同Carol食完個Lunch...又傾左一陣傾之後...

「保持聯絡啦~」Carol同我揮揮手。

『保持聯絡。』我又同Carol揮手道別後,就上返公司。

我一上返公司,行返埋位,凳都未坐低,阿Kay又拉一拉住我:「喂喂喂~張生又叫你一返到黎就第一時間入佢房搵佢丫!」

『哦...』而家係唔係就連食飽抖抖都唔得呢?





不過都係算啦...快D去睇下個張生又有乜貴幹罷啦...

“咯 咯 咯”敲一敲門...

「入黎~」張生既語氣好似好溫和咁...

『張生...搵我又有事嘛?』我入一入到張生間房,望一望張生既面色...

而家張生既面色好過今朝好多...





雖然講唔上係笑晒口,但至少無黑起塊面先...

「雅暖~雅暖~我都話你掂架啦~」張生仲要一開口就讚我...

『嗯?』但我就唔係好明張生讚梗我D乜...

「你頭先Send過黎嗰幾個設計丫~綠色嗰幾個呢~掂晒啦~」張生仲要俾個“Like”我...

『哦...哦...』我點下點下頭。





原來張生係講梗今朝Send俾佢嗰幾張設計...

收貨咪好囉...Whatsapp我咪得囉...使乜召我入黎表揚一番呢?

「我都話左你唔係剩係識得畫黑白架啦~隻綠色幾咁生機勃勃丫~」“啪啪啪”張生仲要拍晒手咁。

『嗯嗯...』乜真係咁生機勃勃咩?

其實我又唔係好覺咋喎...

我只係覺得...OK咁啦...睇得上眼啦...幾舒服咁啦...

無其他啦...

「之不過...得過三、四張係唔夠架囉...」張生又皺一皺眉頭..





『嗯嗯...』我好難先諗到呢三、四張出黎...

你就竟然咁隨口就講出“唔夠”?

「我之前都講過...你起碼都要俾夠十幾廿張我先夠數架啦!」張生又再面都黑埋...

張生平日係唔係有練開變臉...

變得又快...又黑...

「仲要係唔同顏色!唔同系列既!明唔明丫?」張生D語氣都變埋...

變得好重...





『嗯...』明就明...

「明仲唔去做?!今日之內好俾到我喇!」“啪”張生拍一拍檯!

『今日之內?我諗未必得...』點可能喺一日之內畫到十幾廿張出黎?

你話畫黑白色就話容易...

但要我背道而馳...未免太強人所難...

「咁唔係你想點呀?雅暖姐...」張生囧住面咁問我...

『俾多一個月我...一個月...應該可以交到貨...』講真嗰句...一個月都唔知得唔得...

「一個月?!一個月已經唔係冬裝啦!一個月連春冬裝都唔係啦!春夏裝都黎喇!你耍我呀?!」“啪啪”張生又拍一拍檯!





『唔...』我唔係耍你...係你似耍梗我姐...

「唉...我唔理你...總之你就盡快畫起俾我...盡快呀!得未呀?!」“啪啪啪”張生又拍一拍檯!

『嗯...我盡快...』可以點盡呢...

「仲唔快D出返去盡快搞掂佢?!」“啪啪啪啪”張生又拍一拍檯!

『咁我返出去先...』我轉一轉身...行返出房...

「盡快盡快...真係九姐咁款架喎...」

我行一行返埋位...坐一坐低...





十幾廿張...唔同顏色...彩色...

點畫丫?

唉...

點畫都好都要盡量試下畫架啦...

我就繼續喺個顏色盤上亂咁點...亂咁畫...

畫黎畫去...又Del...又Undo...

畫極都係畫唔到岩心水既顏色...

畫到個腦都實晒...完全無靈感...

都係上下Facebook睇下有乜野睇...

一打開Facebook...睇到以藍白色配襯既Logo...

點解Facebook Logo係以藍白色做配襯架呢?點解唔係紅白色呢?

我有上網睇過有關既解說...

網上有文章話,其實係因為Mark Zuckerberg係紅綠色盲,藍色係佢可以睇得最清楚既顏色。

人地因為天生既缺陷,就可以用自己睇得最清楚既顏色做自己品牌既特色。

而我...點解就唔可以因為我個人既喜好...對黑白色既敏感而創造出自我既風格呢?

呢個世界...真係有D唔公平...

好唔公平...

我就繼續睇下個Facebook...睇下有乜野睇...

其實我自己平時好少開Facebook...

更唔好話會有乜野更新上去...

因為我一直都無乜野好放...

自己既事...放喺自己心裏面就好了...

無需要記錄喺網上...

仲要Share出黎俾人睇...

點解要Share出黎呢?

乜真係有人會在意你今日遇到D乜?發生過D乜?做過D乜咩?

Post相上Facebook就更加唔知為乜...

你話要儲起佢既話,一隻外置Hard Disk已經足夠...

一隻唔夠就兩隻...

兩隻唔夠就三隻...

三隻唔夠就買夠一打...

總有夠既時候...

如果你硬係要話買外置Hard Disk好貴...又有機會壞既話,你都仲可以上傳去雲端。

不過可能你D相真係太多...太大...多到大到雲端都唔夠位放...迫於無奈只好放上Facebook開心Share啦...

我碌下碌下個Facebook...

睇到一張又一張朋友放上去既相片...相簿...

呢個話岩岩同男朋友去左半島食完個自助餐...

嗰個話坐住男朋友架Maserati遊梗車河...

呢個話去左日本旅行...

嗰個話岩岩去到機場...

呢個話喺冰島睇北極光...

嗰個話去福島感受幅射…

雖然張張相都五顏六色...色彩鮮艷...

但我就係感覺唔到...感覺唔到歡欣...喜悅...幸福...

就只有...混濁…

無錯...就只有混濁...

令人討厭既混濁感覺...完全吸引唔到我視線...

試問咁令人討厭既混濁感覺,又點可以令我產生出彩色既靈感呢?

唉...

Facebook就只有呢D...

成個Facebook都只係得混濁既感覺...討厭既感覺...

我繼續碌下碌下...托住個頭望住個Mon碌下碌下...

碌下碌下...我見到有個Friend Like左一個叫...《完美男友》既Post...

『完美男友?』我望住張紫紅色底色...白色字既圖...

咩黎架呢?

我再撳一撳入個Post...

我睇到有一大段文章...

仲有寫住...

『係…係小說黎架?』我望一望住個“Chapter 06”…

原來係網上小說...

而個作家係叫做...

『冬甩...』一個叫做冬甩既作家...

我再撳一撳入呢個叫冬甩既Page...

頁面一轉,轉左一個色彩鮮豔既版面。

成個Page都有好多相...好多畫...充滿色彩既相同畫...

我睇一睇個Like數...都有成十幾萬個Likes...

我就好自然咁撳一撳個“Like”,再碌去睇下...睇下《完美男友》個Post喺邊道...

我碌左好耐...好耐都仲未見到有《完美男友》既Post...

睇黎都應該係喺好耐之前...

我繼續托住個頭,碌左好一陣子...終於都俾我碌到去《完美男友》既Post...

我就由Chapter 01開始睇...

睇下睇下,原來係一個愛情故事...

講真句,個名叫得《完美男友》既話,唔係愛情故事仲可以係D乜野?

愛情故事...唔知喺人地眼中既愛情故事會係點架呢?

我就繼續睇落去...慢慢咁睇落去...

睇下睇下...逐隻字逐隻字咁睇...

呢個愛情故事,係講一個男仔...好好好好既男仔...對佢女朋友超好超好...

又溫柔...又體貼...又細心...又言聽計從...又有主見...又靚仔...又型仔...又大強...又180...又才華洋溢...又單手游出公海...

而個女朋友就日日都疑神疑鬼咁...

唔係覺得佢男朋友做左D對佢唔住既野先對佢咁好,就係覺得佢男朋友將會做D對佢唔住既野先對佢咁好。

個女朋友就日日都生活喺惶恐不安之中...

老老實實,俾我都唔會安心到啦...

呢個世界上,邊有咁完美既男友架?

呢個世界上既男仔都係咁貪新忘舊...

特別係香港既男仔。

香港D男仔日日就喺網上叫春咁,話D港女拜金、好高騖遠、嫌三嫌四、又要有車有樓、人心不足蛇吞象...

但自己呢?唔係話想舐呢個對腳就喺想一邊舐呢個對腳一邊摸邊個對豐乳再俾邊個幫佢Chok自己條J...

而佢地係唔會覺得自己有問題。

對其他女仔既身體有興趣,因為其他女仔既身體而性興奮,甚至因為其他女仔既J圖而射精都可以好理直氣壯咁話係男人既需要。

佢地係唔會覺得咁樣係同背叛女朋友無分別。

就算係無女朋友,你咁樣見一個J一個又唔算係花心咩?

你係專一既話,就J死一個算啦。

使乜晚晚喺間房裏面單手上網搵咁多唔同女仔既J圖黎J呢?

講到自己好似個法官咁...但又唔管下自己...

就係識得寬己嚴人...

更唔好成日話自己係千里馬生不逢時,遇唔上百樂。

實際上係自己又唔肯努力又吹毛求疵。

開口埋口都講鋼鍊既名句:「人唔作出犧牲就得唔到任何收穫;要得到某種東西,就必須付出與之同等的代價。呢一點就是鍊金術的基本原則,等價交換。當時我們,堅信這就是這個世界的真理。」

但實際上個個都喺道搵梗賢者之石...

賢者之石?腎者之石就有!

我繼續追故...一邊抱怨一邊追故...

總係覺得好離地...堅離地...

世上絕對唔會有一個咁好既男朋友...

更加無可能會有咁充滿色彩既愛情...

或者最真實既,就只有女主角既無限猜疑...

睇下睇下,不知不覺之間就睇到放工...

不知不覺之間成個下午都無做過野...

無靈感...追左成個下午故都仲係一D靈感都無...

而且仲越黎越迷惘...越黎越疑惑...

咩顏色都諗唔到...心中就只有黑灰白...

點搞?我都唔知點搞好...

但點搞都好,我都唔想再困喺公司裏面...

我知道,就算繼續坐喺道,繼續OT都好,都係無靈感...

唔會有靈感...

所以呢...都係執野走人啦。

我簡單咁執一執檯面...又整理一下電腦裏面既桌面...Check一Check個雲端,確保今日所畫既草稿都有上傳成功。(雖然都無乜點畫過...而且又無乜進展...)

再執一執好個袋仔,起一起身...

望一望間Office,原來其他人都已經走晒...就只係走剩我一個。

乜我真係咁勤力?定係我手腳慢?

其實我係乜都無做過...

好喇…都係唔好諗咁多…快D離開呢道啦。

我熄一熄燈,離開公司。

搭𨋢落到去大廈大堂,我隨便咁望一望出玻璃大門外...

我望到...望到有個...熟悉既身影...

喺背背地光既情況之下...我望到...我望到呢個衣著時尚…標準身材既...男仔...

我再行近D...行過去玻璃門...再望得清楚D...望清楚D呢個背住光既男仔...背住光望住我既男仔身影...

「Surprise~」當我推開玻璃門之時,Patrick向我展露燦爛既笑容。

無錯...正正就係死纏不休既Patrick...

『點解你會喺道既?』我冷冷咁問一句。

「Surprise嘛~我喺黎俾Surprise你架嘛~Sur唔Surprise呢?」Patrick仲係笑得好天真...好傻咁...

『Surprise…』你咁突然喺我面前出現,就緊係Surprise啦...

「我知你忙~怕你忙到唔記得食野丫~所以我諗住過黎同你一齊食飯~」Patrick一面真誠既樣。

『嗯...』忙到唔記得食就唔會...最多都係無胃口食架姐...

「想食D乜野?」Patrick問一問我意見。

『無所謂...』講真其實我只係想返屋企求其叮個杯麵就算...

「咁不如去食韓國野丫~頭先我行過黎既時候,見到有間韓國野好似唔錯咁~」Patrick指一指對面商場。

『哦...是旦...』嗰間韓國野平日都有食開既...總算唔錯啦..

「咁我地行啦~」

『嗯嗯...』

「你件外套咁單薄...會唔會凍親架?不如俾我件外套你摟住啦~」

『唔使...嗤...』

「你鼻敏感呢?係唔係一出到黎唔適應?」

『係掛…嗤…嗤…』

「用我呢包丫~我呢包紙巾有防敏感配方架~」

『唔...嗤...唔使...嗤...』

「拎住佢啦~鼻敏感好辛苦架~」

『真係唔…嗤…嗤…唔使…嗤…我習慣左...嗤...』

「你乖乖地拎住佢啦~你嗰包真係唔得架~你睇下~你越用,就越係會打乞嗤...仲要越打越厲害...越黎越嚴重...」

同Patrick一路行過去對面商場...

期間Patrick都好似成個阿媽咁咿咿哦哦...

唔係…唔係成個阿媽咁...係仲煩過阿媽...

點解可以咁煩架呢?

點解可以有咁多野講架呢?

點解可以咁死唔斷氣架呢?

「越嚴重,你就越會用...越會用,就只會更嚴重...無限輪迴地獄~咁樣真係唔得架~信我啦~用我呢包啦~成包拎去啦~要知道習慣還習慣...始終都會辛苦架嘛…」

大家見啦,條友講野長篇大論九唔搭八咿咿哦哦。就成日好似有一隻烏蠅摟住,嗡……對唔住,唔係一隻,係一紮烏蠅喺你耳仔邊,一路飛入你嘅腦裏邊,救命啊!

直到入到間韓國餐廳...

點埋餸菜...

「我知你對酸同辣都有D敏感~所以我都係叫返D清D既~」Patrick都仲係未停過口...

『嗯嗯...』是旦啦...反正本來就無乜胃口...聽完你咿咿哦哦就更加無胃口...

「返工真係好忙?」Patrick又問一問。

『嗯...』有邊個返工唔忙架?

「忙D乜呢?」Patrick繼續問。

『忙畫圖...』我做時裝設計架嘛…唔係忙住畫圖...唔同忙住打字咩?

「畫圖可以點忙法架?」Patrick繼續追問。

『不停畫...又不停俾人Ban...又不停畫...又不停Ban...』重複又重複咁...你話係唔係好忙呢?

「係咯~D人真係好鍾意Ban Ban Ban Ban Ban!乜都Ban一餐!杯野甜少少又話要沖過!杯奶茶太多奶又話入唔到口!咖啡唔夠奶又話太過苦!大佬呀!我又唔係你條脷,我點知你既少甜係有幾少?!多奶係要幾多奶先夠姐?!」Patrick皺晒眉頭咁。

『哦...』其實我真係無乜興趣知佢咁多野...

「仲有呀!有時D客連咩牌子既淡奶都飲得出架!唔岩口味仲要我地轉添架!真係痴線呀!」但係Patrick就一直繼續講...

『哦...』我隨便咁點點頭...

「老闆又要聽D客點先衰喎!乜野顧客永遠是對的喎...痴線啦!而家呢個年代唔Work架喇嘛!」仲要一直繼續講...

講過不停...

不停講D我唔係好在意既事...

「你咁瘦要食返多D野架~」野食黎到,Patrick又夾D野俾我...

『哦...自己黎得喇...』我就唔係好想俾Patrick照顧...

「放心喎~呢D你都唔會敏感架~可以放心食~」但Patrick就一直喺到服侍我...

『嗯嗯...自己黎...自己黎...』當正我係殘廢咁...

「呢個丫~呢個都好岩你胃口架~」不停咁夾野俾我...

『嗯嗯...』我都講到有D唔想再講...

「仲有呢樣~呢樣都好岩你胃口架~」繼續不停咁服侍我...

我都真係無佢咁好氣...

成餐飯都係佢有佢服侍我...我就愛理不理咁...

「呢餐等我埋得啦~」食完餐飯,Patrick又爭住埋單...

『我習慣AA架...』其實係我唔想欠左你...

我最怕就係欠左人...

如果真係欠,我都唔會拖!總係要第一時間還清還楚!

對每個人都係咁...尤其係Patrick...不拖不欠!

「問你一問題丫~紅豆要同綠豆打仗,我地會點稱呼D紅豆呢?」喺我地搭車返屋企期間,Patrick又問埋D無聊既問題...

『紅豆兵。』

「勁喎~咁紅豆要攻打綠豆,咁紅豆發號司會講咩呢?」

『紅豆Go。』

「係勁喎~咁發號司令嗰粒紅豆我地會點叫佢呢?」

『說Go紅豆兵。』

「好勁喎真係~咁當綠豆攻打紅豆時,點解紅豆全軍不動呢?」

『因為紅豆未說Go。』

「真係超勁呀!咁點解綠豆喺打仗期間一路少,但紅豆就一路多?最後,紅豆就咁贏左~」

『因為綠豆留血變晒紅豆。』

「嘩!點解你可以全部答中既?!真係好勁呀你!黎黎黎~再問你一條問題~請用三個步驟將大笨象放入雪櫃~」

『打開雪櫃門。放大笨象入雪櫃。閂雪櫃門。』

「勁喎~咁用四個步驟將長頸鹿放入雪櫃呢?」

『打開雪櫃門。拎大笨象出黎。放長頸鹿入雪櫃。閂雪櫃門。』

「係勁喎~咁獅子大王開森林大會,邊隻動物無黎到?」

一路上Patrick都係問埋D白痴問題...

勁無聊...

一路勁無聊咁送到黎我屋企樓下...

「雅暖~好好咁返上去沖個涼~早D休息下啦~」Patrick企喺大門前同我揮揮手...

『嗯...係丫...以後唔好再俾驚喜我喇...我唔係咁鍾意驚喜。』講完之後,我就頭也不回咁行入大堂...搭𨋢上樓。

我唔知Patrick明唔明白我既意思...我亦都唔想知佢有乜野感受...

反正有乜感受,都唔關我事...

返到屋企,開一開燈...

「喵~」阿Knight就行到埋黎我身邊,嗲一嗲我~

『係唔係餓親你丫~』我抱一抱起阿Knight~

「喵~」阿Knight就舔一舔我塊面~

就好似知道我攰~知道我心情唔多好~舔一舔我~氹一氹返我開心咁~

『都係你最了解我呢~』

「喵~」