星期一既早上,做好晒返工既準備。

當然唔少得放定D食水同貓糧俾阿Knight。

摸一摸仲懶洋洋咁瞓喺貓床上既Knight...

「喵~」阿Knight擺下擺下條尾,同我Say句Bye。

『今晚返黎再陪過你啦~拜拜~』摸多兩摸之後,我都係時候出門口。





呢隻阿Knight,成日都咁懶洋洋咁~

不過好彩既係佢又唔會肥~

仲係咁FIt~

唔知喺我返工既時候,阿Knight會喺屋企做D乜架呢?

唔知係唔係會喺屋企跑跑跳跳架呢?





我又好唔好喺屋企裝返隻Cam呢?

不過平日放工返到屋企,又唔見得屋企有乜咁亂~

又無整爛D野~

只係見阿Knight都仲係咁懶洋洋咁瞓喺張貓床上~

都係算啦~由得阿Knight喺屋企想點就點~無謂監視佢咁專制啦~





坐上西鐵返工,呢個鐘數都好多人...

每個趕返工既乘客都低著頭,望自己部手機...

乜真係有咁多野睇嘛?

我都拎一拎部手機出黎睇一睇...

畫面上所顯示既,全部都係Patrick Send俾我既Whatsapp...

真係睇到都想立刻Lock機...

唉...都係靜靜地挨喺塊玻璃道閉目養神一下算啦...

我閉目養一養神,直到到站...直到出站...





經過尋日一整日狂風雷暴之後,今日雖然話有返D陽光...

但總係好凍...

今個秋天都好似黎得特別早...特別凍咁...

不過凍D更好...

我係一個怕熱唔怕凍既人...

所以我都係比較鍾意秋天多…

灰灰淡淡既秋天...最有安全感...





我就喺秋風吹送下,一直行...一直向住公司方向行...一直行到返到黎公司...

「喂喂喂雅暖!張生打鑼咁搵你丫!」我坐都未坐低,我既同事阿Kay就拉一拉住我...

『哦哦...咁...我去搵左張生先...』我就只好放一放低個袋,行去張生間房...

張生係我地既阿頭...

我地既設計都要交到佢手上審理...

而張生搵得我咁急,都應該係同我尋晚E-mail俾佢既設計畫有關...

“咯 咯 咯”敲一敲門...

「入黎!」張生把聲有D火氣...





『張生早晨...搵我有事?』我入一入到張生間房,望一望張生既面色...

張生塊面真係同我今日條長裙一樣咁黑...

「葉雅暖!你仲問我搵你係唔係有事?!你無睇Whatsapp架?!」張生一開口就大聲鬧!

『Whatsapp?』我又真係無睇喎...

每次我一見到Patrick Send Whatsapp黎,我就Lock左部機...都無理到有無其他人Whatsapp我...

好多時就連睇都無睇...一心諗住又係Patrick Send Whatsapp過黎...就直接Lock機唔理...

「尋晚你一Send D圖過黎既時候,我咪Whatsapp左你話俾你聽D圖唔收貨,叫你再改架囉!我就等到今朝都唔見你再Send過改左既返黎!你個Whatsapp廢架?」“啪”張生仲一手拍落張檯道!





『唔好意思...我真係無睇到...咁唔知有咩問題?想點改呢?』做乜一定要用Whatsapp呢?用E-mail直接覆唔得架咩?又或者直接打俾我咪得囉...

E-mail廢架?無交電話費架?就只可以用WI-FI上Whatsapp架咋?

「你仲好意思問?我之前已經叫左你唔好再用黑白色架啦!你睇你又交D乜野俾我?又係黑白色!喂!你既理解能力係唔係有問題架?使唔使我兜口兜面同你講多次呀?個款無問題呀!係D色有問題呀!」“啪啪”張生再用力拍張檯幾下!

『我唔覺得黑白色有乜問題。』要堅持...

「唔覺得黑白色有乜問題?係好大問題呀!喂!你有無潮流觸覺架?你無潮流觸覺都去睇下D時裝雜誌!再唔係就出街睇下街上興D乜啦!法國嗰邊都話啦!今個冬天係興色彩繽紛呀!反恐呀!和平呀!希望呀!生氣呀!唔係死人送殯又黑又白咁呀!」“啪啪啪”張生再用力拍張檯幾下!

『每個人既個人風格都唔同...唔一定潮流係乜就要跟住係乜...』我地係要創造潮流...唔係被潮流洪流沖住走...

「哎呀~你同我講個人風格呀?個人風格?你識條鐵咩?!喂!羊群心態呀!人有我有呀!你睇下早幾年個Pokemon Go一出,有無睇過Pokemon既人都痴晒線咁狗衝去玩!特別係香港呀!香港就係一個咁既地方呀!無人會理你好唔好,只係會理係唔係興!興就要跟!仲要好快咁去跟!唔係既話轉個頭又Out架喇!你明唔撚明呀?!」“啪啪啪啪”張生再用力拍張檯幾下!

『明...』我明...香港就係咁...

只要多人追捧,唔理嗰樣野係唔係白痴低能弱智無聊,都要跟住去做...

相反就算係幾值得深思深究反省留意都好,係無人在意就係無人在意...

呢個就係香港...

亦都係點解會有咁多懷才不遇既原因...

「明仲唔快D同我死返出去改過俾我?!要快呀!你已經徙左我好多時間架喇!」“啪啪啪啪啪”張生再用力拍張檯幾下!

『咁我返出去先...』我轉一轉身...行返出房...

「你老味真係唔撚講粗口都唔撚得!」

我行一行返埋位...

「雅暖~唔緊要啦~你咪求其整D紅丫橙丫黃丫綠丫青丫藍丫紫丫落去交貨咪算啦~打份工姐~唔使咁傷神既~」阿Kay安一安慰我...

『嗯...明架喇...我無事...』只係唔甘心...

「嗯~明就最好啦~加油丫~」阿Kay拍一拍我膊頭後,返返埋位做自己野...

我就坐一坐喺個位道...嘆一口氣...

點解...點解好似...好似無乜人明白我呢...

好多時,我都只係想做返自己想做既野。

堅持自己認為岩既事。

貫徹自己既立場。

但點解總係好似...好似...總係諸多阻攔咁架呢?

點解總係要對D無理既指示言聽計從?

點解就係咁無自由?

點解就連思想都要受人控制?

唔係上面話乜,我就要跟住做乜...

上面講既野唔一定係岩晒…

就算係岩晒,都唔一定係唯一既方向...

我地都有我地自己認為岩既路...

我地都可以選擇行我地自己認為岩既路...

可能係無咁穩陣...

但出黎既效果可能會比你諗既更好。

之但係...而家既社會就係唔Buy呢套...

而家既社會...就只有隨波逐流...人云亦云...

跟大方向做就岩架喇...跟大方向做就無衰架喇...

跟大方向...跟大方向...

“啪 啪”我用雙手輕輕拍一拍自己塊面...

『好啦...就算幾唔願意都好...都要試下隨波逐流...』

我開一開著部iMac...打一打開程式...開始喺D五顏六色上點下點下...

一路點下點下...一路掃下掃下...畫下畫下...

*噹* “Patrick:公司D冷氣凍唔凍丫?有無著返件外套丫?”

檯面上部電話不時都會“噹噹”響...

而每次一望到個Mon,又係Patrick Send黎既Whatsapp...

*噹* “Patrick:著返件外套~唔好凍親喔~”

每次都係...

*噹* “Patrick:有無鼻敏感丫?你喺冷氣房太耐都會鼻敏感架喎~做野做耐左,落去樓下行個轉啦~”

無一次唔係...

*噹* “Patrick:落樓都要著住件外套喎~樓下都好凍架~”

點解Patrick可以咁得閒架呢?

*噹* “Patrick:做野做耐左,要抖返下~做下D伸展運動喎~”

佢唔駛做架咩?

*噹* “Patrick:我都有伸展下架~企得多都有跑下跳下架~”

我記得Patrick係做....茶記水吧...

*噹* “Patrick:有時沖野沖得多,都會Fing下對手~鬆一鬆架~”

乜水吧真係咁得閒架咩?

*噹* “Patrick:對住個Mon太耐都會好攰架~有無望下我送俾你盆苔蘚呢~有助舒緩眼部神經架喎~”

我拎一拎起檯頭盆苔蘚...

玻璃瓶裏面,長滿綠色既苔蘚...

係喺我個位之中...唯一一樣唔係黑白色既物體...

可能係過左早餐時間,所以佢會咁得閒掛...

做水吧都幾好丫...起碼唔使不斷用腦用腦用腦...

用到個腦都實埋...

間唔中仲可以沖下野飲俾自己飲…

有時候,都真係幾需要放鬆一下...

放鬆一下...放鬆一下...

我拎住盆苔蘚擰下擰下...望下望下...呆下呆下...

綠色既苔蘚...綠色既苔蘚...

綠色...綠色...

苔蘇既綠色都好似...好似幾自然...幾舒服丫...

唔...好啦~就試下用呢隻綠啦~

我就將盆苔蘚放一放近部iMac...揀一揀返岩隻色...為我既設計添上苔蘚既綠色...

掃下掃下...畫下畫下...搞掂晒之後Send返個E-mail俾張生...

好啦~而家就睇下張生收唔收貨啦~

*噹* “Patrick:岩岩條街爆左食水丫~我地間茶記無食水供應要迫住休息~而家放工~有無時間一齊食Lunch丫?”

食Lunch?

我再望一望個鐘...原來喺不知不覺間已經差唔多到食Lunch既時間...

之不過...

“有野做 唔得閒”

我就真係唔係好想同Patrick食Lunch...

*噹* “Patrick:唔緊要~唔緊要~下次啦~忙還忙都要食D野喎~唔好餓親~”

始終...我都唔係咁想見Patrick...

更唔好話單獨食飯...

我唔想俾佢有一個誤會...

誤會我想俾機會佢...

男仔就係咁奇怪...食餐飯...行下街...睇下戲...講多兩句都會誤以為你對佢有意思...

我唔明點解D男仔會咁諗...

或者喺佢地心中,女仔同佢地Close D就只有對佢地有好感...

從來都唔會諗只係想做個朋友...或者再普通D...純粹唔好意思拒絕你既好意...

當轉個頭同你講清楚既話,又話你拎左咁多著數...使左佢咁多次先話只係想做個普通朋友...收兵就收兵...死港女就死港女...

完全都唔諗下其實一直以黎都係你自己一廂情願。

為免到最後Patrick都係咁睇我,所以我一直都對佢決絕...等佢知難而退...

但好奇怪既係...就算我點對佢決絕都好,佢都係咁死纏難打...

生命力仲強過小強...

唯有希望有一日,拒絕佢拒絕到佢厭...有其他目標...自自然然自動放棄啦...

正當我想放一放低部電話之時...

*噹*

又有Message...究竟仲要等幾耐,先會等到佢心死架...

我睇一睇個Whatsapp...

“Carol:喂~得唔得閒一齊食個Lunch丫~”

嗯?係Carol?

呢個衰妹...又會咁得閒既?

“咁得閒既?唔使返工咩?”

*噹* “Carol:岩岩喺你呢頭見完個客~又可以食埋個Lunch先返~咪搵你出黎一齊食囉~”

“你好似過左Probation無幾耐咋喎 咁快就練精學懶 唔怕俾人炒?”

*噹* “Carol:識得學就緊係過左Probation黎學架啦~而家唔懶等幾時喎~”

“你都得架喇”

*噹* “Carol:放心啦~放心啦~我有足夠時間食Lunch既~唔會遲到~唔會俾人炒~咁你得唔得閒一齊食個Lunch姐~”

“OK丫 可以一齊食丫”

*噹* “Carol:咁好啦~十五分鐘後喺你公司樓下等啦~”

“OK 十五分鐘後見”

*噹* “Carol:嗯嗯~十五分鐘後見~”

同Carol撐下檯腳...都可以話係...放鬆下既~

Save好晒要Save既畫...

整理一下檯面...

拎一拎部電話...銀包...

我就落去公司樓下等Coral。

企喺大門前吹下風...

“乞嗤...嗤...”鼻癢癢咁...

睇黎又鼻敏感...

雖然話我好鍾意清涼既天氣,但喺每逢轉天氣或者喺冷氣地方太耐,都會鼻敏感...

總係要喺享受自己鍾意既野既同時,亦要承受埋難受既野...

或者呢D就係人生...

“嗤...嗤...”再喺大門前打多兩個乞嗤...

「Sorry~Sorry~岩岩行錯路~所以遲左~」Carol跑住過黎。

『唔緊要。都唔係等左好耐咋嘛。想食D咩?』我望住帶住副黑色粗框眼鏡既Carol。

「我想食日本野丫~呢頭有無日本野食架?」Carol捉住我隻手問一問。

『日本野…行去對面商場有間元氣...岩唔岩食?』我諗元氣點都好過明將掛...

「好丫~好耐都無食過元氣~」Carol點下點下頭。

『嗯。咁我地行喇。嗰邊。嗰邊。嗤...』我就帶住Carol行。

「你又鼻敏感丫?」Carol問一問。

『嗯嗯。嗤...』仲未停到落黎...

「有無食藥丫?」Carol又問一問。

『無丫…嗤...過一陣就無野...嗤...』不過今次耐左少少。

可能係喺冷氣房太耐喇...掛住畫畫畫...都無出黎抖一抖…

「你唔覺得辛苦架咩?」Carol打量一下我。

『都...唔會太辛苦...』鼻敏感...只係好小事...習慣到就無野。

「俾我就真係唔得喇...癢癢咁又抖唔到氣...辛苦死我~」Carol皺晒眉頭咁擰擰頭。

『其實真係無乜野既…習慣左就唔當係一回事...你睇,我而家已經再無打乞嗤。個鼻都唔再癢。』習慣左就無問題。

「習慣就好了?你真係好厲害呢~」Carol傻傻咁笑一笑。

『唔…係咩…』

其實我真係唔明點解Carol會覺得我厲害。

只係習慣到鼻敏感就好厲害?

只係一種習慣。

經常遇到就會習慣。

所有野都係一樣...

時間耐左,就會習慣。

同Carol好快就行左過黎元氣。仲要無乜人好快就有位。

同Carol一邊食野,一邊傾下計咁。

『係呢,返工返成點丫?』我都關心一下Carol既工作。

「返工丫...都OK既~我既上司都好照顧我...之不過...」Carol咬下咬下對筷子...好似心事重重咁...

『之不過?』我打量一下Carol。

「之不過我上司...即係我既男神丫!佢就快要結婚喇!!!」Carol扁晒嘴咁...

『係丫?原來...你既男神已經去到談婚論嫁既地步...』原來...Carol面對梗愛人結婚了...

「唉...真係勁Down...佢未婚妻仲要係勁靚女...唉...」Carol面色一沈...

『靚唔靚女又點?唔通唔靚女既話,你會走去搶新郎咩?』我打量一下Carol。

「我!我又唔會咁做...」Carol低著頭,擰擰頭。

『咁咪係囉。』靚唔靚女根本就無關係。

最重要都係睇個男仔...

個男仔係唔鍾意你就唔鍾意你...

如果佢係鍾意你,自自然然就會離開佢既女友撲埋你道...

離開佢既女友...撲埋你道...

「係姐...但都係會唔開心架嘛…」Carol仲係扁晒嘴咁...

『就算唔開心...都改變唔到D乜...』世界仍然在轉動...

「咁我可以點喎...」Carol一面無奈...

『如果真係唔可以接受,只好離開...避開...唔再接觸佢...』逃避...有時可能係唯一解決既方法。

「離開...避開...唔再接觸佢...點解咁似貓咁既~」Carol笑一笑。

『係咩?或者係俾阿Knight影響到掛...每次我想幫阿Knight沖涼,佢都總會走入床下底~』諗起阿Knight就真係好笑~

「係架?阿Knight佢唔鍾意沖涼架?」Carol好似對阿Knight有D興趣。

『佢唔係唔鍾意沖涼~佢係唔鍾意我幫佢沖涼姐~如果我帶佢去寵物店既話,佢又會好享受架喎~D姐姐仲話佢好似唔願走添~』搞到D姐姐好似覺得我對阿Knight勁差咁...真係俾佢激死~

「哈哈~阿Knight真係好有個性呢~真係物似主人形~」Carol恥一恥笑我~

『我邊有佢咁有個性呢...』我覺得阿Knight自我好多囉...

「我覺得你比起好多女仔黎講,都有個性得多喇~」Carol笑住口咁打量住我~

『係咩…』其實...我又唔係好覺...

應該話...我平時都無乜留意其他女仔...

甚至乎...我都好似無乜留意身邊既人...

我總係會覺得...每個人都有佢自己既故事...

每個故事都會改變佢自己既內心想法...佢自己既性格...

而唔係每一個人,都鍾意將佢既故事講俾人聽...

相對地...亦都唔係每一個人都鍾意將自己既內心想法完完全全展露喺人前...

或者最容易睇得到既...就只有性格...

「真係架~我覺得你真係好有個性~又好特別~」Carol好認真咁望住我,點一點頭。

『唔好當我奇珍異獸咁啦~』我無奈咁笑一笑,擰擰頭。

「邊係呢邊係呢~我都唔係當你係奇珍異獸~我當你係火星人咋嘛~」Carol笑笑口咁點點頭~

『火星人丫...乜我真係咁似火星人咩?好多人都問過我隻UFO喺邊~』我都係好無奈咁擰擰頭。

「嗱~所以話都唔係只係得我一個話你特別架~」Carol搭一搭我膊頭,笑笑口咁點一點頭。

『其實只係處事方式各有不同姐~』

我一直都係咁認為...

認為每個人既處事方式都會有出入...

而我...我同其他人既出入比較大姐...