第四十四集 ~ 鳳︰我都唔知攪乜,竟然唔夠「萬能俠」打。
 
咦,兩個細佬要搵我傾大計喇噃,要快D攪掂埋呢度先。
 
我嚟七重妖塔嘅第三層之後,發現呢度係我最唔鍾意嘅「迷宮」…
 
不過既然嚟咗,冇計啦,唯有頂硬上。
 
我行過左邊個入口,又行過中間個入口,裡面都俾我同小雲行勻晒…
 




途中我哋仲遇過唔少鬼怪…
 
鐵甲騎士,一隻全身盔甲嘅騎士怪;
金屬狂人,一隻全身鐵鍊嘅大隻佬妖怪;
金烏,一隻白痴傻雞;
羽衣人,一隻一身白布衣,個樣嚇人嘅妖怪;
鐵扇莊主,一隻手執鐵扇嘅女妖人。
 
不過都俾我哋一一攪掂晒,受傷我哋就冇,不過佢哋浪費咗我哋唔少時間。
 




搵咗好耐,我哋終於喺右邊呢個入口入咗去,仲搵到出路添…
 
不過就有一隻妖怪想阻我哋離開呢層…
 
「…問過我先!」一把聲音突然喺高處發出嚟。
 
我向上一望,發現係「鐵甲萬能俠」
 
我啱啱先望佢啫,佢就俾個「見面禮」我…
 




「氣體硫酸!」佢喺個口度噴D硫酸氣體出嚟。
 
好在我身手敏捷,一個弓字腳就向後彈開,避開咗佢呢個攻擊…
 
但係佢冇就咁就放棄攻擊我,佢立刻就嚟個…
 
「金剛飛拳!」拳頭由佢隻手度飛出嚟,仲追蹤我添。
 
最衰我而家手上冇武器,唔係我肯定直接斬爛佢,不過而家就唯有閃避啦。
 
我飛去邊個飛拳就跟去邊,好在佢速度唔係好快,我閃避都唔係太困難…
 
但係係咁落去,對我好似冇乜著數。
 
「原子光熱線!」佢仲要襯我閃避嘅時間,用雙眼發出呢招式攻擊我。




 
不過佢呢招係火屬性招式,所以…
 
「火鳳麟牆!」我直接同火焰同化,佢嘅熱能俾我「麟牆」抵擋咗。
 
我亦襯機轉守為攻,以指代劍,一吓跳飛埋去…
 
「鳳凰赤焰指!」直插佢左邊心房,但係…
 
手指係插咗入去,亦應該傷到佢,不過似乎熱熔佢外殼需要多一D時間。
 
我唔能夠直接插入佢要害,就只有立即退避,如果唔係…
 
我就會俾佢鎖住手指,同埋會近距離俾佢嘅攻擊所傷。
 




喺呢一刻,我暫時真係諗唔到其他辦法對付佢,所以…
 
我望一望小雲,睇吓佢有冇方法幫到手,不過…
 
唔知邊度又嚟一堆小妖怪,佢哋纏住咗小雲,雖然我覺得小雲佢身為神仙…
 
一定應付得嚟,但係佢就變得冇辦法幫到我手。
 
「高熱火焰!」萬能俠再次出招,佢仲連埋雙拳飛出攻擊我。
 
萬能俠明顯已經知道「高熱火焰」係對我冇效嘅,佢只係想阻礙我視線…
 
目標係想用雙飛拳打中我。
 
不過好在我根底唔錯,佢精我都唔笨,我一直就喺度左閃右避…




 
但係我感覺到,長此落去我肯定會因為疲勞已身體會慢落嚟…
 
到嗰時我就會中晒佢嘅飛拳,咁點算好呢?
 
正當我仲諗緊對策嗰陣,佢又嚟一個…
 
「冰凍光線!」
 
咩話?佢呢招係完全可以克制我嘅招式,俾佢射中我就弊家伙喇…
 
光線由佢心口射出嚟,每經過嘅地方都結咗做冰,四周圍好快就變成冰天雪地…
 
到時候,我就更加難對付佢,但係又唔可以俾佢光線射中…
 




我諗,我唯有再一次用「鳳凰赤焰指!」插入佢要害先得。
 
可以避開佢嘅光線,又可以攻擊到佢嘅,我諗就係得佢背脊…
 
我一吓跳躍,飛過佢頭頂,去到佢背脊,立即就使出…
 
「鳳凰赤焰指!」點知…
 
佢個身體原來可以180度轉動,一瞬間就由背脊變返做正面…
 
所以我未完全插入佢身體,我就退返開先。
 
「冰凍光線!」
 
睇嚟佢認定咗我係怕佢呢招,所以之後都一直用呢招攻擊我…
 
喺呢個時間,我真係諗唔到辦法喇,最衰呢度就連請神都唔可以…
 
如果「玉麟金劍」喺我手邊就好喇…
 
咦,唔係噃,我一諗起「玉麟金劍」,就諗到「擎天式」…
 
我一諗到「擎天式」,就諗到呢招嚟對付「萬能俠」…
 
佢雖然可以前後180度調轉啫,但係肯定唔可以上下180度調轉…
 
好!就用呢招啦!
 
「鳳凰擺架!」我將靈力傳到一舊石頭,再掟埋去「萬能俠」度…
 
好明顯,我呢招只係虛招,實際我係…
 
要用呢招,我以指代劍,由下而上咁攻擊佢…
 
「鳳凰赤焰指!擎天式!」
 
我兜嘢隊入咗佢下陰,但係…
 
佢下陰竟然唔係要害,仲將我D手指夾住咗…
 
唔單止咁,佢上身原來仲可以分體,佢上身飛離下身,再飛到我旁邊…
 
「冰凍光線!」
 
呢次死喇!我要硬食呢招?
 
我唔理喇,唯有拼死一博啦!
 
「擎天式!」我先隊爆佢下身…
 
「順劈式!」我順手斬向佢上身…
 
「旋風式!」再轉動身體一個「旋風」斬落去佢個頭度。
 
我跌返落地,「萬能俠」嘅下身俾我隊爆咗,上身亦俾我斬開咗兩邊…
 
睇嚟我係贏咗,但係…
 
我就硬食咗佢嘅「冰凍光線」,而家…
 
我覺得好凍…好凍…
 
凍到我…
 
暈咗。
 
… (暈嘅期間)
 
「你無事喇?」小雲問。
 
佢應該係攪掂晒D小妖怪喇。
 
「你臨暈之前已經將萬能俠打敗咗。你休息夠我哋先再出發啦。」佢再講。
 
「但係…頭先我中咗冰凍光線,全身發冷嫁,點解…」
 
「無乜點解,係我救咗你囉。」
 
「救咗我!?」
 
我心諗,小雲係用咩方法幫我取暖嘅呢?唔通好似D武俠劇咁…
 
以赤裸裸嘅身體幫我取暖?
 
「做乜咁鹹濕望住我啊?」
 
「我幾時有啊?」
 
「你唔使諗鹹濕嘢喇,頭先我叫晒D小妖怪喺你身上屙殊殊幫你取暖嘅。」
 
我自然反應就聞一聞自己個身,但係好明顯小雲係講大話…
 
我見佢咁嘅反應,反而更加覺得我之前所諗嘅係無錯,佢係用肉體幫我取暖。
 
多謝你啊,小雲。
 
嚟到呢個世界之後,我竟然有返D桃花運…
 
我喺之前嘅幾十年裡面,我就連其他女仔隻手都冇掂過…
 
而家反而一掂就掂勻人哋全身,仲要係仙女。
 
我心目中就只有師姐,真係冇可能再接受到小雲…仲有瑞基嘅愛…
 
可能有人會覺得我太自大,以為係女仔都鍾意我…
 
但係瑞基係將清白嘅肉體奉獻俾我嘅,所以冇可能係假…
 
至於小雲,又點會有女仔咁樣跟住個男人,保護個男人丫…
 
我最多係戇居啫,唔係白痴,人非草木,我當然感覺到佢係鍾意我啦。但係…
 
我只能夠感謝佢哋嘅錯愛。
 
「出發未啊?仲諗嘢。」小雲問。
 
我之後簡單一個「鳳凰赤焰手」就將銅牆鐵壁燒熔,開咗個出口出嚟…
 
攞咗中間條鎖匙就繼續行去第四層。
 
呢度係一個森林,有好多鳥獸叫聲,但係…
 
我哋再行入D,發現咗好多受咗傷嘅妖怪…
 
但係我冇理佢哋,依舊慢慢同小雲行去出口…
 
奇怪嘅係,我哋嚟之前應該有高手將呢度D鬼怪打低晒,究竟係邊個呢?
 
我求其望一望呢度嘅妖怪,呢度淨係受傷喺地嘅妖怪都最少有成千隻…
 
睇嚟頭先個高手都打咗唔少時間。
 
我同小雲都好幸運,呢層可以唔使打任何妖怪,直接就可以再上一層…
 
下一層係第五層,之前第一層屬水,第二層屬土,第三層屬金,第四層屬木…
 
所以呢個第五層應該係屬火嘅…
 
我哋行到上去,見到冇一個正常入口嘅,反而…
 
見到一個巨型輪盤,輪盤上面有十二生肖嘅圖案,睇嚟係十二個入口…
 
即係我哋要揀嚟打啦。
 
咦,我突然喺地下見到唔少腳印,睇嚟喺我同小雲之前係有…
 
唔止一個高手嚟咗,係最少有四個人,甚至五個人嚟咗…
 
但係佢哋是敵是友呢?睇嚟我哋要再小心D,唔係可能連命仔都冇。
 
「喂,我哋前面班人應該係去咗馬騮嗰個入口,你睇吓。」小雲講。
 
「火系馬騮?睇嚟呢個入口要對付嘅就係火焰彌猴。」
 
(待續)
 
下集預告︰
 
一隻樹根手上面係一個巨型燈籠,燈籠裡面好似載有好多…靈魂?
 
註解︰
 
(1) 弊家伙 — 糟糕。
 
(2) 屙殊殊 — 屙尿。
 
已有 0 人追稿