第五十二集 ~ 雞︰比!?就去以武比一比啦!
 
上一次,好在有十九哥突然出現,仲嚟咗朱謀秉嘅大屋度…
 
佢元氣爆發,一個鐵閘就車埋去朱謀秉同西魔度,將我哋由佢哋手上救走咗…
 
好可惜,留低咗「正氣朋友」,講緊嘅係正義嘅余二十…
 
我諗佢都應該凶多吉少,不過我哋冇辦法先咁做…
 


我哋兩個正常人加一隻精靈都只係俾個「低低地」嘅人救走…
 
仲可以奢求D咩丫。
 
「唔使理我喇,記得幫我搵陳鳳初啊!」
 
好在佢自己都識做,佢咁樣講,我哋幾個都離開得安樂D。
 
西魔同朱謀秉亦唔知因乜事冇追擊我哋…
 


而我哋亦都走到好遠。
 
不過原來大屋裡面有隻狗一直跟住咗我哋…
 
仲跟我哋嚟到呢度添…
 
但係更加估唔到嘅係…
 
原來佢就係我一直要搵嘅師姐…
 


佢而家嘅眼神,就好似渴望住我抱佢一樣,所以…
 
我慢慢行前去,想用我嘅溫暖去擁抱佢…
 
「師姐~~~!」
 
點知…
 
「汪~!」
 
佢面都紅晒,仲推開咗我。
 
我呆咗一吓,之後諗到就講︰
 
「丫,我知道喇,對唔住啊師姐,男女授受不親。靈兒呀,你可唔可以幫我抱住師姐先啊?」


 
雖然師姐變成咁,我係有傷心,但係我曾經應承過自己…
 
只要師姐仲在生,無論佢變成貓又好狗又好,我都會照顧佢一生一世…
 
不過估唔到個天真係對我咁好,真係將師姐變咗做隻狗嫁啫…
 
仲有,有一樣嘢我一定要記好…
 
就係我點都唔可以喺師姐面前唔開心,我就算係扮都要扮到開心快樂出嚟。
 
「你真係醒目,一句「男女授受不親」就要人哋幫你拎嘢,唔係睇在你面上嗰兩滴眼淚,我真係唔幫你啊。」靈兒講完就將師姐抱起。
 
我亦乘機笑返,同加多句廢話,希望場面冇咁僵,同希望師姐感覺好D︰
 


「係啦,有沙入眼都呃到你做咕喱,哈哈哈。」
 
「三弟,唔緊要啦,一定有方法醫到你師姐嫁,我哋返去再從長計議。」
 
唔知由幾時開始,二哥好鍾意將「從長計議」掛喺口邊。
 
「呢隻狗你哋架?咁醜樣嘅?」十九哥突然出聲咁講。
 
師姐一聽到,立即咬牙切齒,準備想噬十九哥咁款。
 
「阿哥係舊人!話醜樣即係靚咁解啊!三弟師姐唔好介意!」二哥兜都兜唔切。
 
「咩呀?我真係話佢醜…」
 
「阿哥!我哋去前面睇烏蠅!」


 
「哦,好啊!」
 
好在二哥醒目啫,亦好在前面真係有烏蠅俾佢睇啫…
 
我哋幾個總算喺一個和諧嘅氣氛之下返去「竹林深處人家」。
 

 
「師父!我哋返嚟喇!」靈兒一到埗就大嗌。
 
「你哋都返嚟喇?」醫神行咗出嚟,仲咁樣講。
 
「我哋都?你意思係陳鳳光都返咗嚟喇?」靈兒再問。
 


「係啊,喺裡面,不過佢斷咗隻手。」
 
「吓,大哥斷咗手?」我同二哥大嗌完就一齊衝咗入去搵大哥。
 

 
一見到大哥背脊,我哋就衝埋去…
 
「大哥,你隻手冇事丫嘛?」二哥問。
 
「隻手冇事,我都冇事,不過分開咗嚟冇事囉。」鳳光大哥講。
 
「大家都冇事就好喇。」十九哥講。
 
「的確係冇事,隻手保存得好好,駁返就得,但係要D時間囉。」醫神咁講。
 
「大哥,三弟,三弟師姐已經救咗返出嚟,我哋可以喺度休息吓,順便從長計議。」
 
大哥一聽到二哥講「師姐」兩個字,突然變得好錯愕咁,仲望來望去…
 
「師…師姐…三弟師姐?」
 
「大哥,做乜事啊?」我問。
 
「師姐…你師姐去咗邊啊?」大哥再問。
 
我唔想傷師姐心,但係又要講俾大哥聽,唯有咁講︰
 
「師姐…佢就係呢隻咁可愛嘅狗狗。」
 
「師…你師姐佢變咗做隻狗?」
 
大哥佢好似一時間接受唔到咁,睇嚟佢好有機會真係「正義朋友」所講…
 
我哋所估嘅咁,鳳光大哥就係未來嘅我。
 
「大哥,我有樣嘢想問你,你可以照直答我嗎?」
 
「吓!?你問啦。」
 
「你係咪我?你係咪未來嘅陳鳳初?」
 
「你…你知道咗D嘢?哈哈,其實我都冇諗過隱瞞你哋,只不過我一直諗住如果之前我話俾你哋聽我係陳鳳初,你哋肯定當我傻佬。好!而家我就話俾你聽,我就係未來嘅你,我就係陳鳳初,我仲同未來嘅二弟一齊嚟咗,未來嘅二弟係個大反派,係大壞人西斜余二十,佢用咗一個絕招,將我同佢一齊傳送咗嚟呢個時空,我本來都唔想相信,但係你同二弟嘅出現,就正正係一個最好嘅證明。」
 
「咁…即係未來嘅我口中所講嘅救世主就係鳳光大哥你?」二哥插口。
 
「救世主?有冇咁誇張啊?你有冇見過俾人斬斷手嘅救世主啊?」大哥講笑。
 
「智商比我哋低嘅救世主都我見過幾次,斷咗手又有乜出奇?」二哥笑住回應。
 
大哥呆咗,我諗佢未諗到邊個係「智商比我哋低嘅救世主」…
 
所以我啤一啤十九哥當係話俾佢知。
 
大哥知道之後,企咗起身,慢慢行咗去師姐度,仲一手抱起師姐…
 
乜都冇講,淨係喺度笑,笑得好開心。
 
我見到佢咁,唔知點解,喺呢一刻,真係同大哥心連心咁…
 
感受到佢所感受嘅感覺,個感覺有D感動…
 
「汪~!」
 
我諗師姐都隱約感受到大哥嘅氣息好似我,所以向佢吠,連吠聲都好溫柔。
 
「我諗你哋帶得呢隻狗仔返嚟,都係想我醫返佢啦…」醫神突然咁講。
 
「嗱,你自己講嫁咋!」我同大哥一聽到,諗都冇諗就一齊指住醫神講。
 
「不過冇可能。」醫神再講。
 
「點解呀?」我同大哥都呆咗,二哥幫我哋問。
 
「解鈴還須係鈴人,幫到佢變回原型嘅,就只有佢個衰老豆。」
 
估唔到連醫神都知師姐個老豆係衰人,但係…
 
「咁…我哋可以點樣做呢?」我問。
 
「呢隻狗狗好在冇做壞事,但係無奈盲目跟隨主人指示,所以就變成一隻狗,如果佢係習慣捉老鼠,就會變成一隻貓,如果佢習慣咗污糟糟,就會變成一隻豬…」
 
「夠喇!我哋冇興趣聽呢D變化原因同結果。」
 
「哦,咁算啦,我意思係你師姐冇做壞事,估計佢只係幫佢個衰老豆做情報員或者負責事前安排準備嘅工作,要解放佢嘅怨氣,一定要佢自己解開心結,或者佢個衰老豆幫佢解開呢個心結。」
 
「咁…唔通我哋要去求朱謀秉?」二哥問。
 
「我諗…可以試吓用打賭嘅方式…」靈兒出聲。
 
「打賭?即係點啊?」我問。
 
「靈兒嘅鬼主意未必冇用,佢意思係…都係由靈兒自己講啦。」醫神講。
 
「我意思係嚟緊「七彩」會有個武林聚會,會喺七重妖塔外面嘅鏡湖舉行,到時七個門派會各自派人參加對決,當中會打賭一D物品,已知最重要嘅物品之一,就係「七重妖塔」,所以我諗你哋可以透過打贏朱謀秉而要求佢做一D嘢或者交出一D嘢。」靈兒解釋。
 
「咁佢唔嚟或者…就算輸咗都唔俾咁點算啊?」我問。
 
「唔會,佢哋呢D人好講面子,輸咗一定唔會唔俾。佢亦更加冇可能唔嚟,因為「七重妖塔」真係寶物中嘅寶物,每個門派都好想擁有佢,之不過…」醫神再講。
 
「又不過咩呢?」大哥問。
 
「你哋傷患未好,能力又未必夠,淨係一個朱謀秉已經好難贏,佢仲可能搵埋D高手幫手,例如,東歪,南轅,北轍,雖然呢D人比佢哋早半輩至到一輩,亦唔知去晒邊,但係要係幫佢手,你哋都幾難打,而且仲有…虹霞門掌門洪連夏﹑金刀後人金產權﹑錄欽城城主陸羽石﹑清林寺大師清明大師﹑九曲追魂劍名門蘭花山莊莊主花米蘭﹑子水樓樓主劉紫千,每一個都係高手中嘅高手,要贏真係難。」
 
「我哋夠有火鳳派後人,又有西斜余二十,驚咩啊?就去博一博啦!」
 
之後,大哥就要等醫神醫治,我同二哥就每日苦練《伏魔劍十九式》…
 
為嘅就係準備好一個月之後嘅「七彩武林大會」。
 
 (待續)
 
下集預告︰
 
香港D妖魔鬼怪有限,根本唔需要我用足百二分精神去練成…
 
註解︰
 
低低地 — 即係低能。
 
咕喱 — 即係苦力。
已有 0 人追稿