第四十六集 ~ 雞︰我呢邊竟然出現咗…三個「余二十」!?

上面呢位高手個稱號加埋個大名真係丫…

十六把刀喎,仲要勾陽…具,嘩…

聽到真係有D痛,唔怪得其他幾個男性高手都唔想聽到佢個名啦。

不過我諗周白波呢個毒婦都係特登講出口,令大家唔舒服嫁喇。



唔好八卦人哋住喇,都係講返自己呢邊先,因為我呢邊都好緊張…

睇嚟我好快就可以救返師姐喇。

上一次講到我同二哥對腳都醫返好晒,仲跟住十九哥嘅圖畫…

練成咗《伏魔劍十九式》,總算有返D揸拿。

我哋之後亦試過去打探師姐屋企大屋,不過淨係見到隻貓同隻狗…



唔知師姐去咗邊呢?

我哋聽到大屋外面有D聲音,似乎係有人返嚟,所以…

跳返出去大屋外牆,仲匿喺D草叢度偷聽吓呢D人講緊乜…

不過估唔到嘅係…

呢幾個傾緊計,返緊嚟嘅人就係…



師姐個衰老豆,朱謀秉﹔

二哥嘅仇人,鬼頭仔﹔同埋…

打到二哥殘廢嘅人,一個估計係喺未來嚟嘅二哥,余二十。

一個就已經難對付,而家仲要有三個…

所以我哋都想先返去同大哥佢從長計議…

我哋兩個最後返咗去「竹林深處人家」。

返到去之後,我哋仲將我哋嘅所見所聞同靈兒﹑十九哥同醫神講返。

不過佢哋一個痴,一個傻,一個老懵懂,我哋講完就好似冇講過一樣…



睇嚟都係要等大哥返嚟先有辦法。

好可惜,時間一日一日咁過去…

大哥依然未返到嚟…

「究竟大哥去咗邊啊?」我開始唔耐煩。

「佢去咗搵佢嘅命運丫嘛。」靈兒。

「三弟,我知你好心急,但係對手實力太強,我哋都係等埋大哥會好D。」二哥。

「去救人啫,又唔係殺人,使乜咁多人噃。」十九哥。



十九哥嘅呢句說話雖然好似好廢,但係我諗諗吓又係噃…

「二哥,其實我哋唔使硬碰嫁,不如我哋偷偷去救師姐咪得囉。」

二哥係一副無奈嘅表情,但係…

佢諗咗一諗,之後搭一搭我膊頭…

「三弟,我明白你嘅心急,大哥又唔知幾時先返到嚟,我哋一齊去啦,但係你要記住,唔好急,最緊要快,我哋就出發啦。」

之後,我哋再次出發,而且靈兒都跟埋嚟…

佢話佢會「靈化隱身術」,只要附近有植物,佢就可以隱藏到植物上面…

我哋好快又去到師姐大屋嘅外牆…



「靈兒,呢度有棵樹,你就喺度睇水啦,我同二哥入去查探。」我講。

之後我哋就留低靈兒喺外面,兩個人再次入去屋裡面…

呢次我哋時間都幾充裕,差唔多搜勻晒成間大屋…

但係除咗正常工人,貓貓狗狗之外,就再冇其他人…

「三弟…」

「做咩啊,二哥?」

「你估…你師姐會唔會去咗其他地方呢?」



「唔肯定,但係我朋友曾經講過師姐佢仲平安,咁應該仲喺呢度…」

「我有樣嘢…雖然我唔想係真,但係都想問吓…」

「咩事啊?」

「你師姐佢…會唔會已經唔係人?」

我諗咗一諗…

「丫,佢已經死咗,我係咪唔記得講你知啊?佢應該係隻鬼魂。」

「唔係啊…我意思係…你師姐會唔會…已經唔係人形?」

我突然諗起我之前發過嘅惡夢,師姐佢變咗隻不似人形嘅妖怪…

「點解二哥你咁覺得啊?」我雖然唔想相信,但係都咁問咗呢句。

「你記得我講過我天生就感應力好強嘛?」

我及頭回應。

「我懷疑…」

點知二哥未解釋完,另一邊就…

「唔使懷疑喇,你哋都算沙噗,竟然夠膽偷偷地入我屋企…」

冇錯,呢個人就係朱謀秉。

佢講咩我都唔在乎,對我做乜都冇問題,問題係…

佢而家捉住咗靈兒。

「靈兒!」

「你兩條打壞,而家就互相質對方食泥啦…」

可能因為而家係夜晚,加上幾年冇見,佢似乎唔認得我…

不過呢條友真係變態佬,就算當我哋係賊,捉我哋就算啦…

竟然仲想糟質我哋。

「唔食又點啊?」二哥。

「咁你想我報警,定係想同我過兩招啊?」朱謀秉。

二哥突然俾咗個眼色我,但係…

佢想同我講咩啊?大佬,拍戲咩?邊可能一睇眼色就知你諗乜啫…

呢吓真係尷尬喇。好在朱謀秉條友仲戇膠膠冇動作啫…

「二哥,不如你講出口啦,你唔講,我有時真係唔明啊。」

「唉 ~ 四個字,玉麟金劍。」二哥佢細細聲回應我,再望一望靈兒嗰邊。

嘩,咁樣差好遠,我明好多,佢意思係叫我用「擎天式」分開朱謀秉同靈兒…

佢自己再上前救走靈兒。

「好!擎天式!」

我都唔等喇,一明佢意思就即刻出招,不過…

「擎天式」通常用嚟埋尾嘅,我仲應承過金玉麟要俾佢爽,所以…

條友一喺地下度衝上嚟就追住朱謀秉個下部嚟隊,場面都幾滑稽…

好在,呢吓總算幫二哥喺朱謀秉手上救返靈兒。

不過估唔到嘅係…

「九曲追魂劍!」(攀 ~)

突然唔知邊度嚟咗把飛劍打開咗「玉麟金劍」。

「多謝你啊,西魔先生。」朱謀秉對住一個啱啱行出嚟嘅人講。

「哼,真係我。」二哥講。

「二哥你意思係?」我問。

「西魔先生好明顯就係由西斜呢個名改出嚟,鬼頭仔喺佢哋嗰邊,所以佢唔可以叫自己西斜,唯有改成呢個名。」

嘩,好明顯你自己講晒噃,二哥,真係要俾個服你。

「咁…而家點算啊?佢哋似乎好強勢噃!」我講。

就喺我哋三個都唔知點算嗰陣…

「唔使驚!」後面突然有人大嗌。

又邊個啊?

「呢個咩咩咩所謂西魔先生,就由我嚟對付啦!」

一個…又一個…人喺我哋後面彈出嚟…

但係…佢…個樣…

「冇錯!我就係余二十,一個正義嘅余二十!」

呢個人又係同二哥個樣一模一樣,乜而家興整容整呢個樣咩?

佢手執一把銀劍,睇嚟仲係另一把「九曲追魂劍」…

而家同個再樣衰D嘅西魔先生對視緊。

突然喺我面前出現咗總共三個余二十,究竟攪乜科啊?

(待續)

下集預告︰

關你咩事啊?贏我嘅係佢,又唔係你,你要帶我落第三屠,佢就可以上去。

註解︰

(1) 揸拿 — 呢度係講緊有返D嘢旁身。

(2) 睇水 — 把風,視察環境。

(3) 沙噗 — 大膽。

(4) 打壞 — 孱弱嘅後生男仔。

(5) 糟質 — 有D似虐待,欺負咁囉。

(6) 埋尾 — 最後一招結尾。
已有 0 人追稿