自己對腳,同慢慢去感受一下呢對「新鮮」嘅腳…

「終於…終於…終於好返喇!」

因為我雙腳有知覺喇,我開心到一時間講唔到嘢,再而興奮到大嗌出嚟。

「多謝你哋啊!多謝你啊,靈兒!」我一彈起身就好用力咁抱住靈兒。



靈兒佢俾我抱到塊面都紅晒,但係我真係好開心啊!

我個身體一好返,第一時間就係諗住做我呢幾年每晚都諗住要做嘅事…

救師姐!

「二哥!我想出去一下,你會唔會陪我?」我問。

「會!靈兒呀,麻煩你幫我睇住大哥!」二哥講。

「放心啦細佬,我會睇住靈兒嫁喇!」十九哥講。

之後我就同二哥出發。

我都唔係一個輕舉莽動嘅人,可能經驗咗好多啦,人大咗成熟咗,所以…



我呢次只係想先去師姐屋企附近打探一吓。



經過一番打探,我知道咗朱謀秉佢呢幾年好好,好似仲有錢過以前添…

大屋位置冇變,所有景物並冇咩大變動,所以…

「二哥,我想入屋睇吓,不過可能會有危險。」

「結拜過,我哋就係兄弟,有福同享,有難同當,有危險就更加要去,一齊去啦!」

余二哥佢真係好好,睇嚟之前嘅佢真係經歷咗好多嘢…



由一個大壞蛋變成而家洗心革面真係唔係一件易事。

之後,我哋襯晚夜靜D嗰陣就出發入屋…

(噗~) 同幾年前一樣,我同二哥攀過外牆,跳咗入大屋裡面…

嚟到呢個情景,難免有D傷感,究竟…

師父佢當時去咗邊呢?佢呢幾年又去咗邊呢?

不過而家似乎唔係諗呢D嘢嘅時候,始終朱謀秉唔係正常人…

佢好有可能會喺度佈下天羅地網等緊我,所以我同二哥都好小心行事。

我經過當日困住奴僕妖怪嘅地牢房,但係呢次我冇入去,直接就…

爬咗上二樓師姐間房度,不過…

房裡面空無一人,就只係得隻貓仔。 (喵 ~)

「點啊,三弟?見唔見到你師姐啊?」二哥喺地下問。

「冇啊,唔知係咪轉咗房呢?」我回應。

「喂,三弟,小心啊!」二哥佢盡量大聲咁講。

「咩事啊?」

「嗰邊有隻看門狗望到我哋喇!」

我望咗一望,發現真係有隻狗坐到定一定咁望住我哋…

「此地不宜久留!我哋都係快D離開呢度先啦。」我講。

「我以為你同隻狗講添。行啦。」二哥回應。

之後我同二哥好安全咁爬返出外牆,點知…

「哈哈哈,朱兄,多謝你呢餐噃。」

「使乜多謝丫,只要余兄你鍾意就好喇,哈哈哈。」

「我都估唔到你哋咁投契,哈哈哈。」

「多謝你介紹我哋認識啫,哈哈哈。」

「正所謂蛇鼠一窩丫嘛,哈哈哈。」

除咗「蛇鼠一窩」四個字係啱聽之外,每一個字都係討厭嘅。

呢三個人喺大路上面行緊,而我同二哥就俾大屋外牆嘅矮樹遮住…

所以我哋偷聽到佢哋講嘢之餘,佢哋又睇我哋唔到,而且…

講嘢嘅其中一個人…

就係朱謀秉呢個惡魔。

另外,佢身邊仲有一個駝背佬同埋一個…

乜咁似…

我望一望二哥。

「二哥,你…你做乜好似咁驚嘅?」

「因為…其中一個就係將我打到殘廢嘅人。」

我望返過去睇一睇嗰個有D似二哥嘅人。

「而另外一個,嗰個駝背佬,就係鬼頭陀嘅仔,一個追殺咗我好耐嘅人。」

「咩話?乜真係蛇鼠一窩呀?三個衰到痺嘅人喺埋一齊。」我睇到咬牙切齒。

我哋望住呢三個人…

「遲D七彩嗰邊好似有個咩咩咩七彩會師噃,你哋有冇興趣去睇吓?」

「做咩嫁?」

「聽講好似話七彩都會派弟子出嚟對戰,最後贏咗嘅好似有好多好處咁囉。」

佢哋慢慢行返入大屋。

「二哥,乜原來你殺咗嘅鬼頭陀有個仔架?」我冷靜返落嚟就向二哥問返清楚。

「係咪親生仔我就唔知,亦冇問過,不過呢條友算係我師兄弟,同埋鬼頭陀好鍾意佢,當時教佢嘅嘢比我仲要多,鬼頭陀比我殺咗之後,佢一直都懷恨在心,想殺我為鬼頭陀報仇,只不過當時我能力比佢高,所以佢冇辦法殺到我,但係之後唔知點解佢知道咗我俾人廢咗功力,仲開始追殺我,我避佢都唔知避得幾辛苦,有幾次仲差D死喺佢手上。」

「咁點解又冇事嘅?」

「唔知,但係…而家諗諗吓可能因為我阿哥,我俾鬼頭仔打暈過兩次,但係之後醒返就見到阿哥,我問返阿哥,佢就總係耍我咁,有時真係就連我都唔明白阿哥究竟係真傻定假癲。」

「哈哈,我諗到個情況,肯定係好似靈兒單嘢咁,十九哥佢見到你有事,即刻發咗狂咁打到個鬼頭仔一仆一碌。」

「我諗係咁啦。」

「不過…另外…你話廢你功力嗰個人,你覺唔覺得好奇怪啊?」

「你講開我就講啦,其實…我有少少懷疑嗰個人…其實就係我,余二十。一個老咗嘅我,佢唔單止似我,身上有嘅邪力仲同以前嘅我一模一樣,不過…我又從來未聽過有人有呢種…犀利到咁可怕嘅能力,竟然可以穿越時空,所以…我都只係懷疑啫。更何況我解釋唔到個時間關係,好似點講都唔通咁,如果歷史係改變唔到嘅話,即係我未來會返番嚟呢度,不過我自問已經痛改前非,冇可能會再做呢D衰嘢,所以呢個我諗唔通。如果假設歷史係可以改變嘅話,咁樣呢個未來嘅我又會唔會因為歷史改變而突然消失呢?呢個我又係諗唔明…」

呢段嘢有D複雜,好在我自己都總算聽得明啫。

「二哥,我諗你唔使擔心,其實都好簡單,就好似你咁講。如果歷史可以變,咁就由得佢變囉,咁樣呢個衰嘅你就可以自動消失﹔即使歷史係冇得改,咁既然係冇得改,以後嘅你變成點你都改唔到,咁就由得佢自然咁行落去囉。」

「但係…我唔想自己返番轉頭,又要做返一個衰人。」

「話唔定佢只係樣衰啫,可能忍辱負重,做緊臥底呢。」

二哥佢突然神色凝重咁望住我。

「咩事啊?」我問。

「你果然係火鳳派嘅後人,真係天生就一隻火鳳凰,你樂觀嘅性格,令你有打不死嘅精神。」

「哈,乜係咩?」二哥佢讚到我咁樣,我都忍唔住尷尬起嚟。

「其實我都仲有諗過佢會唔會只係複製咗我嘅能力,不過應該冇可能,因為佢打到我殘廢嗰陣用嘅招式,我係從來冇對其他人用過嘅。」二哥講。

嗰三個衰人而家入咗大屋裡面,睇嚟我哋暫時都冇辦法再入去打探…

所以為咗大局著想,二哥同我都覺得應該要從長計議…

我哋都認定咗呢度冇大變動,估計師姐一定喺大屋裡面…

只係未搵到啫,我哋都想搵埋鳳光大哥一齊研究救師姐嘅方法…

所以都想先返去「竹林深處人家」。

(待續)

下集預告︰

…身體原來可以180度轉動,一瞬間就由背脊變返做正面…
已有 0 人追稿