第五十六集 ~ 鳳︰好地地一個妖怪武俠故仔,做乜要攪呢D大鑊嘢啊?
 
屈指一算,原來林十九講得啱,講疊馬,我哋好似仲勁添…
 
因為我哋除咗佢所講嘅呢幾個人物,仲有小雲呢隻神仙,而且…
 
我仲有「鳳凰七重天.黑焰」…
 
雖然未練成。
 


準備咗半個月,我哋修練成果就賣個關子先…
 
我哋見咁耐冇去市雜,一齊喬裝打扮去到多人嘅地方打探吓消息…
 
其實都幾諷刺,又好易打草驚蛇,因為我哋呢D道術之流…
 
喺平常市民眼中,一係勁到好似超人咁,一係戇到好似低能咁…
 
所以不嬲我哋呢D人都只係圍威喂,同行嘅人先知道大家嘅資訊…
 


平常市民無事不登三寶殿,冇妖魔鬼怪出現嗰陣,根本唔會搵我哋…
 
更加唔易有我哋嘅資訊,所以打探起嚟到幾有難度。
 
我哋行到去一條大街…
 
「好靚嘅豆腐花啊!埋嚟整返碗喇喂!西施豆腐,正啊!」
 
附近有位大嬸喺度大嗌,我見自己有D思鄉,香港個「香」…
 


有D掛住好似豆腐花呢類嘢食,所以我…
 
「忠義﹑雞仔,不如我請你哋食返碗豆腐花囉。」我講。
 
「好,但係…」忠義。
 
「你有錢咩?」雞仔。
 
「哈哈哈,忠義俾住先,有拖冇欠。」
 
之後我哋一齊去咗呢個豆腐街舖坐低咗…
 
「唔該三碗好似你皮膚咁滑嘅豆腐花丫。」
 
「…」


 
我似乎講錯嘢喇,因為我以前習慣跟D比我大嘅街坊叔父…
 
喺我住嗰度樓下間豆腐花舖咁叫,而當時個老闆娘皮膚真係好滑…
 
但係呢次似乎捉虫喇,忠義﹑雞仔,仲有一個肥躉躉老闆娘而家啤住我…
 
「唔好意思啊,我似乎講錯嘢。」
 
「哈哈哈,冇講錯,冇講錯,好啱聽,三碗我皮膚咁滑嘅豆腐花好快送到。」
 
忠義同雞仔冇講嘢,淨係噤住個口恥笑我。
 
「靚仔,見係你咋,你大碗D嫁。」個老闆娘大嬸仲要懶風騷咁喺咁耳邊講。
 


「喂,西施,你就好啦,而家有大屋住。」好在有個街坊搭嗲引走咗佢。
 
「托我世侄女洪福啫,佢嫁得好就好嚧。」原來個大嬸叫西施。
 
「係啦,嗰次比武我都有去睇啊,估唔到阿瑞基妹妹大過咗咁靚女,咁好身材噃。」
 
「似我囉。」
 
「係你先講得出嫁咋。」
 
佢哋講到「瑞基」,所以我忍唔住去偷聽佢哋講咩。
 
「而家我好失禮咩?」西施大嬸回應個街坊。
 
「你後生就真係西施,而家最多叫肥西施,D男人把口就衰啫,我識你咁耐,講吓都得呱,大家都一把年紀喇,肥大D都冇計啦,不過你都仲叫做靚嘅。」


 
「唔係丫,我覺得你幾好睇丫。」我又一時擔心瑞基,諗住搭嗲,點知…
 
換嚟忠義﹑雞仔同嗰個街坊都呆咗,而西施大嬸就…
 
「靚仔,睇嚟你好似對我有D興趣噃。」
 
「有…興…趣?」我好疑惑我究竟下一句要點講好。
 
「…」佢哋四個加埋全場街坊都望住等緊我哋回應。
 
「其實我認識你世侄女陸瑞基佢頭先聽到你哋講開佢所以我就諗住聽吓佢近況點我只係擔心佢近況啫冇其他嘅西施姐姐你係靚仲要好靚我潛越不得加上我已經有喜歡嘅人希望你明白係呢請問瑞基佢近況點呀?」我一輪嘴爆晒出嚟。
 
希望佢唔會再覺得我對佢有興趣,同講吓俾我聽瑞基近況點啦。
 


「嘩,好氣量,靚仔係唔同D。阿妹唔錯丫,嫁得幾好,方家嘅人都對佢幾好,不過佢之前出咗門幾日,我都唔知幾擔心,好在早幾日返咗嚟咋,我仲見到佢群埋晒D怪人,我有少少驚佢學壞囉,不過佢都大個女喇,嫁咗人,唔通我仲要而家先去教佢咩,而且…佢返嚟之後好似心事重重咁,我都唔知佢之前發生過D咩事,連問都未敢問啊。」西施大嬸講。
 
「忠義﹑雞仔,你哋打探完消息自己返去先,我想去見吓我一位老朋友。」
 
「好。」忠義答。
 
「大哥,其實我想問…你仲有冇繼續鍾意師姐啊?」雞仔突然咁問。
 
「點解咁問啊?放心,我唔會同你爭你個師姐嫁喎。」
 
「唔係啊,我係想知,未來嘅我…仲會唔會執著去愛師姐?」雞仔再問。
 
「哈,咁我答你會,定唔會,你會開心D啊?」
 
自己試探「自己」呢一吓真係…
 
唔知應該叫奇怪定攪笑好。
 
「好矛盾…我希望自己繼續痴心一片,但係如果作為你兄弟,我又覺得你應該要放低執著,勇敢去愛其他愛你嘅人,真係好矛盾。」雞仔咁答我。
 
「哈,放心啦,我比你執著多咗二十年,都係時候夠喇,我唔肯定我仲有冇下一春,但係我記憶裡面嘅師姐,喺比而家更早嘅時間已經俾南龍父子殺咗,所以我都唔知點解有狗狗嘅出現,總知我個師姐就已經死咗廿幾年,我想掛住都冇用,你唔同,佢仲在生,你要掛多陣啊,哈哈。」
 
「得喇,我唔單止會掛,仲要醫返好師姐,其實佢係點我唔介意,即使佢真係一世只係隻汪汪,我都會照顧好佢一世,但係我感覺到師姐佢自己唔係咁開心,佢好想變返做人,所以嚟緊呢次比武,我一定會全力應付。」
 
原來當年嘅我都幾值得人哋敬重,最起碼佢有我呢個廿年後嘅佢敬重丫。
 
我哋再閒話幾句之後,天色都開始暗喇,忠義同雞仔就再出發去打探,而我就…
 
為咗聽聽西施大嬸佢講吓瑞基D嘢,足足食咗七碗豆腐花…
 
問題係…
 
忠義冇留低錢俾我,睇嚟我需要以身相許呢次…
 
「靚仔,摸摸吓個袋,冇錢俾啊?」西施大嬸以一對凌厲嘅眼神啤住我。
 
「我…可唔可以?」
 
「算啦,以身相許我就唔使你俾錢啦。」西施大嬸佢咁講。
 
我聽到呢句當堂一額冷汗噴出嚟。
 
「哈哈。同你講吓笑咋,我唔係傻嘅,你係對我瑞基妹有興趣就真,不過佢嫁咗人喇,你唔好破壞佢好事啊。」大嬸再講。
 
聽到「破壞」兩個字,我為人師表,竟然真係曾經有一刻想過咁做…
 
真係慚愧,不過而家點都好啦,我只係想…
 
「唔係,我只係想去見多佢一次,當係了咗件心事。」
 
「估唔到你除咗靚靚仔仔,仲好似幾情心款款噃。好啦,你等多我一陣,你跟我去見見瑞基啦,不過記住啊,你要聽我話,唔好攪到我個妹嘅好事啊。」西施大嬸再三叮囑我。
 
到咗俟晚,我幫大嬸佢收好舖,就一齊行去方家大宅…
 
「係呢,靚仔,你點解會鍾意我個妹嘅?」西施大嬸問。
 
「吓!?鍾…意…」
 
我聽到呢兩個字,心裡面都有個疑問,究竟我對瑞基…
 
係一份咩嘅感情呢?
 
但係我用心一諗,可能就只有內疚同慚愧。
 
「你唔係鍾意我個妹咩?」佢再問。
 
「其實並唔係咩鍾意唔鍾意,只係…我覺得我欠咗佢。」
 
「欠…咗佢。」佢
 
講完呢句都停咗冇問,可能見到我有少少黯然神傷啦。
 
我哋好快就去到方家大宅外面,但係…
 
「!#$!^%!^!$#」突然聽到大宅裡面好嘈,究竟發生咩事呢?
 
我同西施大嬸立即衝入大宅…
 
竟然見到…
 
瑞基佢俾個男人捉住咗。
 
「方夫人,方少爺咩事啊?做咩捉住我哋瑞基啊?」西施大嬸驚恐地問。
 
「唔知,唔知啊!我都想知發生咩事啊?」個夫人回應。
 
而我就睇住…
 
呢個似乎叫方少爺嘅人嘅面色,擺明就係一個癲佬,佢捉到瑞基好實啊。
 
我以為嚟到呢個時空淨係最多要打妖魔鬼怪啫,估唔到而家仲要對付人…
 
仲要係一個黐線嘅人…
 
「瑞基!」
 
我稍為見到個方少爺呆咗半秒,我就立即衝前去…
 
(待續)
 
下集預告︰
 
我唯一可以叫做控制到場面嘅,就只有一招,玉石俱焚…
 
已有 0 人追稿