米米蓮妖怪作品 -《再遇見到你》(長篇) (暫停刊): 第五十三集 ~ 鳳︰去比武，記得預埋我，我會準備好功夫去。
第五十三集 ~ 鳳︰去比武，記得預埋我，我會準備好功夫去。
一首抒懷情歌，一場滂沱大雨，一個嬌美女孩…
石橋美景配上原本山明水秀嘅四周環境…
製造咗一個動人嘅畫面…
最少我陳鳳初係咁認為…
好多謝佢哋陪住我過咗一個夜晚…
「多謝你啊，小雲。」
我哋兩個之後都返咗入石橋底，我除咗件衫，摺起褲腳喺度取暖…
天氣係涼涼地，但係未至於係凍，個火主要都係小雲用嚟幫我烘乾件衫用。
小雲佢聽到我多謝佢，淨係同我笑咗一吓。
佢雖然係神仙，但係都係女性，可能頭先俾我攬一攬，有D尷尬啦…
所以大家一時之間都再冇任何對話…
佢烘我嘅衫，我就睇住佢背住我烘衫…
而且見到佢全身都濕晒…
「小雲，不如你都烘一烘你件衫先啦，濕晒喇。」
「傻佬。」
哈，我都唔記得佢係神仙，衫濕晒都唔會冷親啦…
咦，咪住先…
「小雲呀？你…神仙個身體有冇溫度嫁？」
「你頭先咪攬過囉，你自己冇感覺嫁咩？」佢背住我講。
「吓！？又…好似暖暖地。」
「仙氣係暖，邪氣係寒，所以我本來係就係暖暖地嘅，都幾似人類個體溫嫁。」
「原來係咁。」
「出面真係好大雨。」
「廢話。」佢語氣唔係太差，但係依舊背住我講。
而我就望一望外面。
「喂，你唔好再衝出去啊，我殺咗你嫁！」佢突然再加一句。
「唔會喇，多謝你。」
我之後望望佢背脊同火光閃閃咁…
慢慢慢慢都忍唔住訓咗…
…
「起身喇，要返去睇吓醫唔醫到你隻手喇。」小雲叫醒我。
我望一望個天，天色都好返晒，而且應該係啱啱朝早…
「好，出發！」
…
我哋一齊出發，好快就返到去「竹林深處人家」…
呢度從外面睇，好似冇乜改變…
依然係人傑地靈仙山咁款…
而且我哋仲喺門口度見到醫神…
佢好似好專心睇緊D樹。
「小雲，嗰個就係醫神喇。」
「我知啊。」
之後我哋一齊行埋去…
「神醫先生，請問醫唔醫得到呢個人隻斷手啊？」小雲問。
「吓！？你哋入嚟先講丫。」醫神另過嚟同我哋講。
我哋三個人一齊返咗入內堂。
「我二弟﹑三弟佢哋未返呀？」我問。
「佢哋尋晚出晒去，到而家都未返。」醫神一邊回應我，一邊睇我傷口。
佢望咗一陣之後…
突然…
「黐膠線！」大嗌。
「吓！？冇得醫呀？」我問。
「黐D膠線就醫得返佢隻斷手？」小雲問。
「唔係，我講吓粗口啫，你個傷口完美地吻合，直頭好似LEGO咁砌返埋就得。」
「哦，原來係咁，係咪即係有得醫啊？」我再問。
「傷口靚到咁，你真係要多謝呢位仙女朋友喇，保護得真係好好，好到冇人有，佢保護得咁好，我醫唔返你我就對佢唔住喇，放心交俾我啦，呵呵呵。」醫神講。
「咩女朋友啊？我幾時係佢女朋友？」小雲好急回應，似乎係聽少咗個「仙」字。
「你一身仙氣，肯定係神仙，我點老都好，未至於傻嘅，又點會覺得你會同凡人一齊丫，我講係女性朋友啫。」醫神咁回應佢。
但係小雲好似好在意咁，一面無奈就…
「我知…我知呀，咁你幫我照顧好佢啦，我走先喇。」
仲轉身就走咗去。
「小雲！你去邊啊？我點樣先搵到你？」我見住佢走，立即大嗌。
小雲佢冇回應，一陣風咁就唔見咗。
但係醫神就回應我一句︰
「明知故問。」
佢又好似講得啱，小雲係神仙，我召喚佢咪得囉，使乜搵啫，係驚佢唔應啫。
我之後休息咗一陣，俾醫神佢準備一D醫我嘅嘢…
…
仲喺過咗冇耐之後，聽到靈兒大嗌嘅把聲︰
「師父！我哋返嚟喇！」
而且…
(龐~) 仲有人推開咗道門…
「大哥，你隻手冇事丫嘛？」原來係忠義同雞仔佢哋。
我見到佢哋，當然開心啦，笑都嚟唔切，咪諗住攪吓笑囉︰
「隻手冇事，我都冇事，不過分開咗嚟冇事囉。」
…
「大哥，三弟，三弟師姐已經救咗返出嚟…」忠義咁講。
當我聽到忠義講「師姐」兩個字，我就立即好似傻咗咁…
第一時間就直接當咗係自己師姐一樣…
「大哥，做乜事啊？」雞仔問。
「…你師姐去咗邊啊？」
「師姐佢就係呢隻咁可愛嘅狗狗。」
狗！？我師姐幾時變過狗嫁？
「大哥，我有樣嘢想問你，你可以照直答我嗎？」雞仔再問。
「吓！？你問啦。」
「你係咪我？你係咪未來嘅陳鳳初？」
原來佢哋呢幾日已經發現咗我個秘密，睇嚟我都唔需要再隱瞞喇…
我將所有嘢都講返晒俾佢哋聽…
「…救世主就係鳳光大哥你？」二弟仲突然咁講。
「…有冇咁誇張啊？你有冇見過俾人斬斷手嘅救世主啊？」我講笑咁講。
「智商比我哋低嘅救世主都我見過幾次…」二弟都笑住回應我。
我見到雞仔用眼神提我，所以我都明白佢講緊嘅就係林十九。
喺呢個時候，唔知點解，我好想去掂一吓「師姐」。
我慢慢行咗埋去，仲一手抱起佢，淨係好滿足咁笑。
我知道佢唔係我嘅師姐，而係雞仔嘅師姐，所以只係戥雞仔開心。
呢個時空嘅所有嘢，對我嚟講都係好新鮮，我人生裡面…
就好似斷咗呢段時間嘅記憶一樣，所以直到呢一刻，只要雞仔快樂我就好安樂…
之後發展成點，我真係好想去改變，即使我認定咗歷史唔應該可以被改變都好…
最少希望我離開佢哋呢嗰一刻，大家都係快樂嘅。
「汪~！」
就連雞仔師姐都好似認同我咁。
「我諗你哋帶得呢隻狗仔返嚟，都係想我醫返佢啦…」
唔知點解，我明知醫神仲有嘢想講，但係我就係唔想佢講，想阻止佢咁，所以…
「嗱，你自己講嫁咋！」
點知佢真係仲有嘢講，仲要係唔啱聽嘅︰
「不過冇可能。解鈴還須係鈴人，幫到佢變回原型嘅，就只有佢個衰老豆。…要解放佢嘅怨氣，一定要佢自己解開心結，或者佢個衰老豆幫佢解開呢個心結。」
聽到醫神咁講，大家都呆咗一陣，直至靈兒出聲︰
「我諗…可以試吓用打賭嘅方式…透過打贏朱謀秉而要求佢做一D嘢…」
之後醫神都補返幾句︰
「…七重妖塔真係寶物中嘅寶物，每個門派都好想擁有佢，之不過…」
「又不過咩呢？」我問。
佢之後一次過講晒D高手出嚟，不過講真，呢班高手…
的確每個都最少同我不相伯仲。
「我哋夠有火鳳派後人，又有西斜余二十，驚咩啊？就去博一博啦！」
雞仔佢真係天真，不過我諗佢都係想真係醫返好佢師姐啫。
之後嘅日子，我就等醫神醫治…
而佢哋兩個原來喺我唔知嘅期間已經學識咗《伏魔劍十九式》…
係跟林十九所畫D公仔學嘅，佢哋就襯呢段時間苦練劍式，而我就…
都要作好準備…
久違了嘅《鳳凰七重天》。
自從去咗香港之後，呢二十年嚟我都冇認真練習過…
香港D妖魔鬼怪有限，根本唔需要我用足百二分精神去練成呢個鳳凰訣…
我一直都只係學到鳳凰劍式嘅「黃焰」，而師父最勁練到就係「紫焰」…
不過曾經聽過師父講，師公關海山先係最勁，係歷代最勁嘅火鳳派後人…
佢係練到去「黑焰」嘅境界，塵世間冇嘢會燒唔爛…
而且嗰種燒，係可以令物件瞬間蒸發嗰種…
所以我希望呢次…
以「黑焰」為目標，最少最少都要練成「紫焰」。
因為一個月之後嘅「七彩武林大會」，只許勝，不許敗。
(待續)
下集預告︰
而家一次過出現咗十隻妖怪…
註解︰
LEGO — 即係LEGO，個品牌好似就係個產品一樣。