一早起身梳洗好。

再幫阿Knight整理下佢D私人地方。

「喵!」不過睇阿Knight就好似唔多領情...

總係好似叫我唔好搞佢D野~唔好再掂佢個貓樹~唔好移動佢張床~唔好拍佢張床鋪咁~

不過就算阿Knight有幾咁唔鍾意,我都要幫佢簡單咁整理下既~





我一邊幫阿Knight整理,阿Knight就喺我身邊推下推下我隻手...

整多兩整…

「喵...」阿Knight冷眼望住我...

『知喇知喇...知你唔鍾意人搞住你喇...』唉...我都無阿Knight辦法...

我知我再搞住佢既話,佢就會出爪架喇...





我再幫阿Knight放好今日既食物同食水之後...

『好喇~都係時候換返套衫~』

我換上件黑色素色Tee加條黑色長裙,再著上件超長既白色外套。

喺個防潮箱拎部Nikon Df出黎。

確保電池充滿...有記憶卡喺裏面...





攬一攬部相機上頸之後...

「喵?」阿Knight困惑咁望住我。

『係丫~今日我要出去搵靈感,陪唔到你喇~你自己一個喺屋企乖乖地喇~』我同阿Knight交代一下。

「喵。」阿Knight就擰個頭望向玻璃窗出面...唔想理我咁...

『係喇係喇~我知我唔應該多事喇~咁我都唔阻你享受一個人既浪漫喇~我出去喇~拜拜喇~』

「喵。」

同阿Knight Say完句拜之後,我就著返對白色布鞋仔...係時候出門口。

今日係假日,唔使返工。





本來就話想好好抖一抖。

之不過...喺尋日放工之前,我又俾張生召左入去佢房...

我一入到去姐,張生就拍晒檯咁話:「成個禮拜喇!我俾左成個禮拜時間你,你就真係連一張草稿都交唔到俾我?!你唔係真係想拖足我一個月呀嘛?!我唔撚理你呀!你下個星期點都要死到D野俾我睇呀!有D趕?!俾咁多時間你都仲話有D趕?!我使唔使俾個皇后你做呀?雅暖姐?!」

無計啦...既然上司都咁講,我想抖都無得抖啦...

而我困喺屋企之中,又真係諗唔出有乜野好設計...

唯有就拎部相影...出去行幾轉...睇下有無乜野可以拎到D靈感返黎啦...

一邊行去巴士站,一邊影下相。





行下影下...影下行下...

影下D路牌...影下D路人...影下D花草樹木...

行到黎巴士站,又影下馬路上既車輛...影下巴士...

影下影下...乜都影下...

上到巴士,坐上上層...

望下出面既景色...灰灰藍藍咁...

今日個天都有好多灰雲…被厚厚既灰雲遮蓋左整個天空...

望下望下,又令我諗起細細個坐巴士,總會成日坐到無冷氣既。





嗰陣時好鍾意坐喺窗口位,打開隻窗,任由D風吹埋黎。

有時仲會貪玩坐最頭~打開車頭隻窗~D風迎面咁撲埋黎,真係好似坐梗過山車咁~

當架巴士駛到去小欖嗰邊,海風吹到埋黎~仲會聞到海水味~

D海風好清涼~好清爽~

好享受~亦都好回味~

但而家...就只有回味...

熱狗係2012年5月9日開始,就全面被冷氣巴取代。





已經再無機會坐熱狗...

再無機會打開隻窗,感受一下風既力度...

再無機會喺巴士上聞下海水既氣味...

我隔住塊玻璃...影下出面既海面...影下海面上既船...

海面上有噴射船飛過...又有幾隻大貨船慢慢移動...

無乜生氣...仲好似死氣沈沈咁...

『唉...』我好無心機咁托一托住個頭...

靈感喔...靈感喔...究竟你喺邊呢?

點解你一直都唔肯出現呢?

唉...只好希望去到尖沙咀之後,我可以遇上你啦~我既靈感~

我一直帶住呢份盼望咁坐巴士...直至黎到尖沙咀...

我一落車,又隨意咁拎起部相機影下影下...

影下D高樓大廈...

影下條商場天橋...

影下盞紅綠燈...

影下間酒店...影下出入酒店既有錢人...

影下白色既半球體...

影下1001...

影下個海旁...

影下對面海...

影下D情侶...

影下影下...都影左唔少...

但就係...就係無乜Feel咁...

張張相都好似無乜感覺咁...

無主題…無故事...無靈魂...

好平平無奇既一張相...好平平無奇既一堆相...

靈感...睇住呢堆咁平平無奇既相,真係一D靈感都無...

點解會咁架呢?

我唔識影相?

唔係丫…

我讀設計既時候,就已經成日會拎住部相機四處影...

我仲拎過攝影比賽既獎添。

我唔係唔識影相架...就算話唔係專業...都起碼叫見得下人丫...

只係...之前影親既...都係黑白相姐...

黑白相...黑白相...

我將部相機校到去黑白Mode...

隨手對住對情侶按下快門...

“咔嚓”

睇一睇個Mon...一張黑白相...

喺黑白配襯之下,呢對情侶就好似充滿住經歷...充滿住故事...

總係好似飽經風霜咁...

我再隨手影一影條星光大道...

“咔嚓”

睇一睇個Mon...一張黑白相...

喺黑白配襯之下,條星光大道就好似話左俾你聽“香港電影業已死”一樣...

點解會咁架呢?

都係同一對情侶...都係同一個地方...

點解黑白相同彩色相出黎既效果有咁大差距架呢?

曾經有人話過影彩色相比起黑白相來得容易。

因為彩色相色彩豐富,容易帶出唔同既訊息。例如情感、溫度、氣氛等。

相反黑白相就只有黑灰白,要帶出唔同既訊息既話,就要有更好既觸覺...攝影眼...

照計我既道行無咁高...點解會影黑白相好過彩色相呢?

唔...

我就繼續拎起相機影下影下...

一路行又一路影...

好隨意咁影...好隨心咁影...

人又好...樹又好...建築物又好...見到乜野想影就影乜野...

影下影下...不知不覺又影左幾百張...

行到攰...影到攰...我就坐喺香港文化博物館條長樓梯...睇下睇下D相...

望住個Mon...細心睇下裏面既相...

一張又一張...出自我手筆既黑白色...

每一張都好有感覺...

每張都好有故事...

每張都好有靈感...

源源不絕...靈感湧現...

每一張黑白相,都令我諗出屬於佢地既設計...

點解會咁架呢?

點解總係要黑白架呢?

點解總係唔可以係黑白架呢?

點解又要我問返呢條問題呢?

唉...好煩丫...好煩丫...真係好煩丫!

正當我對住個Mon一面苦惱咁既樣之時...

「影得好靚喎~」有把男仔聲喺我背後出現...

我回頭一望...見到有個著上黑色冷外套...白色Tee...黑色緊身布褲既...男仔身影...

我再疑惑咁打量一下呢個男仔...

就咁睇呢個男仔既外貌...我諗佢都係同我差唔多年紀...

但佢既雙眼之中...總係充滿住憂鬱之情...

呢種充滿住憂鬱既眼神...令到佢就算係笑面裏都帶著點點哀愁...

呢個男仔...總係好似有好多經歷...好似曾經滄海難為水咁...

究竟呢個身上總係散發出陣陣哀愁既男仔...遇上過乜野經歷呢?背後又有乜故事呢?

不過講返轉頭,呢個男仔除左總係散發出陣陣哀愁之外,我仲覺得佢總係好似周圍識女仔咁...

「我無惡意架~只係見大家都係影黑白相既,所以想交流下咋~」個男仔遞一遞佢手上部相機俾我睇...

我望一望個Mon...正正就係顯示住張黑白色既維港。

而個維港就好似...好似講出港英時代既美好時光一去不返既悲哀事實...

真係睇一睇都想流眼淚...

「你張相好有Feel喎~」個男仔一邊指一指住我部相機個Mon,一邊坐到我身邊。

『都唔夠你嗰張有Feel...』我再望一望住個男仔手上部相機個Mon裏面張“港英時代已逝”。

「我?唔...唔...」個男仔苦笑住咁擰擰頭,「係呢~介唔介意交換睇下大家影既相丫?」

『唔...唔介意...』我遞一遞部相機俾個男仔。

反正都無影過D唔見得人既相...

「嗯嗯~」個男仔接一接過我部相機,再遞一遞佢部相機俾我。

我接過個男仔部相機之後,開始睇下睇...

我逐張逐張咁睇...慢慢慢慢咁睇...

一張又一張黑白相...

每張相都總係散發出悲傷既感覺...

就好似有好多遺憾...好多返唔到轉頭既遺憾...

總係睇到我...諗起好多野...

諗起好多以前既野...

諗起好多以前唔開心既野...

睇到我好想喊出黎...由心裏面喊出黎...

點解會咁架呢?

只係睇到D相...睇到D黑白相...可以睇到我勾起返過去既不愉快經歷...

之但係...我又無話想逃避...

我又無話唔想繼續睇落去...

我仲好想繼續睇落去...

好似好有安全感咁...

睇住一張又一張充滿哀傷既黑白相...總係好似好有安全感咁...

而呢種安全感...好似喺邊道...喺邊道感受過呢?

「你對黑白相既掌握好到位喎~你係職業攝影師?」個男仔帶住點點哀愁既微笑望住我。

『唔…唔係…唔係…我係做時裝設計既...』我擰一擰頭。

「哦?時裝設計丫?唔怪之得你著得咁素啦~」個男仔打量一下我既衣著。

『嗯...咁你呢?你都著得咁素,難道係行家?』我又打量一下個男仔。

「唔係唔係~」個男仔擰擰頭後諗一諗,「我諗我勉強都可以話係一個攝影師既...」

『勉強?』其實我都睇得出呢個男仔應該係一個攝影師...但點解佢會話係“勉強”呢?

「唔...」個男仔再諗一諗,「因為我認為自己係一個藝術家多D~」

『藝術家?哈哈~』我忍唔住笑左兩聲~

雖然話眼前呢個男仔都真係幾有藝術家Feel~

之但係...邊有藝術家會話自己係藝術家咁唔怕羞架~

「或者你會諗邊有人會咁樣話自己係藝術家~或者你會覺得我好唔知羞啦~或者...我之前都真係唔會咁講...之但係...而家既...總係會有咁既...慨嘆...」個男仔苦笑住咁點點頭...

『慨嘆?』我唔係好明個男仔點解會慨嘆...

應該話我仲未知道有乜野令到呢個男仔慨嘆...

「黎到呢個現實既社會...要被迫做返現實既事...有時候...都真係幾慨嘆...」個男仔無奈咁點點頭...

『現實...』係現實...

因為生存喺現實既社會...所以被迫做返現實既事...

係我地既現實...

「雖然話有時都會任性一下...耍下藝術家脾氣~之但係...面對返現實...就要向現實低頭...」個男仔繼續一面無奈咁苦笑住點點頭...

面對返現實...就要向現實低頭...

『嗯...』我都係...總係要向現實低頭...

經常要做D自己唔想做既事...

偶然想任性一下,都要付出好大既勇氣...

仲要受氣...

「係呢~你好鍾意黑白色?」個男仔再問一問。

『嗯...都可以咁講...我係對黑白色比較有感覺...』我點一點頭。

「嗯~都睇得出你對黑白色比起彩色更有感覺~因為你D彩色相無乜靈魂呢~」個男仔睇住我之前影既彩色相...

『嗯...好差丫呵?』我直接問一問個男仔...

「唔可以話好差~只係...唔適合你姐~」個男仔笑臉裏帶住點點哀愁咁擰擰頭。

『係丫…真係唔適合...之但係都要向現實低頭呢...』我都無奈咁笑笑口。

「你既現實係乜?」個男仔打量一下我。

『我既現實...我上司要我交D彩色做主題既設計俾佢...但我畫極都畫唔好...所以咪諗住出黎影下相,攞下靈感...點知...到最後都係黑白最岩我...』我繼續無奈咁點點頭。

「係丫…咁又真係無奈左D既...」個男仔都好無奈咁點點頭。

『咁你呢?你既現實又係D乜呢?』我又問一問個男仔。

「我丫?我...」個男仔諗左一諗,「我老細成日都要我接D我唔想接既Job~好似話...有D人像既廣告相丫~一D色彩鮮豔既廣告相丫~我同你既遭遇都幾相似架~」

『嗯...的確好相似呢...咁你會點做丫?』我追問一下。

「我通常都係Hea佢~」個男仔笑笑口咁點點頭。

『Hea佢?』可以點Hea呢?

「係丫~佢次次都係先斬後奏~咁我咪次次都Hea影了事囉~個客收唔收貨,就靠佢把口喇~」個男仔有D得戚咁笑笑口。

『咁都得?』唔怕俾老細鬧架咩?

「OK架~我肯影都算係咁架喇~仲想點丫?我脾氣大起上黎,真係Dom低部機就一走了之~」個男仔好有氣勢咁。

『可以走得去邊?』我打量一下個男仔。

「去冰島~去冰島避下世都幾好~早幾年前先喺嗰邊住左幾個月~都真係幾舒服架~」個男仔邊回憶邊點頭。

去冰島?

真係可以話走就走?一走了之?

或多或少,都總有D顧慮...總有D負擔掛...

點都無可能可以走得咁輕鬆掛...

「有時間既話,我都會影返D自己鍾意影既野~調節一下自己既心情~」個男仔望一望向前面。

『嗯...我都會畫下自己鍾意既設計...調節一下自己既心情...』我都跟住個男仔望一望向前面。

「不過講真一句...如果真係無辦法既話...會唔會考慮離開呢?我老細就話無我辦法...總係會忌我三分...但如果你上司唔忌你呢?你會唔會考慮離開呢?始終...我地呢D人...係無辧法改變...」個男仔用上憂鬱既眼神望住我...

『我地...呢D人?』我望一望住個男仔對眼...

「我地呢D有經歷既人...」個男仔笑臉裏帶住點點哀愁咁望住我...

我地呢D有經歷既人...

無錯...我地呢D有經歷既人...真係無辦法改變...

總係會有自己既相法...自己既堅持...

總係唔會接受人地...

總係唔肯改變自己...

我地呢D有經歷既人...

同呢個身上總係散發住哀愁既男仔傾左好耐...傾左好多...

傾左好多關於黑白攝影既野~傾左好多關於黑白設計既野~

雖然傾左好耐~又傾左好多~但我都仲係唔知呢個男仔有過D乜野經歷~

同樣地,我都無講過我既經歷俾呢個男仔聽~

有經歷既人,總係唔會將自己既經歷輕易講出口。

但就總係好容易俾人感覺得到...

感覺得到你係一個有經歷既人...

「多謝你陪左我咁耐~」個男仔起一起身。

『我多謝你教左我咁多有關攝影既野先真~』我都起一起身。

「唔多謝~唔多謝~大家開心Share姐~」個男仔笑臉裏帶住點點哀愁咁點點頭。

『嗯~開心Share~』我都向個男仔笑一笑,點點頭。

「嗯~咁...我行呢邊~」個男仔指一指住佢身後...

『嗯~我行呢邊~』我又指一指住我身後...

「嗯~拜~」

『拜~』

我就同個男仔各自轉身,頭也不回咁離開尖沙咀。

傾左咁耐,都唔知個男仔叫乜名。

同樣我都無將自己既名話俾個男仔知。

萍水相逢~唔需要知道名字既~

返到屋企,開一開燈...

「喵...」阿Knight坐喺佢張貓床上離遠咁望一望我。

『返黎喇我~』我都同阿Knight打一打個招呼。

「喵...」阿Knight唔多想理我咁,繼續睇下出面既夜景...

唉...算...既然你都唔理我,我就做下自己野~

我放好晒D野~將D相過落部iMac道~再去沖返個靚涼~

換好套衫出返黎之後,我就吹乾個頭~睇下Facebook咁~

我碌下碌下...碌下碌下...

碌碌下就發現...發現有一張熟口熟面既相...

我碌一碌返轉頭...睇清楚D...

我睇清楚D呢張相...呢張俾個Friend Like左既黑白相...

『係…係頭先嗰個男仔既...』其中一張黑白相!

我再睇一睇相片既主人係...

『Whirling?!』呢個名咪係...之前嗰間Coffee...

唔通...頭先嗰個男仔...就係嗰間Coffee既老闆?

似喇...似喇...

唔怪得頭先睇佢部相機D相既時候,總係好似有種熟悉既安全感咁...

就同之前喺Coffee裏面既感覺一樣...

被散發住陣陣哀愁既黑白相包圍住,反而覺得好有安全感...

Whirling…原來Whirling就係你...