又返左差唔多成個月工...

呢個月黎我都係Hea住咁畫D設計俾張生...

雖然張生就唔多滿意...不過好彩既係佢都皺住眉頭勉強收貨...

當然啦...收貨還收貨,張生都繼續要求我畫多D彩色既設計俾佢...

今日放假就諗住喺屋企磨下D設計出黎。





對住部iMac呆下呆下...

又對住之前影D相呆下呆下...

D彩色相真係唔掂...

但D黑白相就勁有Feel...

唉...點算...





「不過講真一句...如果真係無辦法既話...會唔會考慮離開呢?」

再係咁落去,我真係要諗下係唔係要搵定份工...

繼續呆下呆下...完全無靈感咁呆下呆下...

「喵~」又望住阿Knight懶洋洋咁瞓喺張貓床上,擺下擺下條尾咁...

『點解你可以咁懶架...睇到你咁懶,我就更加無靈感喇...』我摸下摸下阿Knight。





「喵~」阿Knight唔多想理我咁,繼續享受懶洋洋既生活。

『唉...』

*噹* “Patrick:放假有無出去呢?”

又係Patrick既Whatsapp...

*噹* “Patrick:定係放假想喺屋企瞓多陣呢?”

點解佢可以咁得閒...

*噹* “Patrick:我放假既時候都會想瞓多幾粒鐘架~”

點解佢可以咁無聊...





*噹* “Patrick:可惜今日我仲要返工丫...想抖都無得抖...”

我都無興趣知你D野...講俾我聽做乜呢?

『唉...』我反一反轉部電話,就連睇都唔想睇到...

已經乜靈感都無...仲要俾人煩住...真係唔使旨意畫得出D乜野出黎...

*噹*

仲係響梗…

*噹*





仲係響梗Whatsapp既“噹噹”聲...

*噹*

好煩...

*噹* *噹*

真係好煩....

*噹* *噹* *噹*

真係好鬼煩呀!

*噹* *噹* *噹* *噹*





『煩煩煩你煩夠未呀?!』我拎一拎起部手機一睇...

我喺個Lock機畫面...睇到最上嗰個Whatsapp係...

『係Carol?』係Carol Send Whatsapp俾我?

我就打一打開個Whatsapp,睇下Carol Send D乜俾我先。

*噹* “Carol:醒左未丫~”

“醒左好耐喇”

*噹* “Carol:咁你而家做梗D乜呢?”





“磨梗D設計”

*噹* “Carol:係丫?原來你忙梗~本來諗住叫你出黎陪我去買下野添...”

哦~原來Carol搵我係想我陪佢出去買野...

出去買野...出去行下...

“都好丫 反正我都無靈感 出去行下都好丫”

係咯…反正繼續困喺屋企磨都磨唔到D乜出黎架啦...

出去行下散下心好過啦...

*噹* “Carol:真係架?真係可以陪我出黎行街買野丫?太好喇~太好喇~”

呢個傻妹丫...又使唔使咁開心呢?

“咁你想去邊丫?”

*噹* “Carol:我丫?我想出MK丫~”

出MK...都好丫...好耐都無出過MK...

唔知D MK文化進化成點呢?

“嗯嗯 咁你想幾點等?”

唔知去感受一下MK文化既話,會唔會有返D靈感呢?

*噹* “Carol:兩個鐘後出到去MK OK嘛?”

兩個鐘...我諗幫埋阿Knight搞掂埋D糧食既話,兩個鐘頭出到去應該就岩岩好。

“OK 兩個鐘後朗豪坊等”

*噹* “Carol:嗯嗯~兩個鐘後朗豪坊見啦~”

嗯~梳洗一下先。

簡單咁梳洗一下...再換上件白色素色Tee加條黑色長裙,再著上件超長既黑色外套。

幫阿Knight準備好D食水同貓糧。

「喵?」阿Knight困惑咁望住我。

『係丫~今日我又要出街喇~唔得閒陪你喇~你自己食自己啦~』我同阿Knight交代一下。

「喵~」阿Knight完全無視我,懶洋洋咁合埋對眼...

『好喇好喇~唔阻你懶洋洋喇~我出去喇~拜拜喇~』

「喵。」

同阿Knight Say完句拜之後,我就著返對白色布鞋仔...出一出門。

坐上巴士出MK,巴士上都比較多人。

而且仲要係好多𡃁妹...

好多靚妹出MK...仲要係著大紅大紫但都仲係要熱褲加薄身黑絲...

黑絲...睇黎只有黑絲係長青...

置身喺大紅大紫既靚妹之中,好似俾青春包圍住咁...

一個又一個青春無敵既妹妹仔...

著得鮮豔奪目之餘,仲著得好性感...

冬天都到啦...仲著到咁性感...青春係唔係真係咁唔怕凍?

係唔係青春既熱力可以抵寒?

青春係唔係真係咁無敵呢?

青春...青春...

而我呢?從來我都唔覺得自己有青春過...

就連中學生涯之中,我都感覺唔到有青春過...

我總係覺得自己...比較成熟...比較年長...比較老...

比較老...不論係心境...定抑或年齡...我都係比身邊既人老一點...

就係呢一點點...呢一點點...

唔好再諗喇...唔好再諗喇!

都過左去喇...唔好再諗過去左既野喇!

我就無再理會身邊有幾多個青春既MK妹喺道吱吱咋咋,自己有自己望住個大海出MK。

我一路望住個大海...望住灰色既天空...好快好快就黎到MK...

喺色彩繽紛既人群之中行下行下...

就好似得我一個係黑白色...

好似格格不入咁...好似融入唔到呢個社界咁...好似...好似...

好似就只得我一個咁...

我一個人...自我既一個人...

我一個人行到黎朗豪坊等下等...

望住D情侶著住五顏六色既情侶裝咁攬攬錫錫…

望住D情侶一杯珍多冰兩份飲...

真係好礙眼...

講真,如果唔係想“參考”下,攞下靈感,我平時都真係唔會留意街上既情侶...

事實上,就連街上既人都唔多想留意...

只係...呢排為左工作,真係花左好多時間同精神喺D無謂既街外人身上...

總係覺得...個感覺唔多好...

工作...生活...情緒...

唉...我既工作都開始影響到我既生活...我既情緒喇...

企下望下…再企下望下...

「Sorry~Sorry~我岩岩行錯左出口丫~所以遲到~Sorry~Sorry~」Carol一行過黎就立即捉住我隻手咁Say Sorry。

『唔緊要。唔緊要。我都唔係等左好耐姐。』其實我又唔係好介意等人。

「你真係好架姐~咁我地行咯~」Carol拉一拉住我隻手。

『嗯。你話想出黎買野,係想買D乜野?』我隨口咁問一問。

「我呢...其實呢...點講好呢...唉...其實我係想出黎買野俾我既男神做結婚禮物...」Carol面有難色咁。

『哦。』原來係買結婚禮物...『咁你諗住買咩俾佢?』

「買D乜野…我就係仲未諗到買乜野好...」Carol扁晒嘴咁諗下諗下...

『嗯...咁行下睇下先...』我諗行住黎諗會易諗D掛...

我同Carol喺朗豪坊行下行下...

行下D精品店…又行下D名店…

睇左好多唔同既野...

可愛既又有...特色既又有...實用既都有...就係無岩Carol心水既禮物...

「唉...真係好難揀呢...」Carol挨喺個欄杆托住個頭。

『唔...如果真係咁難揀既話...不如唔好送...』反正都諗唔到送乜,不如唔好送好過...

「唔得!」Carol好大反應咁講,「如果唔送既話,會俾人覺得我有野架!我唔想俾人知道我對佢有野囉...」

『或者已經全世界都知呢...』通常呢D八卦事,總係會有人察覺得到...而且仲會一傳十…十傳萬…話咁快就成個宇宙都知...

「係姐...之但係...都唔想俾人越唱越衰架嘛…」Carol扁晒嘴咁擰擰頭。

『把口喺人地道,人地鍾意點講咪點講。有乜所謂?』反正人就係鍾意討論D八卦野...

「嘩!一陣俾男神聽到以為我有野就真係尷尬死喇!咪搞!咪搞!」Carol擰晒頭咁...

『你唔係有野咩?』我打量一下Carol...

「係有野…但都要大方面對架嘛…」Carol無奈咁點點頭...

『明明就係有野,但又要大方面對...你唔覺得好矛盾架咩?』我繼續打量住Carol...

「咁感情就係咁矛盾架啦...」Carol好無奈咁點點頭...

『我覺得唔係咁...我覺得感情既野應該係黑白分明...』我諗一諗...又點一點頭...

「黑白分明?」Carol一頭問題咁。

『嗯...一直都覺得感情既野都應該係一就一,二就二。唔好唔捨得又唔肯去放手...放左手又要心掛掛咁...』一直我都係咁覺得...一直都係...

一直我都覺得感情係唔可以拖拖拉拉...

愛就一齊...唔愛就分開...

唔好浪費自己既時間...亦都唔好浪費人地既時間...

你係唔愛既,人地為你做D乜都好,都只係感動唔係愛...

同樣地,人地係唔係愛你,你點死纏難打都無用...

時間係好寶貴...無謂浪費時間係一個無結果既人身上...

既然都清楚明白無可能就係無可能,何不乾脆頭也不回咁轉身離開呢?

「唔...如果我可以好似你咁咁灑脫就好喇...」Carol扁晒嘴咁點點頭。

灑脫...或者啦...

或者真係咁灑脫...

或者係過去既經歷令我灑脫...

每個人都有佢既經歷...

或者Carol經過呢次經歷之後,都會有所改變...

而係唔係會變得灑脫?

唔知呢...

始終每個人都唔同...

我會...Carol未必會...

「好喇~我地繼續行下喇~快D買完去食下野喇~」Carol拉一拉住我。

『嗯。』唔講食野都唔覺得肚餓...

同Carol繼續行下行下...行行下就行左落黎HUMAN TOUCH。

『HUMAN TOUCH…我諗呢道一定有你想要既野...』我拉一拉Carol行入HUMAN TOUCH。

個女店員見到我地行入黎之後,就帶住微笑咁同我地講:「返左好多新款架喎~」

我拎一拎起隻杯:『情侶杯都唔錯...兩隻杯拍埋一齊...仲有條紅線連住。』

女店員立刻介紹一下:「係丫~D情侶杯好受歡迎架~自用送禮都得~」

Carol就冷眼望住隻杯,再分一分開兩隻杯:「見到條紅線都想剪斷佢...」

望住條紅線分開左...女店員就尷尷尬尬咁笑笑口問:「唔知你地想買黎...做乜架呢?」

我就無等Carol開口,搶住答左先:『我地買黎送俾人地做結婚禮物...』

女店員就立刻帶住我地行入D:「買黎送俾人做結婚禮物呢~可以考慮下我地既情侶床鋪套裝喎~」

我就同Carol望下望下D情侶床鋪套裝...

個女店員就繼續介紹:「我地都有好多款架~又有白色啦~灰色啦~藍色選擇~」

我就跟住個女店員手指望下望下...

個女店員就繼續介紹:「如果呢D都唔岩既話,可以睇下我地本書~揀得岩既可以訂架喎~大約預返一個星期工作天就有得拎架喇~」

我又揭下揭下本書...睇下裏面唔同既款式...

我揭下睇下...揭下睇下…Carol都無聲無氣咁...

『你覺得邊款好丫?』我拉一拉Carol隻手。

「唔...唔...唔...」Carol好似好無心機咁...

我就喺Carol耳邊細細聲講:『唔好咁啦...俾人察覺到你有野架喇...』

Carol一聽到我話“俾人察覺到你有野架喇”,就立即好積極咁睇本書!

「唔...唔...唔...」Carol起勢咁揭完本書之後,又抬頭望下眼前D情侶床鋪套裝。

我就陪住Carol揀下揀下...

揀左一陣...都揀左幾耐下...耐到個女店女都忍唔住要俾D意見:「呢個點睇丫?白色比較自然~圖案又簡簡單單咁~幾好架~」

Carol望左一望,再諗左一諗:「好啦好啦!就呢個啦!」

「嗯嗯~咁我幫你包起佢啦~」個女店員立即拎住套情侶床鋪套裝行去Counter。

Carol就拎住個銀包,喊晒口咁講:「嗚呀~~~好似為男神同佢老婆做愛助慶咁囉!!!嗚呀~~~」

『冷靜D...冷靜D...俾人察覺到你有野架喇...冷靜D...冷靜D...』其實都係既...

買情侶床鋪套裝送俾自己深愛既男人做結婚禮物...又好難聯想唔到佢地做愛既情境既...

仲要親手送俾佢既話...簡直就係自虐...

同Carol俾完錢,Carol就攬到袋情侶床鋪套裝實一實。

仲要扁晒嘴,眼濕濕咁...

『唔好咁啦...』睇到Carol個Sad樣就真係夠晒心傷。

「咁人地真係好唔開心丫嘛…」Carol個嘴再扁D...

『買到想買既野唔係應該開心先係架咩?』我再安慰一下Carol。

「係姐...之但係...真係好似鼓勵男神同佢老婆啪啪啪啪啪啪啪啪啪咁既樣囉...」Carol眼有淚光咁既樣...

我越係去安慰Carol...Carol就好似越係唔開心咁...

『咁佢遲早都會同佢老婆啪啪啪啪啪啪架啦...』呢個係必然既事...

「啪啪啪...啪啪啪啪啪...我唔要...我唔要Chris同其他女人啪啪啪啪啪呀!!!嗚呀!!!」Carol仲喊起上黎添...

『唔好喊啦~唔好喊啦~』死喇...整喊左Carol添...

「嗚呀!!!嗚呀!!!嗚呀呀!!!!!!」Carol越喊越大聲...

Carol攬住袋情侶床鋪套裝放聲咁喊...

死啦...整喊左Carol...

點氹返Carol好呢...我都唔識得氹人既...

「嗚嗚嗚!!!嗚呀呀!!!!!!」Carol越喊越勁...

喊到周圍D人都開始望住我地...

『唔好喊喇~唔好喊喇~好多人望住喇~』我捉一捉住Carol隻手搖左幾下...

「嗚...嗚...唔...唔唔...」Carol停一停,望一望四周...

四周都已經有唔少途人企定定咁望實我地...

『好喇好喇...我地都係快D離開呢道先啦...』我就拉住Carol行。

呢個Carol真係丫...又會可以大街大巷喊出黎既...

喊...

講開又講...我都好似...已經好耐無喊過...

有幾耐呢?

我諗都已經有...差唔多十幾年無喊過...

十幾年...

人地話人一生就只有一公升既眼淚...流乾晒就唔會再流...

咁係唔係即係話我既眼淚…早就喺十幾年前已經流乾呢?

或者係...或者真係咁...

我既眼淚早就喺十幾年前就已經流得一乾二淨...

帶住Carol行多幾步...行一行出朗豪坊...

『好喇好喇...抹下D眼淚先啦...』我拎包紙巾俾Carol。

「嗯...嗯...」Carol抹下抹下D淚痕...

『傻妹黎架...咁都喊一餐~喊完就去食D野先啦~』行左咁耐,都係時候食返D野。

「嗯嗯...」Carol點一點頭。

『咁你想食D乜野丫?』都係睇下Carol個傻妹想食D乜野先...

「唔...唔...」Carol左望望...右望望...「不如食嗰間茶記咯~」

我望一望Carol指住斜對面間茶記...

嗰間茶記…咪就係...咪就係Patrick做梗水吧嗰間?

俾Patrick見到我入去食野...又唔知會點樣煩住我...

『唔好唔好!唔好去嗰間…』我立即向Carol說不!

「下?點解丫?」Carol一頭問號咁。

『呃...嗰間呢...聽講唔係咁乾淨...仲有人試過食食下野有隻老鼠從天而降,跌左落碗麵道!好恐怖架~』我就有咁大作到咁大...

「下…唔係真係咁恐怖丫化…」Carol面有難色咁...

『係丫係丫…真係好恐怖架~我地都係食過第二間啦~唔...嗰間丫~嗰間都係茶記~睇落仲乾淨D~光鮮D添~~~』我指一指住隔離間茶記。

「嗯嗯...睇落又真係好似乾淨D...光鮮D...」Carol望下望下間茶記...又點下點下頭。

『嗯~咁我地行喇~』好彩Carol都比較單純...

同Carol入到黎間茶記,坐喺個四人卡位。

呢間茶記D野食又真係精美D~又多款式D~唔係剩係得D常餐快餐特餐ABC餐~咁我都唔算係呃左Carol入黎啦~

同Carol叫左D野食...

Carol就摸下摸下個HUMAN TOUCH既白色紙袋...又扁晒嘴咁...

『你而家咁既樣...到時點出席人地個婚宴丫?』唔通真係同人講戥人高興到喊出黎咩...

「唔...我都有諗過...有諗過可唔可以控制到自己既情緒...但照咁睇...一定唔得囉...」Carol又講到想喊想喊咁既樣...

『咁不如你唔好去啦。』明知自己控制唔到,就無謂令自己難受...

「下?唔去丫?」Carol又皺晒眉頭咁。

『你唔怕會俾人覺得有野咩...如果你帶住咁既樣去丫,人地一睇就知你有野啦。你都係送左份禮,俾埋人情,話唔舒服又好...有要事都好...總之就借D易唔好去好喇。』送左禮就應該唔會俾人話有野既。

「嗯...其實我都諗住送左份禮就唔去架喇...唉...我都知我無鬼用...好易喊...」Carol扁扁地嘴咁點點頭。

『都唔係無用既…易喊姐...係女仔都會易D喊架啦...』係我咁另類架姐...

「我都想可以堅強D...」Carol繼續扁住嘴咁點點頭。

『堅強丫...可能你過左呢次會真係變得堅強呢..』經一事,蔡一智丫嘛。

「嗯嗯...希望啦...唉~都係唔好講我喇~講下你丫~點丫?前排聽你講話無靈感交唔到貨。而家呢?而家有靈感未丫?交到貨未丫?」Carol捉住我對手問一問。

『唔...都仲係無乜靈感...只係Hea住咁交貨...不過唔可以再Hea喇...我上司要我認認真真咁交D好野俾佢...我已經周圍去攞靈感架喇...不過仲係畫唔出...』諗起都覺得煩...

「靈感丫...我都知靈感係好重要既...而且仲係要聽人指示...係咁改改改改改...改到唔係自己既設計...」Carol好感慨咁點點頭...

『嗯...』做設計既就會明白俾人狂Ban你既設計,仲要跟人地既指示改改改改改係幾咁痛苦。

咁多意見就唔好叫我畫...你自己畫埋佢囉...

「之不過講開靈感既話...我諗...我有個好姊妹或者幫到你喎...」Carol諗下諗下...

『嗯?』有個好姊妹或者幫到我?

點幫到我呢?