我一個女仔...坐喺一間以黑白色為主既咖啡店...飲一啖Espresso...

咖啡店...

乜真係咖啡店嘛?

雖然話佢呢道個店名係叫做“Whirling Coffee”…

之但係...呢道俾我既感覺...總係好似...好似一間攝影展覽廳...



環視四周...

喺白色既牆身又好...黑色既櫃檯都好...都掛左...擺放左...唔少大大小小既黑白相...

一幅又一幅…大大小小既黑白相...與白色牆身...白色天花...黑色地板...黑黑白白既梳化、檯凳、櫃...再加上我既白衫...黑長裙...構成黑白空間...

我拎起Espresso...細味一口...

好舒服...置身喺呢個黑白空間之中...總係覺得好舒服...好有安全感...



我本來就係一個...只有黑白既人...

唔係話我有色盲...

只係我...鍾情於黑白配襯...

真係估唔到...估唔到又會咁岩...會喺一間黑白配襯既咖啡店之中,等一個自稱情性既人。

情性...好古怪既名字呢...



點解我會喺呢間黑白配襯既咖啡店之中,等一個古怪名字既人?

講起上黎...就要講返起尋晚放工返到屋企...收到Patrick既Whatsapp之後...

*噹* “Patrick:返到屋企未呢?”

我一望部電話...望一望個芒...當我望到你Patrick Send黎既Whatsapp,我就已經唔想再睇落去...

反正我都唔會回佢...

我放一放低部電話...放一放低個黑色手袋仔...除一除對白色布鞋...行一行入去廚房...

開一開燈...拎一拎起包貓糧...行近窗台...行近正正瞓左喺貓床上既阿Knight...

睇住阿Knight條黑色尾巴喺道輕輕擺動...擺動...好似好享受咁...享受到好似連我返左黎都唔知咁...



我就拎一拎起個白色膠盤...放D貓糧落去...再放一放喺阿Knight面前...

只見阿Knight望左一眼之後,又合返埋對眼搖下擺下條尾...

呢隻阿Knight真係丫...就係自己顧自己...就連我返左黎,都唔望我一眼...

唉...物似主人形~果然係真架呢~

阿Knight係一隻全身黑色既貓咪~今年兩歲~係喺兩年前,一個朋友家中既貓女所生~

初初諗住上個朋友屋企睇下D貓仔~

之但係我一見到阿Knight個好似Cool Cool地既樣,我就對佢好似一見如故咁~



到阿Knight戒左奶,我就帶左佢返黎養~

阿Knight其實都好易養~因為佢都唔多理人~

總係自己有自己喺屋企行下~跳下~爬下~坐喺窗邊望下出面既風景~又瞓下覺咁~

有時阿Knight心情好既話,先會走上我大髀道瞓下咁~

真係好自我呢~

『算啦~算啦~我都係唔理你咁多喇~到你想理我既時候,自自然然就會黎搵我架喇~』

我就去拎一拎套衫...行一行去浴室...沖返個涼...

放鬆心情...沖涼個涼...一日既工作已經太攰...



每晚都要OT到十點先有得走...

返到黎屋企...就只有沖涼同瞓覺係最放鬆...

而實際上,唔好以為返到黎屋企就唔駛做...

沖完涼之後,我都仲要繼續工作...

著上一件白色大Tee...吹乾個頭之後,就喚醒部iMac...繼續做我未做完既工作...

我係一個時裝設計師。

平日既工作都係設計下D衫。



好似無乜野做咁,但其實...都幾花時間。

要設計好一件衫唔難!難就難在要過到你老細嗰關...

你老細係唔Buy你,你設計到識飛到無用...

呢個...就係我地做設計既難處...

設計係好講求個人既感覺。

要將我既個人感覺,貼合到老細既心意,係無乜可能...

而老細要將個設計改到岩佢心意既話,咁就唔係我既個人感覺啦...

咁設計出黎既,又點會係合心意架呢?

所以我唔單止要晚晚OT到十點,返到黎放完D貓糧俾阿Knight,沖個涼之後,又要繼續對住個芒畫畫畫畫畫...

一畫...又畫左成個幾鐘...

都係畫唔到D乜野出黎...

望一望部電話...

*噹* “Patrick:係唔係忙梗呢?”

唉...我部電話都已經俾Patrick攻佔左架喇...

都係上網睇下有無靈感好過啦...

我放一放低部電話,喺部iMac個Safari開一開個Facebook...

頁面一打開,我就見到有個Friend Like左一個Page...

個Page名係叫做...

『情性?』個名咁古怪既?

而呢個Page既個人資料相片...同封面相片...都係以黑白配襯為主...

黑白配襯...

我好自然咁就撳左入去個Page裏面...

視窗一轉,有個置頂Post就寫到明話“只要你不是戀兄、搶男友、師生戀,所有情困我也可以為你一一解開。”

解開情困?

係一個關於愛情既專頁?

之但係...點樣解開情困?又點先算係有情困呢?

情困...

我望一望部手機...

*噹* “Patrick:今晚唔好咁夜瞓喇~~~”

我諗呢樣都算係我既情困...

唉~反正都被個痴漢纏擾左咁耐...自己又無辦法解決...不如請教下人...

反正...呢個人又唔係我身邊既人...又唔識得...應該無咁多顧慮既...

就問問呢個情性有何高見。

我喺個Facebook Messenger打左幾隻字:“我有情困”

唔駛幾秒就有回覆...

我睇一睇個Message Box...係一個日期、時間、地點...

係要…約出黎見面嘛?

唔...約出黎...

我再睇一睇個日子...

係聽日...聽日我放假...而且呢個星期諗點畫都諗到個腦都實晒...

如果試下做下其他野...鬆下個腦...可能之後會諗得出新鮮既設計出黎...

好啦。

“OK”

“到時見。”

答得真係好爽快…

睇黎…呢個情性...都係一個爽直既人...

於是,我就喺今日呢一個時間,黎左呢間名為“Whirling Coffee”既咖啡店中,等一個自稱情性既情聖出現。

我拎起杯Espresso...再細味一口...甘而不苦...濃而不澀...

就好似人生一樣...我既人生...

我既人生就好似Espresso一樣...

我好享受我既人生...一種甘味既人生...

就係因為咁,我先會飲Espresso...

或者Espresso就係一種...只有甘味人生既人先會懂得欣賞...

又令我諗起痞子蔡既《第一次的親密接觸》裏面,輕舞飛揚所提到既“咖啡哲學”...

「即使全是咖啡...也會因烘焙技巧和香、甘、醇、苦、酸的口感而有差異...我的鞋襪顏色很深,像是重度烘焙的炭燒咖啡...焦、苦不帶酸...小喇叭褲顏色稍淺,像是風味獨特的摩卡咖啡...酸味較強...毛線衣的顏色更淺,像是柔順細膩的藍山咖啡...香醇精緻...而我背包的顏色內深外淺,並點綴著裝飾品,則像是Cappuccino咖啡...表面浮上新鮮牛奶,並撒上迷人的肉桂粉...既甘醇甜美卻又濃郁強烈...」

就喺我又諗起“咖啡哲學”之時...

「你好~」有把成熟穩重既男仔聲喺我面前出現...

我回一回神,就望到古天樂坐喺我面前...

係...古天樂?

我眼定定咁...望清楚D眼前呢個拎住杯...一樣拎住杯Espresso喺手既古天樂...

眼前呢個古天樂...著上黑色既西裝褸...白色恤衫...黑色幼身領帶...黑色西褲...黑色皮鞋...

一樣飲Espresso既古天樂...亦都一樣著上黑白配襯...

而我再留心D打量一下面前既古天樂...睇起上黎都只不過係廿七、八歲咁上下...

同我差唔多年紀...有可能比我更年輕...

年輕過我既男仔...

唔係真係古天樂...

只係好似...好似樣...

原來喺呢個世界上,真係可以有咁似樣既人...

而呢個咁似古天樂既男仔,點解會坐喺我對面之餘,仲同我打招呼呢?

唔...唔通...眼前呢個古天樂...就係我今日要等既...

「我就係情性~」古天樂自我介紹一下...

果然...果然眼前呢個古天樂,就係我今日要等既...自稱可以為我解開情困既...情性...

「你就係...雅暖?」情性打量一下我...

『嗯...我就係雅暖...葉雅暖...』我冷冷咁放下一句...

情性...

一個咁年輕既男仔...可以為人解開情困嘛?

我總係唔多認同...

我仲會覺得...呢種男仔唔得成熟...

唔得定性...

總係鍾意追求新鮮刺激...

總係思想簡單...

總係只顧眼前...

「係呢...關於你既情困...唔係同戀兄、搶男友或者係師生戀有關架嘛?」情性拎住杯Espresso飲一口...隨便咁問一句...

『唔關...』我都好隨便咁答一句...

之但係...懂得欣賞Espresso既人...唔會咁簡單...

照理黎講,一個年輕既男仔,係唔會懂得欣賞Espresso既甘味...

佢地只會嫌Espresso太苦...

苦到入唔到口...

就好似苦瓜一樣...

一定要有D經歷...一定要有返D過去...

“真想不到當初我們也討厭吃苦瓜

當睇清世間所有定理又何用再怕

珍惜淡定的心境 苦過後更加清 萬般過去亦無味 但有領會留下

今天先記得聽過人說 這叫半生瓜 那意味著它的美年輕不會洞察嗎

到大悟大徹將一切都昇華 這一秒坐擁晚霞 我共你覺得苦也 不太差”

「咁你既情困係關於...」情性好認真咁望住我...好似好耐心咁等我講...

『有一個男仔纏擾住我...我想令佢死心...』我簡單直接咁講出我既情困。

「嗯?以你咁冷酷既外表黎睇,無理由無試過好絕咁拒絕佢架喎~」情性困惑咁望住我。

『我就係有試過...仲試過好多次...但係佢都係唔肯死心。』估唔到情性又真係幾識得睇人...

定係我俾人既感覺真係咁冰冷呢?

「你同佢係點識架先?」情性又打量一下我。

『三年前一個中學舊生聚會既時候,佢主動同我傾計...本來我都只係當佢係一個舊校友,隨便咁應酬下佢就算。點知佢就一直咁搵我...一開始我都感覺得到佢對我有意思...我亦都好快又好直接咁同佢講我唔會愛上佢,叫佢死左條心。三年喇...三年黎我都係咁決絕...之但係佢就好似死唔斷氣咁,一直纏住我...我真係無佢辦法...』除左決絕之外,我真係唔識用其他方法...

「哦?咁點解你唔試下同佢開始呢?」情性飲一口咖啡。

『因為...佢細個我...』我都飲一口咖啡。

「哦?細你幾多丫?」情性諗一諗。

『兩年...』我唔明情性要知佢細我幾多有乜關係...

「兩年咋嘛~都唔係差好遠姐~」情性帶住微笑點點頭。

『細過自己兩年就係細過自己兩年...細過自己既男仔都係比較幼稚...唔得成熟...』呢三年黎,我都覺得Patrick好似一個小朋友咁...

「你今年幾多歲?佢又幾多歲?」情性打量一下我。

『我今年...廿八...佢廿六...』雖然話年齡係女人既秘密...但我從來都唔在乎俾人知到我幾大。

「原來你今年廿八?真係睇唔出~雖然睇你既外表都好似飽經風霜咁...但仍然年輕~而且佢都廿六歲啦~廿六歲既男仔唔幼稚架喇~定係你...你有其他原因...唔鍾意同細個自己既男仔一齊呢?」情性拎起杯咖啡,打量住我...

唔鍾意同細個自己既男仔一齊既...其他...原因...

情性一問到呢一點...

我個心...我個心就...好用力咁跳左一跳...

其他原因...其他原因...

『總之就係唔鍾意。』就算有其他原因...我都無必要講出黎...

「係丫…」情性飲住杯咖啡,打量一下我...

其實喺呢段期間,俾情性咁樣打量住,都真係有D唔自然...

我一直都唔習慣俾男仔望住...

就算係同事又好...上司又好...我都唔鍾意咁樣俾佢地望住...

我總係覺得...覺得佢地好似去左動物園睇珍禽異獸咁...

老實講句,喺我眼中...你地先係珍禽異獸...

「講真一句...心裏面有一條刺,唔正視佢會發炎。你係一個聰明既女仔...我諗你明我講咩既~」情性再飲一口咖啡後,起身離開咖啡店...

我一個人,坐喺張梳化上...望住杯空空如也既咖啡杯...

心裏面有一條刺...唔正視佢會發炎...

正視?點解情性會叫我正視呢?

乜我似無正視到咩?

我就係正視佢先搵情性出黎問下有乜好建議去令Patrick死心。

點解情性會講到我好似逃避梗咁架呢?

我唔覺得咁樣係一種逃避喎。

如果我係要逃避,我就唔駛放假走出黎搵你啦...

呢個情性...真係一個怪人黎...

我望一望四周...

唔...都好既...起碼俾我發現到有呢間咁岩自己既咖啡店。

都總算無白費時間。

我就坐喺間咖啡店裏面,繼續享受住安靜既環境,繼續享受住杯Espresso。

之不過,呢個世界又點會咁盡如人意呢...

*噹* “Patrick:出邊好似會落雨喎~有無帶返把遮先出街呢?”

Patrick又Send Whatsapp過黎...

講真嗰句...我咁大個人...緊係識得照顧自己架啦...

縮骨遮長期放喺個袋裏面就必然既事...

又使乜你當我好似個小妹妹咁提點呢?

我就真係唔想理Patrick咁多...

其實我一直都無乜點覆過Patrick...

只係有時佢會問起D重要野...可能要我俾D意見佢,我先會覆佢一、兩句。

話晒都係正經野,我都唔會托手踭。

但係Patrick Send最多既,都係D無聊既噓寒問暖...

我真係唔會理佢咁多…

所以我都係果斷咁放返部電話喺小圓檯面...繼續享受自己既生活態度。

我坐下坐下...望下D黑白相...又飲下咖啡...

*噹*

茶几上部電話就不時都會發出*噹* *噹*聲響...

而我每次偷偷望一望部電話,都係見到Patrick Send Whatsapp過黎...

唔...

其實我真係好想熄左部電話佢。

之但係...又怕上司會有緊要事打黎搵我...

*噹*

*噹*

總係覺得...

*噹*

*噹*

*噹* *噹* *噹* *噹*

好煩擾...

點解就係俾我靜靜地享受一下片刻寧靜都唔得架呢?

*噹*

*噹*

*噹* *噹*

唔…算喇算喇…都係早D返去陪下阿Knight啦...

我就執齊D野,離開呢間同自己一樣風格既咖啡店。

離開咖啡店,落去搭地鐵。

我知道係有巴士直到屋企...

之但係...我都係會選擇搭地鐵。

因為我需要留意更多唔同既人...唔同既事物...

我唔鍾意...但我無辦法...

我無辦法唔去留意下唔同人既衣著...唔留意下唔同事物既配襯...

今期興D乜野顏色...多人著邊種款式...

再將佢地A+B=C...

創作出迎合市場需要既時裝...

唔係我自己想創作出黎既時裝...

真係好攰…又好厭惡...

大部份為工作而工作既香港勞工係唔會明白,創作違背自己風格既設計係幾咁難受...

就好似每落一筆都同自己內心角力一樣...

真係好攰…又唔會做得好...

不過無辦法...我始終都要同上司交代...要過到上司嗰關...

做設計既...就係咁...

喺車廂之中,我一直都好留意身邊既人...

每個人都著得好鮮豔...配襯都係彩色繽紛咁...

就只有我一個著上黑白...

難道就只有我...只有我一個鍾情於黑白之間?

難道而家既世界真係咁多姿多彩...繽紛豔麗?

我唔覺...我真係唔覺...

至少我既世界唔係...

我繼續喺五顏六色之中停留...穿梭...

當我黎到荃灣之時...

“灑 灑 灑 灑 灑”

落起大雨黎...

“轟隆 轟隆”

仲行雷閃電...

真係估唔到...都已經到左秋天...仲會出現呢種狂風雷暴...

香港既天氣...真係越黎越反常...

“灑 灑 灑 灑 灑 灑 灑 灑 灑 ”望住密密麻麻既雨簾...

“轟隆 轟隆 轟隆 轟隆 轟隆 轟隆”閃光閃過不停…

我一把縮骨遮...睇黎都唔擋得幾多…

都係行下商場...繼續取下經啦...

我行一行入商場...行一行入5CM...

「Welcome To 5CM~」一個帶眼鏡冬菇頭既女仔歡一歡迎我...

我點一點頭之後,就行去睇下D衫...

我一邊行...一邊望...

「返左好多新款喎,好鮮豔架~」個女仔再介紹一下...

『嗯...』我點一點頭,再睇下睇下...

睇住好多衫款都係出自我D同事既手筆...

一件又一件…有紅有橙有黃有綠有青有藍有紫...

乜色都有,仲要有好多...

就係無乜黑白色...

就連出名以黑白色為主打既5CM都轉出彩色款式...

唔通黑白配襯真係再無生存既空間?

唔通全世界都要披上彩色喺面先叫迎合時勢?

有無生存空間都好,我都要堅持一下...唔要披上彩色喺面頭...假扮繽紛多彩...燦爛盛世...

做設計...始終都要忠於自己。